ဂွမြို့နယ်နဲ့ မာန်အောင်ကျွန်းမှာရှိတဲ့ မပျက်စီးသေးဘဲ သဘာဝအတိုင်းတည်ရှိနေတဲ့ ကမ်းခြေတွေကို သဘာဝအခြေခံခရီးသွားလုပ်ငန်း အခြေပြုနေရာတွေအဖြစ် ပြောင်းလဲသင့်ပြီလို့ နိုင်ငံတော် အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်က ပြောကြားလိုက်ပါတယ်။

ဒေါ်အောင်ဆန်းစုကြည်က သံတွဲမြို့နယ် ငပလီကမ်းခြေမှာ ေဖေဖာ်ဝါရီလ ၂၂ ရက်နေ့က ပြုလုပ်ခဲ့တဲ့ ရခိုင်ပြည်နယ်ရင်းနှီးမြှုပ်နှံမှု ပြပွဲမှာ မိန့်ခွန်းပြောကြားစဉ် ထိုသို့ ထည့်သွင်းပြောကြားခဲ့တာပါ။

“အလားအလာကောင်းရှိတဲ့ အခြားလုပ်ငန်းတစ်ခုကတော့ ခရီးသွားလုပ်ငန်းဖြစ်ပါတယ်။ ဂွမြို့နယ်နှင့် မာန်အောင်ကျွန်းမှာရှိတဲ့ မပျက်စီးသေးဘဲ သဘာဝအတိုင်းတည်ရှိနေတဲ့ ကမ်းခြေများကလည်း သဘာဝအခြေခံခရီးသွားလုပ်ငန်း အခြေပြုနေရာတွေအဖြစ် ပြောင်းလဲရန် အချိန်အခါသင့်ပြီဖြစ်ပါတယ်” လို့ပြောကြားခဲ့ပါတယ်။

Photo- Myanmar State Counsellor Office

အခုလို ခရီးသွားလုပ်ငန်းတွေ မြှင့်တင်ခြင်းအားဖြင့် ရခိုင်မင်းတွေရဲ့ ကြွယ်ဝလှတဲ့ ယဉ်ကျေးမှုနှင့် အနုသုခုမဆိုင်ရာ ထွန်းကားခံ့ညားထည်ဝါမှု ပြယုဂ်ကို ပြင်ပကမ္ဘာမှာ ပိုမိုသိရှိနားလည်နိုင်မှာ ဖြစ်ပါတယ်လို့ ပြောကြားခဲ့ပါတယ်။

စီးပွားရေးဝန်းကျင်တစ်ခုဖြစ်လာဖို့ အိမ်ခြံမြေ၊ အခြေခံအဆောက်အဦ၊ ပညာရေး၊ ကျန်းမာရေးဝန်ဆောင်မှုလုပ်ငန်း၊ လျှပ်စစ်ဓာတ်အားထုတ်လုပ်ခြင်းနှင့် ဖြန့်ဖြူးခြင်း၊ အဝတ်အထည်နှင့် အထည်အလိပ်လုပ်ငန်း၊ စက်မှုလုပ်ငန်း၊ ရေလုပ်ငန်း၊ သစ်တောလုပ်ငန်း၊ မွေးမြူရေးနှင့် စိုက်ပျိုးရေး လုပ်ငန်းတွေကလည်း နိုင်ငံခြားရင်းနှီးမြှုပ်နှံသူများ အတွက် အလားအလာကောင်းတဲ့ ကဏ္ဍတွေ ဖြစ်တယ်လို့ ဒေါ်အောင်ဆန်းစုကြည်က ဆိုပါတယ်။

ရင်းနှီးမြှုပ်နှံမှု လုပ်ရာမှာ ထိခိုက်ပျက်စီးလွယ်တဲ့သဘာဝပတ်ဝန်းကျင်ကို ထပ်ပြီး ထိခိုက်မှုမရှိအောင် ကောင်းစွာ ကိုင်တွယ်နိုင်ဖို့ လိုပြီး ဒီရေတောနဲ့ သဘာဝအရင်းအမြစ် ဆုံးရှုံးစေတဲ့ တရားမဝင် ငါးဖမ်းလုပ်ငန်းတွေကို ရှေုာင်ကြည်နိုင်ဖို့ မျှော်လင့်မိပါကြောင်း နိုင်ငံတော်အတိုင်ပင်ခံပုဂ္ဂိုလ်က မိန့်ခွင်းမှာ ထည့်သွင်းပြောကြားခဲ့ပါတယ်။