ဂရင်း၀ုဒ်ရဲ့ နာမည်ပါဂျာစီဟာ တပတ်အတွင်းရောင်းအားအကောင်းဆုံးဖြစ်ခဲ့ပြီး ဂီတာဖေးအသင်းသမိုင်းမှာ ဘယ်ကစားသမားထက်မဆို ပိုမိုများပြားခဲ့ပြီး စံချိန်သစ်တင်သွားခဲ့ပြီဖြစ်ပါတယ်။ အင်္ဂလန်သားက အသင်းအတွက် ပွဲကစားပြီး ခြေစွမ်းပြခွင့်တောင် မရသေးချိန်မှာပဲ ပရိသတ်တွေက ကြိတ်ကြိတ်တိုးအားပေးနေခဲ့တာပါ။
အင်္ဂလန်မှာ ဂရင်း၀ုဒ်ဘာတွေဖြစ်ခဲ့လဲဆိုတာကို သိသိနဲ့ ဂီတာဖေးပရိသတ်တွေက သူ့ကို သူရဲကောင်းတဦးလို ကြိုဆိုခဲ့ပြီး အခုလိုဝန်းရံပေးနေကြတာပါ။ ဂီတာဖေးအတွက်ရော၊ ကစားသမားအတွက်ပါ တကယ့်ကို သတင်းကောင်းတွေ ဆက်တိုက်ကြားနေရတာဖြစ်ပြီး ကွင်းတွင်းမှာ ခြေစွမ်းပြနိုင်ဖို့သာ လိုပါတော့တယ်။
သူ ခြေစွမ်းပါပြနိုင်ခဲ့ရင်တော့ အတိုင်းထက်အလွန်ပါပဲ။ ဒီတပတ်ကစားမယ့် အိုဆာဆူနာနဲ့ပွဲမှာ ဂရင်း၀ုဒ်တယောက် ပါဝင်ကစားပေးဖွယ်ရာရှိနေပါတယ်။ အသက် ၂၁ နှစ်အရွယ် အင်္ဂလန်တိုက်စစ်ကစားသမားက တမိနစ်တောင်မှ မကစားရသေးခင်မှာပဲ အသင်းအတွက် အကျိုးပြုနေခဲ့တာဖြစ်ပါတယ်။
ဂရင်း၀ုဒ်ရဲ့ ကစားသမားသစ်မိတ်ဆက်ပွဲနဲ့ လေ့ကျင့်ခန်းဆင်းမှုကိုလည်း ပရိသတ်အများအပြား တက်ရောက်အားပေးခဲ့ကြပါတယ်။ အချိန်တိုအတွင်းမှာပဲ ဂီတာဖေးက ဂရင်း၀ုဒ်ရဲ့ နေအိမ်လိုဖြစ်ခဲ့ပြီး သူ့အတွက် စိတ်ပိုင်းဆိုင်ရာအတွက် အများကြီး အကျိုးကျေးဇူးရှိခဲ့ပါတယ်။