သရုပ်ဆောင် မိုးအောင်ရင်ကတော့ ဒီနေ့ (မေလ ၇) ရက်နေ့မှာပဲ အကျဉ်းထောင်ကနေ ပြန်လည် လွတ်မြောက်လာပြီဖြစ်လို့ ဖခင်ဖြစ်သူ ဦးအောင်ရင်ကတော့ အပျော်ကြီးပျော်နေတာကို တွေ့ရပါတယ်။

‘’ကျွန်တော်တို့မိသားစုရဲ့ အိပ်မက်ဆိုးကြီးကနေ ဒီနေ့လွတ်မြောက်ပါပြီခင်ဗျာ။ လွတ်မြောက်ခွင့်ရရှိဖို့အတွက် သမ္မတကြီးနဲ့တကွ တာဝန်ရှိသူလူကြီးမင်းများအားလုံး၊ စိတ်ပူပြီး ဆုတောင်းမေတ္တာ ပို့သပေးကြသူများအားလုံး၊ ကိုယ်ချင်းစာတရားအပြည့်နဲ့ ကျွန်တော်တို့မိသားစုကို စောင့်လျှောက်ဖေးမ ကူညီကြသူများအားလုံးကို ရင်ထဲက လှိုက်လှိုက်လှဲလှဲ ကျေးဇူးအထူးပဲတင်ရှိပါတယ် ခင်ဗျာ’’ ဆိုပြီးတော့ မေလ ၇ ရက်နေ့ မနက် ၉ နာရီခွဲကျော်က သူ့ရဲ့ ဖေ့စ်ဘွတ်စာမျက်နှာမှာ ရေးသားခဲ့ပါတယ်။

မိုးအောင်ရင်ကို ချစ်တဲ့ ပရိသတ်တွေကလည်း ဦးအောင်ရင်ရဲ့ Post အောက်က Comment ကနေတဆင့် ဝမ်းသာပီတိဖြစ်ရတဲ့အကြောင်းတွေ ပြောထားကြပါသေးတယ်။ သရုပ်ဆောင်မိုးအောင်ရင်ကို ၂၀၁၈ ခုနှစ် နိုဝင်ဘာ ၂၆ ရက်က ပုဇွန်တောင်မြို့နယ် တရားရုံးမှမူးယစ်ဆေးဝါးလက်ဝယ် တွေ့ရှိမှုသုံးစွဲမှု ပုဒ်မများဖြင့် အလုပ်နှင့် ထောင်ဒဏ် ၅ နှစ် ချမှတ်ခဲ့ပြီး ဒီဇင်ဘာ ၁၂ ရက်တွင် အရှေ့ပိုင်းခရိုင် တရားရုံးကမူးယစ်ဆေးဝါးလက်ဝယ်တွေ့ရှိမှု ပုဒ်မ -၁၉ (က)နဲ့ အလုပ်နဲ့ထောင်ဒဏ် ၁၂ နှစ်ထပ်မံချမှတ်ခဲ့တာကြောင့် စုစုပေါင်း အလုပ်နဲ့ထောင်ဒဏ် ၁၇ နှစ် ကျခံခဲ့ရတာဖြစ်ပါတယ်။