မြင့်မြတ်ကတော့ သားလေးနဲ့ အတူတူ အပြင်တွေ လျှောက်သွားချင်တယ်လို့ ဆိုပါတယ်။ 

မြင့်မြတ်ရဲ့သားလေး မြတ်သူကတော့အခုဆိုရင် ပရိသတ်တွေရဲ့ အချစ်ကို အခိုင်အမာ ရရှိထားပြီဖြစ်တဲ့ ကလေးလေးတစ်ယောက်ပါပဲ။ ဖခင်ဖြစ်သူ မြင့်မြတ်ကတော့ သားလေးကို အပြင်တွေ သွားတိုင်း ခေါ်သွားချင်မိတယ်လို့ Duwun Media အင်တာဗျူးမှာ ဖြေဆိုခဲ့ပါတယ်။ 

“ သားကို အပြင်တွေသွားတိုင်း ခေါ်ချင်ပါတယ်။ အများအားဖြင့်လည်း အပြင်တွေ သွားရင် ခေါ်တယ်။ ဒါပေမယ့် ညဘက်တွေဆိုရင် သူ့ရဲ့ အိပ်ချိန်ကိုလည်း ထိခိုက်မှာစိုးတော့ မခေါ်ဖြစ်ဘူး။ သူ့ကို အိပ်ချိန်၊ စားချိန်က အစ သေချာလေး ဂရုစိုက်ဖြစ်တယ်” လို့ မေလ ၁၅ ရက်နေ့က Media 7 နဲ့ စာချုပ်ချုပ်ဆိုပွဲမှာ ဖြေဆိုခဲ့တာပါ။ 

မြင့်မြတ်ဟာ အခုဆိုရင်တော့ ဇနီးဖြစ်သူရယ်၊ သားရယ်၊ ဗိုက်ထဲမှာရှိနေသေးတဲ့ ဒုတိယမြောက်ရင်သွေးလေးကို ပိုင်ဆိုင်ထားတဲ့ သရုပ်ဆောင်တစ်ယောက်ဖြစ်ပါတယ်။ သူပိုင်ဆိုင်ထားတဲ့ မိသားစုဘဝလေးကို အေးအေးချမ်းချမ်းဖြတ်သန်းသွားမယ်လို့လည်း သူကဆိုပါတယ်။ 

“ ကျွန်တော်က အိမ်မှာနေနေ၊ အပြင်သွားသွား လွတ်လွတ်လပ်လပ်နေရတာကို ကြိုက်တယ်။ ကိုယ့်မိသားစု ပုံစံကိုလည်း လွတ်လွတ်လပ်လပ်နဲ့ အေးအေးဆေးဆေးလေးပဲ ဖြစ်စေချင်တာပါ။ အားလပ်ချိန်တွေမှာလည်း ဂိမ်းပဲဆော့တယ်၊ ပြီးရင် ကလေးနဲ့ဆော့တယ်၊ မိန်းမ နဲ့ မုန့်စားတယ် ဒါတွေက ကျွန်တော့် အလုပ်ပါပဲ။ ပြီးတော့ ကိုယ့်အလုပ်ရှိရင် ဒီ ၄ ခုကြားမှာ ဗျာများနေရတာပေါ့” ဆိုပြီးတော့ သဘောကျရယ်မောရင်း ပြောပြလာပါတယ်။ 

Photo: Myint Myat

သရုပ်ဆောင်မြင့်မြတ်ကတော့ လက်ရှိမှာ ရုပ်ရှင်ဇာတ်ကားကြီးတွေ ဆက်တိုက်ရိုက်ကူးနေရသူပါ။ COVID-19 ကြောင့် ရိုက်ကူးရေးတွေ ခဏနားထားရင်း မိသားစုကို အချိန်ပေးနေတယ်လို့လည်း သိရပါတယ်။ အခုဆိုရင်တော့ ဒုတိယမြောက် ရင်သွေးလေးကို ဇနီးဖြစ်သူ မခင်သူအောင်က ကိုယ်ဝန်လွယ်ထားရပြီလို့ မြင့်မြတ်က Duwun Media အင်တာဗျူးမှာ ဖြေဆိုခဲ့ပါတယ်။ သူဟာ "အမှောင်မှာ ရွာချတဲ့မိုးတိမ်" ရုပ်ရှင်ဇာတ်ကားကြီးနဲ့ ၂၀၁၇ ခုနှစ်အတွက် အကောင်းဆုံး အမျိုးသားဇာတ်ပို့ဆုကို ရရှိထားတာပါ။ လက်ရှိမှာလည်း ပရိသတ်အခိုင်အမာရရှိထားတဲ့ ထိပ်တန်း သရုပ်ဆောင်တစ်ယောက်ဖြစ်ပါတယ်။