ဘတ်စ်ကားပေါ်မှာ ယာဥ်မောင်းအပါအဝင် လူ ၅၂ ဦး လိုက်ပါလာခဲ့တာ ဖြစ်ပါတယ်

ဘူလ်ဂေးရီးယားနိုင်ငံမှာ ဘတ်စ်ကားတစ်စီး အဝေးပြေးလမ်းမပေါ် မီးလောင်ခဲ့ရာ ကလေးငယ် ၁၂ ဦး အပါအဝင် အနည်းဆုံး လူ ၄၆ ဦး သေဆုံးခဲ့ကြောင်း အစိုးရတာဝန်ရှိသူတွေက ပြောပါတယ်။

ဘူလ်ဂေးရီးယားမြို့တော် ဆိုဖီယာမြို့ရဲ့ အနောက်ဘက် ၂၈ မိုင်အကွာရှိ Bosnek ကျေးရွာအနီး အ‌‌ဝေးပြေးလမ်းမပေါ်မှာ ဒေသစံတော်ချိန် ယနေ့ (နိုဝင်ဘာ ၂၃ ရက်) မနက် ၂ နာရီခန့်က ဘတ်စ်ကားမတော်တဆမှု ဖြစ်ပွားခဲ့ကြောင်း သိရပါတယ်။ အဆိုပါ ဘတ်စ်ကားဟာ မြောက်မက်ဆီဒိုးနီးယားနိုင်ငံမှာ မှတ်ပုံတင်ထားတာဖြစ်ပြီး အဓိကအားဖြင့် ထိုနိုင်ငံမှ ခရီးသည်တွေကို သယ်ယူပို့ဆောင်ပေးနေခဲ့တယ်လို့ ဆိုပါတယ်။



(မီးလောင်ကျွမ်းထားသည့် ဘတ်စ်ကား) (Photo: Reuters)

ဘတ်စ်ကားတိုက်မှုနဲ့ မီးလောင်မှုဖြစ်ရတဲ့ အကြောင်းရင်းကို စုံစမ်းစစ်ဆေးနေကြောင်း တာဝန်ရှိသူတွေက ထုတ်ပြန်ပါတယ်။ ဘတ်စ်ကားဟာ မီးလောင်ပြီးမှ လမ်းအကာအရံတွေကို တိုက်မိခဲ့တယ် သို့မဟုတ် လမ်းအကာအရံတွေကို ဝင်တိုက်မိပြီးနောက် မီးလောင်ခဲ့တယ်ဆိုတာ အတိအကျ မသိရသေးဘူးလို့ ဘူလ်ဂေးရီးယား ပြည်ထဲရေးဝန်ကြီးဌာန တာဝန်ရှိသူက ဆိုပါတယ်။

ဘတ်စ်ကားမတော်တဆမှုအတွင်း မီးလောင်ဒဏ်ရာများနဲ့အတူ အသက်ရှင်ကျန်သူ ၇ ဦးကို ဆိုဖီယာမြို့ရှိ ဆေးရုံသို့ ပို့ဆောင်ထားကြောင်း အစောပိုင်း သတင်းတွေက ဖော်ပြခဲ့ပါတယ်။ အဆိုပါ ဘတ်စ်ကားပေါ်မှာ ယာဥ်မောင်းအပါအဝင် လူ ၅၂ ဦး လိုက်ပါလာခဲ့ကြောင်း ဘူလ်ဂေးရီးယား ရဲတပ်ဖွဲ့အကြီးအကဲ Stanimir Stanev က ဆိုပါတယ်။

(မြောက်မက်ဆီဒိုးနီးယား၊ ဘူလ်ဂေးရီးယားနဲ့ တူရကီ ကုန်းမြေဆက်စပ်နေမှု) (Map: BBC)

သေဆုံးသူအများစုနဲ့ ယာဥ်မောင်းတို့ဟာ မြောက်မက်ဆီဒိုးနီးယားမှဖြစ်ကြောင်း ထိုနိုင်ငံရဲ့ သရုံးက BTV သတင်းဌာနကို အတည်ပြုခဲ့ပါတယ်။ ယခုဖြစ်ရပ်ဟာ ကြီးမားတဲ့ အဖြစ်ဆိုးတစ်ခုလို့ ရဲတပ်ဖွဲ့အကြီးအကဲက ဆိုပါတယ်။ "ဒီအဖြစ်ဆိုးကနေ သင်ခန်းစာတွေယူကြပြီး အနာဂတ်မှာ ဒီလို မတော်တဆမှုတွေကို တားဆီးနိုင်ဖို့ မျှော်လင့်ကြပါစို့" လို့ Stanimir Stanev က ပြောပါတယ်။

မက်ဆီဒိုးနီးယား နိုင်ငံခြားရေးဝန်ကြီး Bujar Osmani ရဲ့ ပြောကြားမှုအရ မီးလောင်ခဲ့တဲ့ အ‌ဝေးပြေးဘတ်စ်ကားဟာ သီတင်းတစ်ပတ်ကြာ အားလပ်ရပ်ခရီးစဥ်အဖြစ် တူရကီနိုင်ငံ အစ္စတန်ဘူလ်မြို့သို့ သွားရောက်ခဲ့ပြီးနောက် ဘူလ်ဂေးရီးယားမှတစ်ဆင့် မက်ဆီဒိုးနီးယားမြို့တော် Skopje မြို့သို့ ပြန်လာခဲ့ခြင်းဖြစ်ကြောင်း သိရပါတယ်။



ဆက်စပ်အကြောင်းအရာများ

Share

က္က