အင်းစိန်မြို့နယ်က ရောဂါပိုးတွေ့ရှိတဲ့လူနာဟာ မတ်လ ၂၁ ရက်နေ့က ဘန်ကောက်မြို့၊ သုဝဏ္ဏဘူမိလေဆိပ်ကနေ ရန်ကုန်လေဆိပ်ကို UB 701၊ ခုံတန်းအမှတ် ၃ မှာ လိုက်ပါစီးနင်းခဲတာကြောင့် ခုံတန်းအမှတ် (၁၊၂၊၃၊၄၊၅၊၆) တို့ကနေ လိုက်ပါစီးနင်းခဲ့တဲ့ ခရီးသည်တွေ နီးစပ်ရာကျန်းမာရေးဌာနကို အမြန်ဆုံး အကြောင်းကြားပေးဖို့ သတင်းထုတ်ပြန်ပါတယ်။

လက်ရှိမှာ အင်းစိန်မြို့နယ်က ပိုးတွေ့လူနာဖြစ်တဲ့အသက် ၂၆ နှစ်အရွယ် အမျိုးသားအပါအဝင် သူနဲ့ ထိတွေ့ခဲ့သူ မိသားစုင် (၂) ဦးကိုတော့ ဝေဘာဂီဆေးရုံမှာ အသွားအလာကန့်သတ်စောင့်ကြပ်ကြည့်ရှုနေပြီး ကျန်ထိတွေ့ခဲ့တဲ့ မိသားစုဝင် (၉) ဦးကိုလည်း နေအိမ်မှာ အသွားအလာကန့်သတ်ခြင်းကို တင်းကြပ်စွာ ဆောင်ရွက်ထားတယ်လို့လည်း သိရပါတယ်။

ကျန်းမာရေးနှင့်အားကစားဝန်ကြီးဌာနအနေနဲ့ COVID-19 ရောဂါလူနာတွေနဲ့အနီးကပ် ထိတွေ့ဆက်ဆံခဲ့သူ အားလုံးကို အမြန်ဆုံးရှာဖွေဖော်ထုတ်ပြီး အသွားအလာကန့်သတ်တာတွေ ပြုလုပ်နေပြီးCOVID-19 ရောဂါဖြစ်ပွားတဲ့ဒေသ၊နိုင်ငံတွေကပြန်လာတဲ့သူတွေအနေနဲ့ အိမ်မှာ အသွားအလာကန့်သတ်နေထိုင်နေစဉ် လိုက်နာရမယ့်အချက်တွေကိုလည်းကောင်း၊ မိသားစုဝင်တွေလည်း လိုက်နာရမယ့် တိုက်တွန်းနှိုးဆော်ချက်တွေကို တိတိကျကျလိုက်နာကြဖို့ကိုလည်း အထူးအလေးထားတိုက်တွန်းထားပါတယ်။

မတ်လ ၂၅ ရက် အထိတော့ မြန်မာတစ်နိုင်ငံလုံးမှာ COVID-19 ရောဂါပိုးတွေ့ရှိသူ လူနာ (၃) ဦးအပါအဝင် သံသယနဲ့ စောင့်ကြည့်လူနာ စုစုပေါင်း (၂၇၅) ဦးရှိတယ်လို့လည်း ဝန်ကြီးဌာနရဲ့ ထုတ်ပြန်ချက်တွေအရသိရပါတယ်။ ဒါ့အပြင် တိုင်းနဲ့ပြည်နယ်အသီးသီးက ဆေးရုံ၊ဟိုတယ်၊အဆောက်အဦးတွေမှာ အသွားအလာတားမြစ်ကန့်သတ်ထားသူ စုစုပေါင်း (၅၀၄) ဦးရှိနေပြီလို့လည်းသိရပါတယ်။