စက်တင်ဘာလ ၁၉ ရက်နေ့မှာကျရောက်တဲ့ အဆိုတော် ရွှေထူးရဲ့ မွေးနေ့မှာတော့ အလှူအတန်းတွေနဲ့ ဖြတ်သန်းသွားမယ်လို့ ရွှေမှုံရတီက ပြောပါတယ်။ ရွှေထူးရဲ့ ပြောင်းလဲမှုတွေကိုလည်း ပြောပြခဲ့ပြန်ပါသေးတယ်။

ဒီနေ့ စက်တင်ဘာလ ၁၉ ရက်နေ့ကတော့ အဆိုတော်ရွှေထူးရဲ့ မွေးနေ့ဖြစ်ပါတယ်။ သူ့ရဲ့ မွေးနေ့ အစီအစဉ်မှာ ဇနီးချောလေး ရွှေမှုံရတီက အလှူအတန်းတွေ အတူတူလုပ်သွားမယ်လို့ မီဒီယာ အင်တာဗျူးတွေမှာ ဖြေဆိုခဲ့ပါတယ်။

‘’ ကိုရွှေထူးမွေးနေ့ကိုတော့ သဲ တို့ အလှူလုပ်ဖို့ စီစဉ်ထားပါတယ်။ အလှူလုပ်မယ့်နေရာကတော့ ဝေးတယ်။ နှစ်တိုင်းကတော့ သဲမွေးနေ့ပဲဖြစ်ဖြစ်၊ သူ့မွေးနေ့ပဲဖြစ်ဖြစ် အလှူလုပ်ရင်းနဲ့ပဲ ဖြတ်သန်းဖြစ်တယ်။ ပြီးတော့ We Love တွေလည်း ပါမှာပေါ့။သဲကတော့ သူ့ကို အကောင်းဆုံးတွေပဲဖြစ်စေချင်တယ်။အကောင်းဆုံး အကောင်းဆုံး သူလိုချင်တာတွေ၊ သူဖြစ်ချင်တာတွေ ဖြစ်ပါစေလို့ သဲက ဆုတောင်းပေးပါတယ်။ ’’ လို့ သူကဆိုပါတယ်။

ရွှေထူးနဲ့ ရွှေမှုံရတီတို့ ဇနီးမောင်နှံဟာ အလှူအတန်းနဲ့ပတ်သက်ရင်လည်း လက်မနှေးတဲ့သူတွေဖြစ်ပါတယ်။ အလှူနဲ့ ပတ်သက်လာရင်လည်း ဝါသနာ တူကြတယ်လို့ ရွှေမှုံရတီက ပြောပါတယ်။

‘’ ဒါကတော့ ဗုဒ္ဓဘာသာတွေပဲဖြစ်ဖြစ်၊ ဘယ်သူတွေပဲဖြစ်ဖြစ် အကုန်လုံးက အလှူအတန်းဆို ဝါသနာပါကြတယ်လေနော်။ လိုအပ်တဲ့နေရာတွေမှာ လိုအပ်သလို လှူရတာဆိုတော့ သဲ ကိုယ်တိုင်လည်း ဝါသနာပါတယ်။ ကိုရွှေထူးကလည်း အရမ်းဝါသနာပါတယ်။ သဲတို့ အနေနဲ့ကတော့ အလှူအတန်းကို တက်နိုင်သလောက် အများကြီးလုပ်ဖြစ်အောင် ကြိုးစားမှာပါ’’ ဆိုပြီးတော့ စက်တင်ဘာလ ၁၈ ရက်နေ့က ဝိန့်စိန်ကြော်ငြာရိုက်ကွင်းပေါ်မှာ ဖြေဆိုခဲ့တာပါ။

Photo: Shwe Htoo

ရွှေထူး နဲ့ ရွှေမှုံရတီတို့ရဲ့ အိမ်ထောင်သက်တမ်းကလည်း ၁ နှစ်ပြည့်တော့မှာဖြစ်ပါတယ်။ ရွှေထူးတစ်ယောက် ဘာတွေပြောင်းလဲသွားပြီလဲ ဆိုတာကိုတော့ ပရိသတ်တွေ အသိဆုံးဖြစ်မယ်လို့ ရွှေမှုံရတီက ဆက်လက် ပြောပြလာပါတယ်။

Photo: Shwe Htoo

ရွှေထူး(Htoo Khant)နဲ့ ရွှေမှုန်ရတီ(Shwe Mhone Yati)တို့ ဟာ အောက်တိုဘာ(၃၀) ရက်နေ့နေပြည်တော် Park Royal hotel မှာ နှစ်ဦးသဘောတူ လက်မှတ်ရေးထိုးခဲ့ကြတာ ဖြစ်ပြီး နိုဝင်ဘာ(၉) ရက်နေ့မှာ မှော်ဘီမြို့နယ်မှာ ရှိတဲ့ အောင်ဇဗ္ဗူတောရကျောင်းမှာ မင်္ဂလာဦးဆွမ်းကျွေး အလှူပြုလုပ်ခဲ့ပါတယ်။ အဲဒီနောက် မင်္ဂလာညစာစားပွဲကိုတော့ နိုဝင်ဘာလ ၁၁ ရက်နေ့က ရန်ကုန်မြို့မှာရှိတဲ့ အင်းယားလိတ်ဟိုတယ် မှာ ကျင်းပပြုလုပ်ခဲ့တာဖြစ်ပါတယ်။