ဂျပန်အစိုးရက ကိုရိုနာဗိုင်းရပ်စ် ကူးစက်ပျံ့နှံ့မှုကြောင့် ထုတ်ပြန်ထားခဲ့တဲ့ အရေးပေါ်အခြေအနေကို နိုင်ငံတစ်ဝှမ်း စီရင်စု ၄၇ ခုအနက် ၃၉ ခုမှာ ရုပ်သိမ်းလိုက်ပြီလို့ သိရပါတယ်။

(Photo: AFP/Getty Images)

ဂျပန်ရဲ့ ဗိုင်းရပ်စ်ကူးစက်မှုနှုန်းဟာ သိသာစွာ လျော့ကျသွားပြီဖြစ်ကြောင်းနဲ့ အများပြည်သူအနေနဲ့ သတိဝီရိယရှိကြရန်၊ mask တပ်ကြရန်နဲ့ ထိတွေ့မှုနည်းစေရန် ခပ်ခွာခွာနေရမယ့် လမ်းညွှန်ချက်ကို လိုက်နာကြရန် ဝန်ကြီးချုပ်ရှင်ဇိုအဘေးက တိုက်တွန်းပြောကြားပါတယ်။

(Photo: Koji Sasahara/AP)

"ဖြစ်နိုင်ရင် မေ ၃၁ ရက်မတိုင်ခင် တခြား နယ်မြေဒေသတွေမှာလည်း အရေးပေါ်အခြေအနေ ရုပ်သိမ်းချင်ပါတယ်" လို့ အဘေးက ပြောပါတယ်။ ဂျပန်အစိုးရဟာ Diamond Princess အပျော်စီးသင်္ဘောပေါ်မှာ အစုလိုက်အပြုံလိုက် ဗိုင်းရပ်စ်ကူးစက်မှုကို တုံ့ပြန်ဆောင်ရွက်မှုနဲ့ ပတ်သက်ပြီး အစောပိုင်းမှာ ဝေဖန်မှုတွေကြုံခဲ့ရပါတယ်။ သို့သော် ဂျပန်က အမေရိကန် သို့မဟုတ် ရုရှားတို့မှာ ဖြစ်ပွားနေသကဲ့သို့ ဗိုင်းရပ်စ်ကူးစက်မှု ဆိုးရွားတဲ့အခြေအနေကို ရှောင်လွှဲနိုင်ခဲ့တယ်လို့ ဆိုနိုင်ပါတယ်။

(Photo: Kyodo)

ဂျပန်နိုင်ငံမှာ COVID-19 လူနာတွေကို အမေရိကန်အခြေစိုက် ဆေးဝါးနဲ့ ဇီဝနည်းပညာကုမ္ပဏီ Gilead Sciences က ထုတ်လုပ်ထားတဲ့ စမ်းသပ်အဆင့် Remdesivir ဆေးဖြင့် ကုသရန် မေ ၇ ရက်နေ့က ခွင့်ပြုလိုက်ပါတယ်။ ထို့အတူ ဂျပန်ကုမ္ပဏီ Fujifilm Toyama Chemical က တုပ်ကွေးရောဂါအတွက် ထုတ်လုပ်ထားတဲ့ Avigan ဆေးကိုလည်း အစိုးရက COVID-19 လူနာ ၁၀၀ ကို ကုသရာမှာ တိုးတက်မှုရှိပါက ခွင့်ပြုပေးရန် ရည်ရွယ်ထားကြောင်း သိရပါတယ်။