အာဆင်နယ်ဂန္တဝင်ကွင်းလယ်ကစားသမား ရောဘတ်စ်ပီးရက်စ်ဟာ မန်ချက်စတာယူနိုက်တက်ကွင်းလယ်ကြယ်ပွင့် ပေါ့ဂ်ဘာကို အသင်းမှာ ဆက်နေဖို့နဲ့ အိုးထရက်ဖို့ဒ်မှာ လုပ်ရမယ့်အလုပ်တွေ မပြီးပြတ်သေးကြောင်း သတိပေးပြောကြားခဲ့တယ်လို့ Metro ရဲ့ဖော်ပြချက်အရ သိရပါတယ်။
ပြင်သစ်လက်ရွေးစင်ကြယ်ပွင့် ပေါ့ဂ်ဘာဟာ ယခုနွေရာသီမှာ ရီးရဲမက်ဒရစ်အသင်းကို ပြောင်းရွှေ့ပြီး နည်းပြဇီဒန်းနဲ့ လက်တွဲအလုပ်လုပ်သွားမယ်လို့ သတင်းတွေအခိုင်အမာထွက်ပေါ်နေသူဖြစ်ပြီး တနင်္ဂနွေနေ့မှာ ပေါ့ဂ်ဘာက စိန်ခေါ်မှုအသစ်တွေရှာဖွေဖို့စိတ်ဝင်စားနေကြောင်း ပထမဆုံးအကြိမ် အတည်ပြုပြောကြားခဲ့ပါတယ်။
ဒါပေမယ့် အာဆင်နယ်ဂန္တဝင်ကစားသမား ရောဘတ်ပီးရက်စ်က ပေါ့ဂ်ဘာအနေနဲ့ ယူနိုက်တက်မှာပဲ ဆက်နေပြီး အသင်းကို ပရီးမီးယားလိဂ်ဆုဖလား ကိုင်မြှောက်နိုင်အောင် ကူညီပေးသင့်တယ်လို့ ယုံကြည်နေတာဖြစ်ပါတယ်။
“ပေါ့ဂ်ဘာနဲ့ပတ်သက်ပြီး ကျွန်တော့်အမြင်ကတော့ သူက အရမ်းကောင်းတဲ့ကစားသမားပါ။ ဒါပေမယ့် ပြီးခဲ့တဲ့ရာသီက အထူးသဖြင့် သူ့အတွက် အရမ်းခက်ခဲခဲ့တယ်ဆိုတာလည်း ကျွန်တော် သိပါတယ်”
“လူတွေအများကြီးက အပြောင်းအရွှေ့အကြောင်း ပြောနေကြတယ်။ ဘာလို့လဲဆိုတော့ မန်ချက်စတာယူနိုက်တက်က ငွေအများကြီးသုံးစွဲခဲ့လို့ပါ”
“အဲဒါတော့ သူ့အတွက် ကိုင်တွယ်ဖြေရှင်းဖို့ ခက်ခဲနေတာဖြစ်ကောင်းဖြစ်နိုင်ပါတယ်။ များသောအားဖြင့် အစပိုင်းမှာပေါ့။ ဒါပေမယ့် ကျွန်တော့်အတွက်ကတော့ သူ ယူနိုက်တက်မှာ ဆက်နေဖို့က အရေးအကြီးဆုံးပါပဲ”
“မန်ချက်စတာယူနိုက်တက်က ကမ္ဘာပေါ်က အကြီးမားဆုံးနဲ့ အကောင်းဆုံးအသင်းတွေထဲက တစ်သင်းပါ။ ပြီးတော့ သူ့အလုပ်ကလည်း မပြီးပြတ်သေးပါဘူး”
“အဲဒီအတွက်ကြောင့်လည်း ယူနိုက်တက်က သူ့ကို ခေါ်ယူဖို့ ငွေကြေးပမာဏကြီးကြီးမားမား သုံးစွဲခဲ့တာဖြစ်ပြီး ပေါလ်ကို သူတို့ အများကြီးယုံကြည်မှုရှိပါတယ်။ ဘာလို့လဲဆိုတော့ သူက သူတို့အသင်းအတွက် စစ်မှန်တဲ့ခေါင်းဆောင်တစ်ဦးဖြစ်လာနိုင်လို့ပါ”
“အသင်းတစ်သင်းက ခင်ဗျားအတွက် ငွေကြေးအများကြီးသုံးစွဲတယ်ဆိုရင် အဲဒါ ခင်ဗျားအပေါ်မှာ ယုံကြည်မှု ထားရှိထားလို့ပဲ”
“သူတို့တွေ ပေါလ်အပေါ်မှာ အများကြီးရင်းနှီးမြှုပ်နှံထားခဲ့တယ်။ အဲဒီတော့ သူ ယူနိုက်မှာ နေဖို့က အရမ်းအရေးကြီးတယ်လို့ ထင်ပါတယ်။ သူ့အနေနဲ့လည်း အသင်းက သိထားတဲ့ သူ လုပ်ပြနိုင်တဲ့အရာတွေကို အသင်းအတွက် လုပ်ဆောင်ပေးရမှာပါ”လို့ ပြောကြားခဲ့ကြောင်း Metro က ဖော်ပြခဲ့ပါတယ်။
Share