ဘာစီလိုနာအသင်းဟာ အင်္ဂါနေ့ညနေက နူးကမ့်မှာ ဘင်ဖီကာအသင်းနဲ့ တွေ့ဆုံယှဉ်ပြိုင်ခဲ့တဲ့ အရေးကြီးတဲ့ ချန်ပီယံလိဂ်ပွဲစဉ်မှာ ဂိုးမရှိသရေရလဒ်သာ ရယူနိုင်ခဲ့ပြီး နည်းပြ ဇာဗီက မြူးနစ်မှာ ကစားရမယ့် အုပ်စုနောက်ဆုံးပွဲကို အနိုင်ယူပြမယ်လို့ ကြုံးဝါးခဲ့တာပါ။
ဘင်ဖီကာအသင်းနဲ့ သရေရလဒ်သာ ထွက်ပေါ်ခဲ့တာကြောင့် ဘာစီလိုနာအသင်းဟာ တတိယနေရာက ဘင်ဖီကာထက် ၂ မှတ်အသာ၊ အုပ်စုပထမနေရာက ဘိုင်ယန်မြူးနစ်နဲ့ ၈ မှတ်အထိ ကွာဟသွားခဲ့ပြီဖြစ်ပါတယ်။ အိုတာမန်ဒီနဲ့ ရော်နယ် အာရာအူဟိုတို့ ၂ ဦးစလုံးရဲ့ သွင်းဂိုးဟာ ငြင်းပယ်ခံခဲ့ရတာကြောင့် ဂိုးမရှိ သရေကျခဲ့တာဖြစ်ပြီး အုပ်စု ဒုတိယနေရာအတွက် တိုက်ပွဲကတော့ နောက်ဆုံးပွဲစဉ်အထိ ဆက်လက်ပြင်းထန်လာတော့မှာဖြစ်ပါတယ်။
ဘာစီလိုနာဟာ ယခုရာသီကို ခက်ခဲစွာ စတင်ခဲ့ရပြီး လက်ရှိ လာလီဂါအမှတ်ပေးဇယားမှာ အဆင့် ၇ နေရာမှာသာ ရပ်တည်နေတာဖြစ်ပေမယ့် နိုင်ငံတကာပွဲစဉ်အားလပ်ရက်အတွင်း ဇာဗီကို နည်းပြသစ်အဖြစ် ခန့်အပ်မှုက အသင်းက အခြေအနေတွေက အပေါင်းလက္ခဏာဘက် ပိုရောက်လာမယ်လို့ ယူဆခဲ့ကြတာဖြစ်ပါတယ်။ ဇာဗီလက်ထက် ဘာစီလိုနာအသင်းဟာ ပြီးခဲ့တဲ့အပတ်က အက်စ်ပန်ညိုအသင်းကို မန်းဖစ် ဒီပိုင်းရဲ့ အငြင်းပွားဖွယ်သွင်းဂိုးနဲ့အတူ ၁-၀ နဲ့ အနိုင်ရရှိခဲ့တာဖြစ်ပြီး အင်္ဂါနေ့ည ဘင်ဖီကာအသင်းနဲ့ကစားမယ့် ချန်ပီယံလိဂ်ပွဲစဉ်မှာလည်း ရလဒ်ကောင်းတစ်ခု ရယူနိုင်လိမ့်မယ်လို့ မျှော်မှန်းခြင်းခံခဲ့ရပေမယ့် သရေ ၁ မှတ်စီသာ ခွဲယူနိုင်ခဲ့တာဖြစ်ပါတယ်။
"အရမ်းကောင်းတဲ့ပွဲတစ်ပွဲ ဖြစ်ခဲ့ပါတယ်။ ကျွန်တော်တို့သာ ဂိုးသွင်းခဲ့မယ်ဆိုရင် အနည်းဆုံးတော့ အဲဒါက အရမ်းကောင်းတဲ့ ပွဲစဉ်တစ်ပွဲ ဖြစ်ခဲ့ပါလိမ့်မယ်။ ဘာလို့လဲဆိုတော့ တကယ်ကောင်းတဲ့ ပွဲဖြစ်ခဲ့လို့ပါ။ ကျွန်တော်တို့ အရမ်းသေးငယ်တယ်လို့ သိထားခဲ့တဲ့ ၁ မှတ်ပဲ ရခဲ့တယ်။ ဒါပေမယ့် အကောင်းမြင်စိတ်နဲ့ ကြည့်ရင် ကျွန်တော်တို့ တစ်ပွဲ ကစားဖို့ ကျန်သေးတယ်။ ကျွန်တော်တို့ မြူးနစ်ကို သွားပြီး အနိုင်ကစားရပါမယ်"
"ကျွန်တော်တို့ အရမ်းကောင်းကောင်း ကစားနိုင်ခဲ့တယ်လို့ ထင်ပါတယ်။ သူတို့တွေ ဘယ်လိုကစားရမယ်ဆိုတာ သိနေပါတယ်။ ကျွန်တော်တို့ ဂိုးတွေပဲ ပျောက်ဆုံးနေခဲ့တာပါ။ ၂ ပွဲမှာ ကျွန်တော်တို့ တစ်ဂိုးပဲရခဲ့ပြီး ရခဲ့တဲ့ဂိုးကလည်း ပင်နယ်တီ ဖြစ်ခဲ့ပါတယ်။ ကျွန်တော်တို့ ပိုပြီး အကျိုးသက်ရောက်မှုရှိရှိ ကစားရပါမယ်။ ကျွန်တော်တို့က ဘာဆာဖြစ်ပြီး မြူးနစ်မှာတင်မကဘဲ ဘယ်လိုနေရာမှာမဆို အနိုင်ယူသွားမှာပါ။ ကျွန်တော်တို့ ဂိုးမရှိသရေကျခဲ့ပေမယ့်လည်း အရမ်းကောင်းတဲ့ပွဲတစ်ပွဲကို ကစားခဲ့ပါတယ်။ ကျွန်တော့် ကစားသမားတွေရဲ့ ခံယူချက်နဲ့ပတ်သက်ပြီး အရမ်းကို စိတ်ကျေနပ်မိပါတယ်"လို့ ဇာဗီက ပွဲပြီးသတင်းစာရှင်းလင်းပွဲမှာ ပြောကြားသွားခဲ့ပါတယ်။