ထွန်းထွန်းကတော့ ဒါရိုက်တာ ညိုမင်းလွင်နဲ့ ဇာတ်ကားတွေ မရိုက်ဖြစ်တာ ကြာပြီလို့ ဆိုပါတယ်။
Photo: Tun Tun
သရုပ်ဆောင် ထွန်းထွန်းကတော့ ဒါရိုက်တာ ညိုမင်းလွင်ရိုက်ကူးတဲ့ “ယောက္ခမ တစ္ဆေ” ရုပ်ရှင်ကားကြီးမှာ ပါဝင်သရုပ်ဆောင်သွားမယ်လို့ သိရပါတယ်။ ဒါရိုက်တာညိုမင်းလွင်နဲ့ ဇာတ်ကားအတူတူမရိုက်တာလည်း ကြာပြီလို့ ထွန်းထွန်းက ပြောပါတယ်။
"သတင်းကောင်းလေး လာပါပြီ။ ညကျောင်းရုပ်ရှင်ထုတ်လုပ်ရေးရဲ့ ဒါရိုက်တာညိုမင်းလွင် ရိုက်ကူးမယ့် " ယောက္ခမတစ္ဆေ" ဆိုတဲ့ ရုပ်ရှင်ဇာတ်ကားမှာ အဓိကဇာတ်ဆောင်အဖြစ် ပါဝင်မည် ဖြစ်ပါတယ်ဗျာ။ ဗီဒီယို တခေတ်မှာ အလုပ်တွေအတူတူလက်တွဲခဲ့တဲ့ ကိုညိုနဲ့အတူတူ ပြန်ပြီး ပူးပေါင်းရမှာဖြစ်လို့ ရိုက်ကူးဖို့ အတွက် မစောင့်နိုင်အောင်ပါပဲ။ ကဲ #WLTTE အပေါင်း သူတော်ကောင်းတို့ရေ KKTT ကိုအားပေးကြပါဦး" ဆိုပြီးတော့ မတ်လ ၇ ရက်နေ့ ည ၈ နာရီကျော်က သူ့ရဲ့ ဖေ့စ်ဘွတ်မှာ ရေးသားခဲ့ပါတယ်။
“ယောက္ခမ တစ္ဆေ” ဆိုတဲ့ ရုပ်ရှင်ဇာတ်ကားမှာတော့ ထွန်းထွန်းနဲ့ အတူ စိုးမြတ်သူဇာ၊ သင်ဇာဝင့်ကျော်နဲ့ လှနုထွန်းတို့လည်း ပါဝင်လာမယ်လို့ သိရပါတယ်။ ထွန်းထွန်း၊ ဒါရိုက်တာ ညိုမင်းလွင် နဲ့ သင်ဇာဝင့်ကျော်တို့ဟာ "လူသားများကိုခြောက်လှန့်ရန်တစ္ဆေတစ်ကောင်အလိုရှိသည်" ဆိုတဲ့ ဇာတ်ကားမှာလည်း ဆုံတွေ့ခဲ့ကြဖူးတယ်လို့ သိရပါတယ်။ “ယောက္ခမ တစ္ဆေ” ရုပ်ရှင်အတွက် နောက်ထပ် ဇာတ်ကောင်တွေ ကျန်ရှိနေသေးတာဖြစ်ပြီး ဇာတ်ညွှန်းပြင်ဆင်မှုတွေလည်း အပြီးသတ်တော့မယ်လို့ ဒါရိုက်တာ ညိုမင်းလွင်က သူ့ရဲ့ ဖေ့စ်ဘွတ်စာမျက်နှာမှာ ရေးသားခဲ့ပါတယ်။
Photo: Tun Tun
ထွန်းထွန်းကိုတော့ Examplez ဆိုတဲ့ Rapper အဆိုတော်အဖွဲ့ကနေတဆင့် ပရိသတ်တွေ စတင်အားပေးခဲ့တာဖြစ်ပါတယ်။ လက်ရှိမှာတော့ သူဟာ ဂီတအလုပ်တွေထက် သရုပ်ဆောင်အလုပ်ကို ပိုပြီးတော့ အာရုံစိုက်နေတာကို တွေ့ရပါတယ်။ ဂီတဘက်မှာလည်း အောင်မြင်မှုများစွာရရှိခဲ့သူဖြစ်သလို သရုပ်ဆောင်ဘက်မှာလည်း ‘’အုတ်ကြားမြက်ပေါက်’’ ရုပ်ရှင်ဇာတ်ကားကြီးနဲ့ ၂၀၁၆ ခုနှစ်အတွက် အကောင်းဆုံး အမျိုးသားဇာတ်ဆောင်ဆုကို ထိုက်ထိုက်တန်တန် ရရှိခဲ့တာ ဖြစ်ပါတယ်။