COVID-19 အဆုတ်ရောင်ရောဂါ ဗိုင်းရပ်စ်အသစ် ကူးစက်ပျံ့နှံ့မှုကို ထိန်းချုပ်ရန်အတွက် တရုတ်အလယ်ပိုင်း ဟူဘေးပြည်နယ်အတွင်း ယာဥ်အသွားအလာများ ပိတ်ပင်တားမြစ်ထားမယ်လို့ ပြည်နယ်အစိုးရက ဖေဖေါ်ဝါရီ ၁၆ ရက်မှာ ပြောပါတယ်။
ပြည်နယ်အတွင်း နေထိုင်သူအားလုံးကို ပုံမှန် ကျန်းမာရေးစစ်ဆေးမှုတွေ လုပ်ဆောင်သွားမှာပါ
(ဝူဟန်မြို့မှ ရှင်းလင်းနေသည့် လမ်းမတစ်နေရာ) (Photo: Reuters)
ဟူဘေးပြည်နယ်အစိုးရက ထုတ်ပြန်မှုအရ ရဲတပ်ဖွဲ့ကားများ၊ အရေးပေါ်လူနာတင်ကားများ၊ အခြေခံလိုအပ်ချက် ကုန်ပစ္စည်းတင်ကားများ သို့မဟုတ် အများပြည်သူဝန်ဆောင်မှုနဲ့ ပတ်သက်တဲ့ကားများမှလွဲပြီး ကျန်ယာဥ်အသွားအလာတွေကို ပိတ်ပင်ထားမှာဖြစ်ပါတယ်။ ဒါ့အပြင် ပြည်နယ်တာဝန်ရှိသူတွေက ပြည်နယ်အတွင်း နေထိုင်သူအားလုံးကို ပုံမှန်ကျန်းမာရေးစစ်ဆေးမှုတွေ လုပ်ဆောင်သွားမယ်လို့ Reuters သတင်းမှာ ဖော်ပြပါတယ်။
(ဝူဟန်မြို့မှာ ပိုးသတ်ဆေးဖြန်းနေမှု) (Photo: AFP)
ဟူဘေးပြည်နယ်မှာ တစ်အိမ်ထောင်လျှင် လူတစ်ဦးသာ သုံးရက်တစ်ကြိမ် အစားအစာနဲ့ အခြေခံလိုအပ်တဲ့ အသုံးအဆောင်များ ဝယ်ယူရန် နေအိမ်အပြင်ထွက်ခွင့်ပေးထားကြောင်း သိရပါတယ်။ ထိုပြည်နယ်မှာ COVID-19 ဗိုင်းရပ်စ်ကူးစက်မှု အများဆုံးဖြစ်ပွားနေပြီး ပြည်နယ်မြို့တော် ဝူဟန်မြို့မှာ ဗိုင်းရပ်စ်ကို စတင်တွေ့ရှိခဲ့တာလည်း ဖြစ်ပါတယ်။
တရုတ်အစိုးရက နိုင်ငံအတွင်း COVID-19 ဗိုင်းရပ်စ်ကူးစက်မှုနှုန်း သုံးရက်ဆက်တိုက် လျော့ကျသွားခဲ့ကြောင်း ဖေဖေါ်ဝါရီ ၁၆ ရက်မှာ ကြေညာခဲ့ပါတယ်။ ထိုအတောအတွင်း COVID-19 ဗိုင်းရပ်စ်ကူးစက်မှု မည်သို့ဆက်ဖြစ်နေမည်ကို မခန့်မှန်းနိုင်ကြောင်း ကမ္ဘာ့ကျန်းမာရေးအဖွဲ့အစည်း (World Health Organization - WHO) အကြီးအကဲက သတိပေးခဲ့ကြောင်းလည်း သိရပါတယ်။
(ရှင်းလင်းနေသည့် ဟူဘေးပြည်နယ် Xiaogan မြို့မှ လမ်းမတစ်ခု) (Photo: SipaPhoto)
ယမန်နှစ် ဒီဇင်ဘာလကုန်ပိုင်းက ဝူဟန်မြို့မှာ စတင်တွေ့ရှိခဲ့ရတဲ့ COVID-19 အဆုတ်ရောင်ရောဂါ ဗိုင်းရပ်စ်အသစ်ကြောင့် ယနေ့ (ဖေဖေါ်ဝါရီ ၁၇ ရက်) မနက်ပိုင်းအထိ စာရင်းတွေအရ တရုတ်ပြည်မကြီးမှာ ၁,၇၆၅ ဦးနဲ့ ဟောင်ကောင်၊ ထိုင်ဝမ်၊ ဂျပန်၊ ဖိလစ်ပိုင်၊ ပြင်သစ်တို့မှာ ၁ ဦးစီ သေဆုံးခဲ့ပြီး စုစုပေါင်း သေဆုံးသူအရေအတွက် ၁,၇၇၀ ဦးအထိ ရှိလာပါတယ်။
ဖေဖေါ်ဝါရီ ၁၆ ရက် ညပိုင်းအထိ တရုတ်ပြည်မကြီး အပါအဝင် ကမ္ဘာတစ်ဝှမ်းမှာ အဆိုပါဗိုင်းရပ်စ် ကူးစက်ခံရသူ စုစုပေါင်း ၇၁,၁၇၁ ဦးအထိ မြင့်တက်လာပြီး ဆေးကုသမှုဖြင့် ပြန်လည်သက်သာသွားတဲ့ ဗိုင်းရပ်စ်ကူးစက်ခံလူနာ ၉,၈၇၁ ဦးရှိကြောင်းလည်း သိရပါတယ်။ COVID-19 အဆုတ်ရောင်ရောဂါ ဗိုင်းရပ်စ်အသစ် ကူးစက်ပျံ့နှံ့နေမှုကို ကမ္ဘာလုံးဆိုင်ရာ အများပြည်သူ ကျန်းမာရေး အရေးပေါ်အခြေအနေအဖြစ် WHO က ဇန်နဝါရီ ၃၀ ရက်နေ့မှာ သတ်မှတ်ကြေညာထားပြီး ကမ္ဘာတစ်ဝှမ်း နိုင်ငံအသီးသီးက ဗိုင်းရပ်စ်နဲ့ပတ်သက်ပြီး စိုးရိမ်ပူပန်မှုများရှိနေပါတယ်။