အဆိုပါပြင်သစ်လူမျိုး တိုက်စစ်ကစားသမားဟာ (၂၀၁၅) မှာ ယူနိုက်တက်ကို စတင်ရောက်ရှိလာခဲ့ပြီး ပရိသတ်တွေကလည်း နောက်ပိုင်းမှာ ရပ်ရှ်ဖို့ဒ်၊ မာရှယ်၊ လင်ဂတ်တို့အတွဲကို အနာဂတ်အတွက် အများကြီးမျှော်လင့်ခဲ့ပါတယ်။ ဒါပေမယ့် တကယ်တမ်းမှာတော့ သုံးယောက်လုံးက ဘာမှထိထိရောက်ရောက် မဖြစ်ထွန်းခဲ့ပါဘူး။

မာရှယ်ဟာ ပြီးခဲ့တဲ့စနေညက ကစားခဲ့တဲ့ ဝက်စ်ဟမ်းနဲ့ပွဲမှာ ရပ်ရှ်ဖို့ဒ်ရဲ့ နောက်ဆုံးမိနစ် အနိုင်ဂိုးအတွက် ကာဗာနီရဲ့ပြေးလမ်းကြောင်းထဲကို ဘောလုံးခင်းပေးခဲ့တာဖြစ်ပြီး အဲ့ဒီပွဲအပြီးမှာတော့ အခုလိုမျိုးပဲ ယူနိုက်တက်ကနေ အငှားနဲ့ ထွက်ကစားခဲ့တာဖြစ်ပါတယ်။ မာရှယ်အသင်းက ထွက်ခွာခဲ့တာနဲ့ ပတ်သက်လို့ ရပ်ရှ်ဖို့ဒ်က ပထမဆုံး နှုတ်ဆက်စကားပြောတဲ့ ယူနိုက်တက်ကစားသမားလည်းဖြစ်ခဲ့ပါတယ်။

ယူနိုက်တက်ကလည်း “ဆီဗီလာမှာ ကျောနံပါတ် (၂၂) ကို ဝတ်ဆင်မယ့် မာရှယ်က ပယ်လီစထရီပြီးရင် စပိန် ထိပ်သီးလိဂ်မှာ ကစားမယ့် ဒုတိယမြောက် ယူနိုက်တက် ကစားသမားဖြစ်လာမှာပါ။ ယူနိုက်တက်မှာရှိတဲ့လူတိုင်းက မာရှယ်တယောက် ဆီဗီလာမှာ ကောင်းမွန်တဲ့အချိန်တွေကို ပိုင်ဆိုင်နိုင်ဖို့ ဆုတောင်းပေးပါတယ်” လို့ တရားဝင်ကြေညာချက်ထုတ်ပြန်ခဲ့ပါတယ်။