Nestron ရဲ့ စမတ်အိမ်ငယ်ဒီဇိုင်းတွေထဲမှာ ဒီတစ်ခေါက် C2X မော်ဒယ်က အကြီးဆုံးလို့ ပြောနိုင်ပါတယ်။

စင်ကာပူဆောက်လုပ်ရေးကုမ္ပဏီ Nestron ဟာ နည်းပညာမြင့် စမတ်အိမ်ငယ်တစ်မျိုးကို မိတ်ဆက်ပြသလိုက်ပါတယ်။

Nestron ဟာ ဆန်းသစ်တီထွင်မှုရှိတဲ့ အိမ်ငယ်လေးတွေ တည်ဆောက်ရင်း နာမည်ကြီးတဲ့ စင်ကာပူကုမ္ပဏီတစ်ခုဖြစ်ပြီး ဒီတစ်ခေါက်မိတ်ဆက်တဲ့ စမတ်အိမ်လေးကို Cube Two X လို့ နာမည်ပေးထားတာပါ။ Cube Two X ဟာ Nestron ရဲ့ အကျော်ကြားဆုံး unit တစ်ခုဖြစ်တဲ့ မူလဗားရှင်း Cube Two ကို အဆင့်မြှင့်ထားတဲ့ မော်ဒယ်သစ်လည်း ဖြစ်ပါတယ်. 



စတူဒီယိုစတိုင် အိမ်ခန်းငယ်လေးဖြစ်ပေမယ့် ဒီဇိုင်းနဲ့ ဖွဲ့စည်းမှုဟာ မြင်နေကျ အဆောက်အဦပုံစံနဲ့ လုံးလုံးလျားလျားကွဲပြားနေပါတယ်။ အရင် Cube Two (C2) ဟာ စတုရန်းပေ ၂၆၃ ပေ ရှိပြီး Cube Two X (C2X) မော်ဒယ်မှာ စတုရန်းပေ ၃၇၇ ပေနီးပါးအထိ တိုးချဲ့လာပါတယ်။ Nestron ရဲ့ စမတ်အိမ်ငယ်ဒီဇိုင်းတွေထဲမှာ ဒီတစ်ခေါက် C2X မော်ဒယ်က အကြီးဆုံးလို့ ပြောနိုင်ပါတယ်။ 



တခြား Cube Series စမတ်အိမ်တွေအတိုင်း C2X ဒီဇိုင်းဟာ သိပ္ပံစိတ်ကူးယဉ်ဇာတ်လမ်းတွေနဲ့ အနာဂါတ်ခေတ်ရှေ့ပြေး အာကာသယာဉ်အစိတ်အပိုင်းတွေကနေ မှီးထားတာ ဖြစ်တယ်လို့ ကုမ္ပဏီရဲ့ မားကတ်တင်းဌာနမှ Choco Toh က ဆိုပါတယ်။ AI နည်းပညာသုံး C2X စမတ်အိမ်တွေမှာ အရင်မော်ဒယ်နဲ့ မတူဘဲ ထူးခြားတာက တစ်ယောက်အိပ်ခန်းနဲ့ နောက်တစ်ခုက နှစ်ယောက်အိပ်ခန်းအတွက်ဆိုပြီး Floor Plan option ဒီဇိုင်းနှစ်မျိုး ပါလာတာပါ။ 

တစ်ယောက်အိမ်ခန်း Unit မှာ လူ ၃ ယောက်အထိ နေနိုင်ပြီး နှစ်ယောက်အိပ်ခန်းပါတဲ့ C2X ဒီဇိုင်းမှာ လူ ၄ ဦးအထိ နေသာမယ်လို့ ဆိုပါတယ်။ ဒီ Layout ဗားရှင်း နှစ်မျိုးစလုံးမှာ လျှောက်လမ်း , ဧည့်ခန်း ၊ မီးဖိုချောင် ၊ ထမင်းစားခန်း ၊ ရေချိုးခန်းနဲ့ အနည်းဆုံးအိပ်ခန်းတစ်ခန်းပါရှိမှာပါ။ အိမ်သေးသေးမှာ နေရသူတွေ စိတ်မွန်းကြပ်မနေစေဖို့ ဧရာမပြတင်းပေါက်ကြီးတွေလည်း တပ်ဆင်ပေးထားပါတယ်။ 

တစ်ယောက်နေ One-Bedroom Layout မှာ ကောင်းကင်ကို မြင်နိုင်မယ့် Skylight အပိုတစ်ခုနဲ့ နှစ်ဖက်ဖွင့်ရေခဲသေတ္တာတစ်ခု ပါရှိပြီး Two-Bedroom C2X မှာ Single-Door ရေခဲသေတ္တာထည့်ပေးထားတယ်လို့ ဆိုပါတယ်။ စမတ်အိမ်ဖြစ်တဲ့အတိုင်း Toilet နဲ့ မှန်တွေကို အသံနဲ့ အထိအတွေ့သိ Units တွေအဖြစ် ပုံစံပြောင်းထားပြီး အိမ်ရဲ့ လုပ်ဆောင်ချက်တွေ ထိန်းချုပ်တာ ၊ personal calendar ဇယားစစ်ဆေးတာတွေ လုပ်ဆောင်နိုင်မှာပါ။ 

စမတ်နည်းပညာမြင့် ပရိဘောဂတွေအပြင် Nestron ဟာ Canny လို့ ခေါ်တဲ့ AI Assistant တစ်မျိုးလည်း ဖန်တီးထားပါတယ်။ ဒီ AI System က ပိုင်ရှင်အတွက် မနက်ဖက် ကော်ဖီဖျော်ပေးတာမျိုး လုပ်ပေးနိုင်ပါတယ်။ အိမ်တွင်း လျှပ်စစ်ဓါတ်အားသုံးစွဲမှုကို လျှော့ချဖို့ ဗီရိုတွေထဲနဲ့ အိပ်ရာကုတင်တွေအောက်မှာ လှုပ်ရှားမှုသိအာရုံခံစနစ်သုံး မီးလုံးတွေ တပ်ဆင်ထားပါတယ်။ 

Photo: newatlas


C2X မော်ဒယ်တွေကို Nestron အနေနဲ့ ထုတ်လုပ်မှု စတင်နေပြီ ဖြစ်ပြီး နောက်နှစ်ဆန်းပိုင်းလောက်မှာ ဈေးကွက်ထဲ တင်ဖို့ ရှိပါတယ်။ ဖောက်သည်တွေဆီကလည်း Cube Two အိမ်တွေ အော်ဒါမှာယူဖို့ စုံစမ်းမှုတွေ အများအပြားရရှိထားတယ်လို့လည်း Toh က ပြောပါတယ်။ Nestron ရဲ့ ဖောက်သည် ၇၀% ကျော်ဟာ အမေရိကန်က ဖြစ်ပြီး ယူကေဈေးကွက်ထဲလည်း တင်သွင်းမှုတွေ လုပ်ဆောင်နေပြီလို့ ဆိုပါတယ်။ 

Covid -19 ကပ်ရောဂါအတွင်းမှာ Nestron အနေနဲ့ အောင်မြင်မှုတွေ ရရှိထားပြီး ကုမ္ပဏီဝက်ဘ်ဆိုက်ထဲ အိမ်အကြောင်း မေးမြန်းစုံစမ်းမှုတွေ တဟုန်းထိုးမြင့်တက်လာနေတယ်လို့လည်း ဆိုပါတယ်။ Cube Two (C2) အိမ်တွေကို ဒေါ်လာ ၅၂၀၀၀ (မြန်မာငွေ သိန်း ၇၅၀ ကျော်) ဈေးနဲ့ ရောင်းချခဲ့ပြီး အသစ်ထွက်မယ့် Cube Two X ကိုတော့ ဒေါ်လာ ၉၈၀၀၀ (မြန်မာငွေ သိန်း ၁၄၀၀ကျော် ) ဈေးနဲ့ ရောင်းချသွားမှာ ဖြစ်ပါတယ်။ 


ဆက်စပ်အကြောင်းအရာများ

Share

က္က