ဖိလစ်ပိုင်တောင်ပိုင်း ပွဲတော်တစ်ခုရှိ လူအုပ်စုအတွင်း ဗုံးတစ်လုံးပေါက်ကွဲမှုဖြစ်ခဲ့ပြီး လူတစ်ဦးသေဆုံးကာ အခြား လူအများအပြား ဒဏ်ရာရခဲ့ပါတယ်။

Photo: Philippine Red Cross

အားပြင်းတဲ့ ဗုံးတစ်လုံးက အစ်ဆူလန်မြို့ရှိ ဒေသတွင်း ပွဲတော်တစ်ခု ကျင်းပရာနေရာရှိ ညဈေးတန်းတစ်ခုအနီးမှာ ပေါက်ကွဲခဲ့ရာ လူအများအပြား ကြောက်တန့်တကြား ထွက်ပြေးခဲ့ကြပါတယ်။

အိုင်အက်စ်ကိုထောက်ခံသည့် BIFF အဖွဲ့ဝင်များ (Photo: AFP)

ယခု ဗုံးခွဲတိုက်ခိုက်မှုကို ၎င်းတို့လုပ်ဆောင်ခဲ့ကြောင်း အိုင်အက်စ်အကြမ်းဖက်အဖွဲ့က ပြောပါတယ်။ ယခု ဗုံးပေါက်ကွဲမှုဖြစ်ပွားခဲ့တဲ့ ဖိလစ်ပိုင်တောင်ပိုင်းမှာ အစ္စလာမ်မစ်စစ်သွေးကြွတွေကို ဆယ်စုနှစ်များနဲ့ချီပြီး ပုန်ကုန်ထကြွနေခဲ့ကြောင်းလည်း သိရပါတယ်။

"အိုင်အက်စ်အုပ်စုနဲ့ အဆက်အသွယ်ရှိတဲ့ BIFF (Bangsamoro Islamic Freedom Fighters) အဖွဲ့က ဒီလိုတိုက်ခိုက်မှုတွေ အလုပ်ချင်ဆုံးဆိုတာ ထင်ရှားပါတယ်" လို့ ဖိလစ်ပိုင်စစ်တပ်မှ ဗိုလ်ကြီးအာဗင်အန်စီနက်စ်က ပြောပါတယ်။

ပေါက်ကွဲမှုဖြစ်ခဲ့တဲ့ နေရာအနီးတစ်ဝိုက်မှာ နောက်ထပ် ဗုံးနှစ်လုံးကိုလည်း ရှာဖွေတွေ့ရှိခဲ့ပြီး ဖယ်ရှားရှင်းလင်းခဲ့ကြောင်း အာဏာပိုင်တွေက ဆိုပါတယ်။

Photo: Philippine Red Cross

ယမန်နေ့က ဖြစ်ပွားခဲ့တဲ့ ဗုံးပေါက်ကွဲမှုအတွင်း လူတစ်ဦးသေဆုံးပြီး အခြား လူ ၃၆ ဦး ဒဏ်ရာရခဲ့ကြောင်း ဒေသဆိုင်ရာ အုပ်ချုပ်ရေးမှူးရုံးက သတင်းထုတ်ပြန်ပါတယ်။

သေဆုံးဒဏ်ရာရသူတွေရဲ့ အခြေအနေကိုတော့ ထုတ်ဖော်ပြောခဲ့ခြင်း မရှိပါဘူး။ အစ်ဆူလန်မြို့တည်ခြင်း ၆၁ နှစ်မြောက် အခမ်းအနား ကျင်းပနေစဉ်အတွင်း ဓာတ်ဆီဆိုင်တစ်ဆိုင်အနီးမှာ ဗုံးပေါက်ကွဲခဲ့တယ်လို့ ဒေသဆိုင်ရာ ရဲတပ်ဖွဲ့က ပြောပါတယ်။

ယခုဖြစ်ရပ်မတိုင်မီ တစ်လမပြည့်မီကလည်း အဆိုပါဒေသတွင်း ဘက်စီလန်ကျွန်းရှိ စစ်တပ်စစ်ဆေးရေးဂိတ်ကို ကားဗုံးခွဲတိုက်ခိုက်ခဲ့မှုကြောင့် လူ ၁၀ ဦး သေဆုံးခဲ့ကြောင်းသိရပါတယ်။

Photo: Philippine Red Cross

ဖိလစ်ပိုင်တောင်ပိုင်းမှာ မာရာဝီမြို့ကို ယမန်နှစ်အတွင်း အိုင်အက်စ်အကြမ်းဖက်အဖွဲ့ကို အားပေးထောက်ခံတဲ့ စစ်သွေးကြွတွေက သိမ်းပိုက်ခဲ့ပြီးနောက် သမ္မတဒူတာတေးက တောင်ပိုင်းဒေသတစ်ခုလုံးကို ယခုနှစ်ကုန်အထိ စစ်အုပ်ချုပ်ရေး သတ်မှတ်ပြဌာန်းထားခဲ့ပါတယ်။

ဖိလစ်ပိုင်တောင်ပိုင်းမှာ ဆယ်စုနှစ်များကြာပြီဖြစ်တဲ့ စစ်သွေးကြွတွေရဲ့ ပုန်ကန်ထကြွမှုအတွင်း လူဦးရေ ၁၀၀,၀၀၀ ကျော် သေဆုံးခဲ့ကြောင်း အစိုးရကထုတ်ပြန်ထားတဲ့ စာရင်းတွေအရ သိရှိရပါတယ်။