မီးမီးခဲဟာ အသက် ၃၅ နှစ်အရွယ်မှာ သေရတော့မယ်ဆိုတဲ့ အတွေးက အရမ်းကို အံ့သြစရာဖြစ်ခဲ့တယ်လို့ ဆိုပါတယ်။ ကင်ဆာရောဂါ ခံစားနေခဲ့ရချိန်က အမှတ်တရတွေကို တစ်ကိုယ်တော် ဖျော်ဖြေပွဲမှာ ပြသသွားမယ်လို့ သူက ပြောပါတယ်။

ကိုယ်တိုင်က သေရတော့မယ်လို့ သိလိုက်ရတဲ့ ခံစားခဲ့ရတဲ့ စိတ်နေစိတ်ထားကို မီးမီးခဲက ရင်ဖွင့်ပြောပြလာပါတယ်။ ဒါပေမယ့် သူ့ရဲ့ ခင်ပွန်းဖြစ်သူကတော့ အားပေးစကားပြောခဲ့တယ်လို့ သူကဆိုပါတယ်။

“ ဆရာဝန်က စပြောတုန်းက ၅ နှစ်လို့တောင်မပြောဘူး။ သေတော့မယ်ပေါ့ ချက်ချင်းသေမယ်လို့တောင် ပြောလိုက်တာ။ အစ်မကို စတွေ့တဲ့အချိန်တုန်းက သမီး နင်ကင်ဆာဖြစ်နေပြီ သေရတော့မယ်လို့ပဲ ပြောတာ။ တစ်ကိုယ်လုံးပူထူပြီးတော့ ပြာသွားတာပေါ့နော်။ အစ်မ အမျိုးသားကလည်း ငိုတာပေါ့။ အကုန်လုံးပဲ ငိုကြတာ ကလေးတွေကလည်း ငယ်သေးတယ်။ ဒါပေမယ့် အစ်မအမျိုးသားကတော့ သူများတွေ သေမယ်ဆိုတဲ့အရာကို ငါတို့မတွေးပဲနဲ့ ငါတို့ အသက်ရှင်နိုင်မယ် ဆိုတဲ့ အရာကိုပဲ စဉ်းစားပြီးတော့ ရှေ့ဆက်သွားကြည့်ရအောင်ဆိုတဲ့ စကားကြောင့် အစ်မ ထလာနိုင်တာပါ” လို့ ဆိုပါတယ်။

“ လူဆိုတာ သေရင်အကုန်လုံးထားခဲ့ရမှာပဲလေ။ ငါ့အသက် ၃၅ ၊ ၃၆ မှာ သေရတော့မှာပဲ ဆိုပြီးတော့ အရမ်းSurprise ဖြစ်တာပေါ့နော်။ ငါ သီချင်းလည်းပြန်မဆိုရတော့ဘူး။ ဒီနိုင်ငံကြီးမှာ ငါသေရတော့မှာပဲပေါ့။ ကိုယ်သေရမယ့်အကြောင်းက ကိုယ်ကိုယ်တိုင်ခံစားဖူးမှပဲ သိမှာပေါ့နော်။ Feel ကတော့ ပြောပြလို့တောင် မရပါဘူး” ဆိုပြီးတော့ ဇန်နဝါရီလ ၇ ရက်နေ့က တစ်ကိုယ်တော်ဖျော်ဖြေပွဲအတွက် စာနယ်ဇင်းမိတ်ဆက်ပွဲမှာ ဖြေဆိုခဲ့တာပါ။

မီးမီးခဲကတော့ နိုင်ငံကျော် တေးရေးဆရာကြီး စောဘွဲ့မှူးရဲ့ သမီးငယ်လေးဖြစ်ပြီးတော့ အဆိုတော် ကဗျာဘွဲ့မှူးရဲ့ ညီမငယ်လေးဖြစ်ပါတယ်။သူမဟာ လက်ရှိမှာ ဂီတလောကနဲ့ နည်းနည်း အဆက်အသွယ်ပြတ်သွားခဲ့ပါတယ်။ ဒါပေမယ့် ပြီးခဲ့တဲ့ လပိုင်းလောက်က သီချင်းအသစ်တစ်ပုဒ် ထွက်ရှိခဲ့ပြီး အဲဒီ သီချင်းလေးနဲ့ပဲ ပရိသတ်တွေ သူမကို ပြန်ပြီး သတိရစေခဲ့တာပါ။ သူမကိုယ်တိုင် ရေးထားတဲ့ “ငါ့ရဲ့ မျက်ဝန်းညို” ဆိုတဲ့ သီချင်းလေးက ပရိသတ်တွေကြားအ ရမ်းကို နာမည်ကြီးသွားခဲ့တာပါ။ ထူးခြားတဲ့ အသံလေးကို ပိုင်ဆိုင်ထားပြီး ချစ်ဖို့ကောင်းလှတဲ့ အဆိုတော် မီးမီးခဲဟာ ပရိသတ်တွေရဲ့ ချစ်ခင်အားပေးမှုကို ပိုင်ဆိုင်ထားတဲ့ အဆိုတော်တစ်ဦးပါ။မီးမီးခဲဟာ "မျက်ဝန်းညို" ၊ "အဝေးက ချစ်သူ" စတဲ့ သီချင်းအသစ်တွေလည်း ထွက်ရှိထားပါသေးတယ်။