လူကာကူဟာ အင်တာမီလန်မှာ တစ်နှစ်လုပ်ခပေါင် (၆.၆)သန်းအထိ ရရှိမှာဖြစ်ပြီး ၂၀၂၄ ခုနှစ်အထိ စာချုပ်ချုပ်ဆိုသွားမယ်လို့လည်း သိရပါတယ်။

အင်တာနည်းပြသစ်အဖြစ် ကွန်တီခန့်အပ်ခံရပြီးနောက် လူကာကူကို ထိပ်တန်းပစ်မှတ်အဖြစ် သတ်မှတ်ခဲ့ကာ ကစားသမားကို အိုးထရက်ဖို့ဒ်ကနေ ဆန်စီရိုကို ပြောင်းရွှေ့လာဖို့အတွက် အားထုတ်ကြိုးပမ်းခဲ့ပါတယ်။ ကလပ်အသင်းနှစ်သင်းကြား ပြောင်းရွှေ့ကြေးညှိနှိုင်းဖိ့ုသာ ကျန်ရှိတော့ပြီး ယူနိုက်တက်ဘက်က လူကာကူအတွက် ပေါင် (၆၂)သန်းအထိ အလိုရှိနေပါတယ်။

အသက် (၂၆)နှစ်အရွယ် ဘယ်လ်ဂျီယံတိုက်စစ်မှူးဟာ နည်းပြဆိုးလ်ရှားလက်အောက်မှာ ပွဲကစားချိန်နည်းပါးလာခဲ့ရပြီး မားကပ်ရက်ရှ်ဖို့ဒ်က ဗဟိုတိုက်စစ်မှူးအဖြစ် ပွဲထွက်ခွင့် ရနေခဲ့ပါတယ်။ စီးရီးအေပြိုင်ပွဲတွေကို စိတ်ဝင်စားကြောင်းနဲ့ ပြောင်းရွှေ့ကစားဖို့အတွက် ဆန္ဒရှိတယ်လို့လည်း လူကာကူက မကြာခဏဆိုသလို ထုတ်ဖော်ပြောဆိုမှုတွေ ပြုလုပ်ခဲ့ပါတယ်။

ယူနိုက်တက်ကတော့ လူကာကူကို ပြန်လည်ရောင်းချပြီး နွေရာသီဈေးကွက်အတွင်းမှာ ကစားသမားဝယ်ယူဖို့အတွက် ငွေကြေးရရှိမယ်လို့ မျှော်လင့်နေပါတယ်။ အသင်းကို ပြုပြင်ပြောင်းလဲမှုတွေနဲ့ ဖွဲ့စည်းသွားမယ်လို့ ဆိုးလ်ရှားက ပြောဆိုထားပြီး လက်ရှိမှာ ဆွမ်ဆီးတောင်ပံကစားသမား ဒန်နီရယ်ဂျိမ်းစ်ကို ခေါ်ယူထားပြီး နောက်ထပ်ကစားသမားသစ်ခေါ်ယူနိုင်ဖို့ ကြိုးစားနေပါတယ်။