ဆာလာကတော့ လက်ရှိကမ္ဘာ့အကောင်းဆုံးလို့ဆိုရလောက်အောင် ခြေစွမ်းပြနေပါတယ်။

နယူးကာဆယ်နဲ့ပွဲမှာ လီဗာပူးလ်အတွက် အနိုင်ဂိုးတစ်ဂိုးသွင်းယူပေးနိုင်ခဲ့တဲ့နောက် ဒီရာသီမှာ ခြေစွမ်းပြနေတဲ့ တိုက်စစ်မှူးဆာလာဟာ ပရီးမီးယားလိဂ်စံချိန်တစ်ခုကို လိုက်မီခဲ့ပြန်ပြီဖြစ်ပါတယ်။ ဆာလာဟာ အသင်းကို ၂-၁ နဲ့ ဦးဆောင်စေမယ့်ဂိုးကို သွင်းယူပေးခဲ့တာဖြစ်ပြီး ဂျင်မီဗာဒီရဲ့ စံချိန်ကို လိုက်မီသွားခဲ့တာလည်းဖြစ်ပါတယ်။ 



အီဂျစ်တိုက်စစ်မှူးဟာ ပရီးမီးယားလိဂ် ၁၅ ပွဲဆက်တိုက် ဂိုးဖန်တီးမှု ဒါမှမဟုတ် သွင်းဂိုးရယူမှုတွေကို လုပ်ပြနိုင်ခဲ့တာဖြစ်ပါတယ်။ ဒီစံချိန်ကို ဗာဒီက အရင်တင်ထားခဲ့တာဖြစ်ပြီး ဆာလာက လိုက်မီခဲ့ကာ နောက်တပွဲမှာ ဖန်တီးမှု ဒါမှမဟုတ် ဂိုးသွင်းနိုင်ခဲ့ရင် စံချိန်သစ်ပါတင်နိုင်တော့မှာလည်းဖြစ်ပါတယ်။ လက်ရှိမှာ ဆာလာက အသင်းအတွက် ပြိုင်ပွဲစုံ ၂၃ ပွဲကစားပေးထားပြီး ၂၂ ဂိုးအထိ ရရှိထားပြိဖြစ်ပါတယ်။ 


ဗာဒီက ၂၀၁၅ ခုနှစ်၊ ဩဂုတ်လကနေ ဒီဇင်ဘာလအတွင်းမှာ ဒီစံချိန်ကို ပိုင်ဆိုင်ခဲ့တာဖြစ်ပြီး အသင်းနဲ့အတူ အမှတ်ပေးဖလားပါ ဆွတ်ခူးနိုင်ခဲ့ပါတယ်။ ဒါကြောင့် ၆ နှစ်ကြာမြင့်အပြီးမှာမှ သူ့စံချိန်ကို လိုက်မီသူ ပေါ်ထွက်လာခဲ့တာဖြစ်ပြိး ကျော်တက်သွားမယ့်အရေးနဲ့ပါ ရင်ဆိုင်နေရကာ မိုဟာမက်ဆာလာအတွက်တော့ ထူးခြားတဲ့စံချိန်တခုကို ပိုင်ဆိုင်ဖို့က လက်တကမ်းအကွာကို ရောက်လာခဲ့ပြီဖြစ်ပါတယ်။ 


ပရီးမီးယားလိဂ်သွင်းဂိုး ၁၅ ဂိုးအထိ ရရှိထားကာ ရွှေဖိနပ်ဆုအတွက်လည်း ဆာလာက ပြတ်ပြတ်သားသားနဲ့ ဦးဆောင်နေပြီဖြစ်ပါတယ်။ လီဗပူးလ်ကိုရောက်ရှိလာခဲ့ပြီးကတည်းက ပရီးမီးယားလိဂ်မှာ တရာသီကိုအနည်းဆုံးသွင်းဂိုး ၁၉ ဂိုးအထိ ဆာလာက ရယူထားနိုင်ခဲ့ပြီး အဆိုပါစံချိန်ကို ဆက်ထိန်းနိုင်ဖို့အတွက်ကလည်း ၄ ဂိုးသာ လိုအပ်တော့တာဖြစ်ပါတယ်။ 


အမှတ်ပေးပွဲ နောက်ထပ် ၂၁ ပွဲအထိ ကစားဖို့ကျန်နေသေးတာကြောင့် ဒီစံချိန်ကိုထိန်းသိမ်းဖို့ကလည်း သေချာသလောက်ရှိနေခဲ့ပါတယ်။ ပြီးခဲ့တဲ့ရာသီမှာ ပြိုင်ပွဲစုံသွင်းဂိုး ၃၁ ဂိုးရရှိခဲ့ပြီး ဒီရာသီမှာ ၂၂ဂိုး ရနေပြီဖြစ်လို့ ၉ ဂိုးထပ်သွင်းရုံနဲ့ အဆိုပါမှတ်တမ်းကိုလည်း ထိန်းသိမ်းနိုင်ဦးမှာဖြစ်ပါတယ်။ 


ဆက်စပ်အကြောင်းအရာများ

Share

က္က