ဒီကနေ့ ဖေဖော်ဝါရီလ (၂၀)ရက်နေ့ မနက်ပိုင်းက လမ်းမတော် ၊ သံဈေးမီးလောင်မှုအတွင်းမှာတော့ မီးခိုးမွှန်ပြီး အနည်းငယ်ထိခိုက်ဒဏ်ရာရရှိသူ(၁၅)ဦးရှိပြီး ရန်ကုန်ဆေးရုံကြီးမှာ ဆေးကုသမှုခံယူနေကာ အားလုံးဘေးကင်းစိတ်ချရတဲ့ အနေအထားမှာရှိတယ်လို့ မြန်မာနိုင်ငံမီးသတ်ဦးစီးဌာနက သတင်းထုတ်ပြန်ခဲ့ပါတယ်။ ဒဏ်ရာရရှိတဲ့သူတွေမှာ အမျိုးသား(၉)ဦး၊ အမျိုးသမီး (၄)ဦးနဲ့ ကလေး(၂)ဦးတို့ဖြစ်တယ်လို့ သိရပါတယ်။ မီးလောင်မှုဖြစ်ပွားခဲ့တဲ့ ဈေးအပေါ်ထပ် ကွန်ဒိုတိုက်ခန်းတွေအတွင်းမှာ ပိတ်မိနေတဲ့ သက်ကြီးရွယ်အိုတွေ၊ အမျိုးသမီးတွေနဲ့ ကလေးသူငယ်တွေအပါအဝင် အားလုံး(၈၅)ဦးကို အထပ်မြင့်အဆောက်အဦ (၁၀)လွှာကနေကယ်ထုတ်ခဲ့ရပြီး အဲဒီထဲကမှ (၁၅)ဦး ဒဏ်ရာရရှိခဲ့တာလည်းဖြစ်ပါတယ်။ 

လက်ရှိအချိန်ထိ မီးစတင်လောင်ကျွမ်းရတဲ့ အကြောင်းအရင်းနဲ့ ဆုံးရှုံးမှုတန်ဖိုးအတိအကျကိုတော့ ထုတ်ပြန်ကြေညာထားခြင်းမရှိသေးပါဘူး။ လမ်းမတော်သံဈေးမီးလောင်မှုကိုတော့ အချိန်(၃)နာရီကျော်ကြာမီးငြှိမ်းသတ်ခဲ့ရပြီး အမြင့်ဆုံးအဆင့် level(5)အဆင့် သတ်မှတ်ပြီး မီးငြှိမ်းသတ်ခဲ့ရတာပါတယ်။