ရောဂါဘယထူပြောလှတဲ့ ၂၁ ရာစုမှာ ကျန်းမာရေးကောင်းဖို့က အရေးကြီးဆုံးအရာ ဖြစ်လာပါတယ်။

ကျန်းမာပြီး လှပတဲ့ အမျိုးသမီးတစ်ယောက်ဖြစ်ဖို့ဆိုရင် ညစာကို စနစ်တကျ စားသောက်ဖို့ကလည်း အလွန်အရေးပါပါတယ်။ ကိုယ်အလေးချိန်ကို ထိန်းသိမ်းဖို့ ၊ ကျန်းမာရေးနဲ့ ညီညွတ်ဖို့ဆိုရင် ညနေစာကို ညအိပ်ချိန်နဲ့ခွာပြီး ခပ်စောစောစားသင့်ပြီး ဗိုက်အလွန်ပြည့်အောင် စားစရာလည်း မလိုအပ်ပါဘူး။ 



အခုပြောပြမှာကတော့ ကျန်းမာရေးနဲ့ညီညွတ်ကာ ဝိတ်မတက်စေတဲ့အပြင် ကုန်ကျစရိတ်ပါသက်သာတဲ့ ညစာတွေပဲ ဖြစ်ပါတယ်။

ညစာအနေနဲ့ စားသင့်တဲ့ အစားအစာ (၅)မျိုး

ကန်စွန်းဥ


Photo-ndtv.com

ကန်စွန်းဥမှာ ဘီတာကယ်ရိုတင်း၊ ဗီတာမင်စီ၊ ပိုတက်စီယမ် နဲ့ အမျှင်ဓာတ်တွေ ပါဝင်ပါတယ်။ ကန်စွန်းဥက ကျန်းမာရေးအတွက်လည်း သင့်တော်ပြီး ဗိုက်ပြည့်လွယ်ပါတယ်။ အရသာရှိတဲ့အပြင် တခြားအစားအစာတွေနဲ့ တွဲဖက်စားဖို့လည်း သင့်တော်ပါတယ်။ ကန်စွန်းဥကို ပြုတ်စားတာ ၊ မီးဖုတ်စားတာမျိုး ပြုလုပ်နိုင်ပါတယ်။

ဆန်လုံးညို (သို့မဟုတ်) အဆီမပါတဲ့ဆန်

ဆန်လုံးညို ဒါမှမဟုတ် ဧရာပဒေသာတို့လို အဆီမပါတဲ့ဆန်က ကျန်းမာရေးနဲ့သင့်တော်တဲ့ အစေ့အဆန်ဖြစ်ပြီး ညစာကို ထမင်းစားရမှ ကျေနပ်တဲ့သူတွေအတွက်လည်း အာသာပြေ (အနည်းငယ်) စားဖို့ သင့်တော်ပါတယ်။ န်လုံးညိုကဲ့သို့ အစေ့အဆန်တွေဟာ မဂ္ဂနီဆီယမ်ဓာတ်နဲ့ အခြားအာဟာရဓာတ်တွေကိုလည်း ပေးစွမ်းနိုင်ပါတယ်။ လေ့လာမှုအရ အူမကြီးကင်ဆာ၊ နှလုံးရောဂါ နဲ့ ဆီးချိုရောဂါဖြစ်နိုင်ခြေတွေကိုလည်း လျှော့ချပေးပါတယ်။ ထမင်းကို အများဆုံး ပန်းကန်လုံးအသေးနဲ့ တစ်လုံးကို စိမ်းရောင်ဟင်းသီးဟင်းရွက်များ ၊ ကြက်သားသုပ်၊ ကြက်ဥပြုတ် ၊ ပုစွန်ကင်။ ဟင်းချိုတို့နဲ့ တွဲဖက်စားနိုင်ပါတယ်။

ကုလားပဲ

ကုလားပဲမှာ အခြေခံပရိုတိန်းဓာတ်တွေ ပါဝင်တဲ့အပြင် အမျှင်ဓာတ် ၊ ဆယ်လီနီယမ်၊ သံဓာတ်စတဲ့ အာဟာရဓာတ်တွေကို ပံ့ပိုးပေးပြီး ကျန်းမာရေးအကျိုးကျေးဇူးတွေ မယုံနိုင်လောက်အောင်ရှိတယ်လို့ သုတေသနစစ်တမ်းတွေကဆိုပါတယ်။ကုလားပဲဟာ အရသာရှိတဲ့အပြင် မြန်မာလူမျိုးတွေ အများဆုံးစားကြတဲ့ ပဲတစ်မျိုးလည်း ဖြစ်တဲ့အတွက် လွယ်ကူတဲ့ ဟင်းလျာဖြစ်ပါတယ်။

အရွက်သုပ်

အစိမ်းရောင် အသီးအရွက်တွေဖြစ်တဲ့ ဟင်းနုနွယ်ရွက် ၊ ကိုက်လန် ၊ ဘရိုကိုလီ(ပန်းပွင့်စိမ်း) တို့အပြင် သခွားသီး ၊ မုန်လာဥနီ ၊ ကြက်သွန်နီတို့ကို ဆီအနည်းငယ် (သံလွင်ဆီဆိုပိုကောင်းပါတယ်) ရှာလကာရည်တို့နဲ့ သုပ်စားတာမျိုးကို ညစာအဖြစ် စားသင့်ပါတယ်။

ဟင်းချို/စွတ်ပြုတ်

ညစာကို ဆီပြန်ဟင်းတွေ အကြော်အလှော်တွေထက် ဟင်းချို ဒါမှမဟုတ် စွပ်ပြုတ်လိုမျိုး စားတာက ပိုပြီးသင့်တော်ပါတယ်။ မိသားစုနဲ့အတူ ထမင်းစားမယ်ဆိုရင်လည်း ထမင်းနဲ့ ဟင်းချိုနဲ့ကို တွဲဖက်စားသုံးတာ၊ ဒါမှမဟုတ် ဟင်းချိုချည်းပဲ စားတာမျိုး လုပ်နိုင်တဲ့အတွက် ကိုယ့်အတွက် သီးသန့်ချက်ပြုတ်ပြင်ဆင်နေဖို့ မလိုတော့ဘူးပေါ့။

ဒါ့အပြင် အခုနောက်ပိုင်းမှာဆိုရင် ညစာကို သစ်သီးစားတဲ့ အလေ့အထကိုလည်း အမျိုးသမီးအများစု ပြုလုပ်လာကြပါတယ်။သစ်သီးတွေမှာ ကျန်းမာရေးအတွက်အထောက်အကူပြုတဲ့ ဗီတာမင်၊ အမျှင်ဓာတ်နှင့်အခြားအာဟာရတွေလည်း ပါဝင်ပြီး ကိုယ်အလေးချိန်ကျဖို့အပြင် ဆီးချိုရောဂါ၊ သွေးတိုး၊ ကင်ဆာနဲ့နှလုံးရောဂါဖြစ်နိုင်ခြေကိုပါ လျော့ကျစေပါတယ်။

လွယ်ကူပြီး ညစာအဖြစ်စားသင့်တဲ့ သစ်သီး ( ၃) မျိုး

ပန်းသီး


Photo-insider.com

ပန်းသီးဟာ ကယ်လိုရီနည်းပြီး အမျှင်ဓာတ်မြင့်မားတဲ့ အသီးဖြစ်ပါတယ်။ လေ့လာတွေ့ရှိချက်တွေအရ ပန်းသီးဟာ ဆာလောင်မှုကို လျော့ကျစေပြီး အစာစားချင်စိတ်ကို ထိန်းချုပ်နိုင်စေတယ်လို့ ဆိုပါတယ်။

ဖရဲသီး

ဖရဲသီးဟာ ကယ်လိုရီနည်ပြီး ရေဓာတ်ပါဝင်မှုမြင့်မားပါတယ်။ဒါ့အပြင် အမျှင်ဓာတ်၊ ပိုတက်စီယမ် နဲ့ ဗီတာမင်စီ ၊ ဘီတာကယ်ရိုတင်းဓာတ်လည်းပါဝင်ပါတယ်။ အရည်ရွှမ်းပြီး ရေဓာတ်ပါဝင်မှုမြင့်မားတာကြောင့် ဗိုက်အဆာခံနိုင်ပြီး ကိုယ်အလေးချိန်လည်း ကျစေပါတယ်။

ငှက်ပျောသီး


photo-hsph.harvard.edu

ငှက်ပျောသီးဟာ တခြားအသီးတွေထက်တော့ ကယ်လိုရီပိုများပါတယ်။ဒါပေမယ့် ငှက်ပျောသီးမှာ ပိုတက်စီယမ်၊ မဂ္ဂနီဆီယမ်၊ မန်းဂနိစ်၊ အမျှင်ဓာတ်၊ ဓာတ်တိုးဆန့်ကျင်ပစ္စည်းများ ၊ ဗီတာမင်အေ ၊ ဗီတာမင်စီ စတဲ့ ဓာတ်များစွာပါဝင်ပါတယ်။ငှက်ပျောသီးစားခြင်းက ကိုလက်စထရောမြင့်မားနေတဲ့သူတွေကိုလည်း သွေးတွင်းသကြားဓာတ် လျှော့ချပေးနိုင်တယ်လို့ သုတေသနတွေက ဆိုပါတယ်။

Ref: Healthline

Share

က္က