ဟာဝိုင်အီကျွန်းစုရှိ Maui ကျွန်းပေါ်မှာ သီတင်းနှစ်ပတ်ကျော်ကြာ ပျောက်ဆုံးနေခဲ့တဲ့ ခြေလျင်ခရီးထွက်သူ အမျိုးသမီးတစ်ဦးကို အသက်ရှင်လျက် ပြန်ရှာတွေ့ခဲ့ကြကြောင်း သိရပါတယ်။

(အမန်ဒါကို မိသားစု၊ ချစ်သူ၊ သူငယ်ချင်းများနှင်အတူ တွေ့ရစဉ်) (Photo: Sarah Haynes)

နှစ်ပတ်ကျော်ကြာ ပျောက်ဆုံးနေခဲ့တဲ့ အမန်ဒါကို သောကြာနေ့ (မေ ၂၄ ရက်) မှာ ပြန်ရှာတွေ့ခဲ့ကြပါတယ်။ အမန်ဒါက ကယ်ဆယ်ရေး ရဟတ်ယာဉ်တစ်စီးကို လက်ဝှေ့ယမ်းပြခဲ့ရာမှ သူမကို တွေ့ရှိခဲ့ကြတာဖြစ်ပါတယ်။ ယောဂနည်းပြတစ်ဦးဖြစ်တဲ့ အမန်ဒါဟာ Maui ကျွန်းပေါ်မှာ အပျော်ခြေလျင်ခရီး လှည့်လည်သွားလာရင်း လမ်းပျောက်သွားပြီး ဒဏ်ရာရခဲ့တယ်လို့ သတင်းတွေက ပြောပါတယ်။

(အမန်ဒါကို ပြန်ရှာတွေ့ခဲ့သူ သုံးဦးနှင့် ပြန်ရှာတွေ့ခဲ့သည့် တောတွင်းနေရာ) (Photo: Javier Cantellops)

သူမကို ကယ်ဆယ်ခဲ့ပြီးနောက် ရိုက်ကူးထားတဲ့ ဓာတ်ပုံတွေမှာတော့ အမန်ဒါဟာ ညစ်ပတ်ပေကျံနေပြီး ဒဏ်ရာရအနည်းငယ်ရထားပေမဲ့ ပြုံးနေတာတွေ့ခဲ့ရပါတယ်။ ဒေသတွင်း ဆေးရုံတစ်ခုမှာ ရိုက်ကူးထားတဲ့ ဗီဒီယိုတစ်ခုအတွင်း အမန်ဒါရဲ့ ဖခင်ဖြစ်သူက သမီးဖြစ်သူကို ပြန်ရှာတွေ့စဉ်မှာ ကလေးတစ်ယောက်လို အော်ဟစ်ငိုကြွေးခဲ့တယ်လို့ ဖွင့်ဟပြောခဲ့ပါတယ်။

(အမန်ဒါနှင့် သူမ၏ဖခင်၊ အမန်ဒါနှင့် သူမ၏ချစ်သူ) (Photo: Amanda)

အမန်ဒါ ပျောက်ဆုံးသွားပြီးနောက် Facebook မှာလည်း သူမကို ရှာဖွေကယ်ဆယ်ရေးအတွက် Page တစ်ခုဖွင့်ထားခဲ့ပါတယ်။ အမန်ဒါရဲ့ကားနဲ့ မိုဘိုင်းဖုန်းကို Makawao သစ်တောကြိုးဝိုင်း ကားရပ်နားတဲ့နေရာမှာ တွေ့ခဲ့ရပြီးနောက် မိသားစုနဲ့ သူငယ်ချင်းတွေက သူမဟာ ခြေလျင်ခရီးသွာရင်း လမ်းပျောက်သွားခဲ့တယ်လို့ ယူဆခဲ့ကြတာဖြစ်ပါတယ်။

အမန်ဒါကို နောက်ဆုံး မြင်တွေ့လိုက်ရတဲ့ သူမရဲ့ချစ်သူကလည်း အမန်ဒါဟာ သစ်တောထဲမှာ ရှိနေခဲ့လိမ့်မယ်လို့ ခံစားရကြောင်း ပြောပါတယ်။ Maui ကျွန်းပေါ်မှာ အမန်ဒါ ပျောက်ဆုံးသွားမှု ၁၇ ရက်နီးပါးကြာပြီးနောက် မေ ၂၄ ရက်မှာတော့ ရှာဖွေရေးအဖွဲ့ဝင် သုံးဦးက သူမကို နက်ရှိုင်းတဲ့ လျှိုမြောင်တစ်ခုထဲမှာ တွေ့ခဲ့ကြတယ်လို့ BBC သတင်းမှာ ဖော်ပြထားပါတယ်။