အိုင်းရစ်လေပြေဦးက ကွယ်လွန်သူ လူကြမ်းမင်းသား ဦးမင်းစိန်ရဲ့ သမီးကြီးအတွက် ပညာရေး ထောက်ပ့ံ့မှု ပေးသွားမယ်လို့ ဆိုပါတယ်. ဦးမင်းစိန်အတွက် ကုသိုလ်ရေးတွေလည်း လုပ်သွားဖို့ရှိတယ်လို့လည်း ဆက်လက်ပြောပြလာပါတယ်.
လူကြမ်းသရုပ်ဆောင် ဦးမင်းစိန်ရဲ့ ဈာပန ကိုတက်ရောက်လာတဲ့ သရုပ်ဆောင် အိုင်းရစ်လေပြေဦး က စိတ်မကောင်းဖြစ်တဲ့အကြောင်းတွေပြောပြလာပါတယ်. အခုလည်း ဦးမင်းစိန်ရဲ့ သမီးကြီးအတွက် ပညာရေးထောက်ပံ့သွားမယ်ဆိုတာကို Duwun Media ရဲ့ သီးသန့်အင်တာဗျူးမှာ ဖြေဆိုခဲ့ပါတယ်.
'' ကောျင်းပြီးတဲ့အထိ တာဝန်ယူပေးမယ်ပေါ့နော်. ဘာပဲပြောပြော အမှန်အတိုင်းပြောရရင် ဒီအချိန်မှာ သူတို့အပေါ် ကိုယ်က တာဝန်မကျေသလို ခံစားရတယ်. အဲ့ဒီတော့ သမီးလေး ကျောင်းပြီးတဲ့အထိ တာဝန်ယူမယ်လို့ ပြောထားပါတယ်'' ဆိုပြီးတော့ ဇန်နဝါရီ်လ ၇ ရက်နေ့က ဦးမင်းစိန်ရဲ့ ဈာပန မှာ ဖြေဆိုပေးခဲ့တာဖြစ်ပါတယ်.
'' ဦးမင်းစိန်က အိုင်းရင်းစ်အတွက်တော့ ဦးလေး အရင်းလိုမျိုးချစ်ရတဲ့ ဦးလေးတစ်ယောက်ပါ. ဇာတ်ကားရိုက်တဲ့ အချိန်တုန်းက အိုင်းရင်းစ် မြင်းပေါ်က ပြုတ်ကျဖူးတယ်. လမ်းမလျှောက်နိုင်တဲ့အချိန်မှာ ရှုတင်ရှိတဲ့နေရာအထိကို ချီပြီးတော့ လိုက်ပို့ပေးတဲ့ ကျေးဇူးရှိခဲ့ဖူးတယ်. ဒီကြားထဲမှာလည်း ဆုံရင် ဆုံသလို အိုင်းရင်းစ် တတ်နိုင်တဲ့ဘက်က ကူညီထောက်ပံ့ပေးပါတယ်'' လို့ သူကဆိုပါတယ်.
ဇန်နဝါရီလ ၅ ရက်နေ့ မနက်ပိုင်းမှာ ကွယ်လွန်ခဲ့တဲ့ ဦးမင်းစိန် အတွက် သရုပ်ဆောင် အိုင်းရစ်လေပြေဦးက သူ့ရင်ထဲက ပြောချင်ခဲ့တဲ့ စကားတွေကို ဆက်လက်ပြောပြလာပါတယ်.
'' ဦးမင်းစိန် ဒီနေရာကနေ တွေ့မယ်ဆိုရင် သမီး စိတ်မကောင်းပါဘူး . ဦး သမီးကို လာတွေ့ပါလို့ပြောတဲ့အချိန်မှာ ဦးဆီ သမီးက လာမတွေ့နိုင်ခဲ့ဘူး. အခုတော့ ဦးရဲ့ နောက်ဆုံးခရီးလေးကို သမီးတတ်နိုင်တဲ့ဘက်ကနေ ပံ့ပိုးပေးတယ်. ဦးအတွက်လည်း သမီးကိုးကွယ်တဲ့ သစ်တံခါးကျောင်းမှာ အလှူလေး လုပ်ပေးဖို့ရှိတယ်. ဦး သာဓုခေါ်ပြီးတော့ ကောင်းရာ ဘုံဘဝမှာ အေးဆေးနေပါနော်'' လို့ ဆိုပါတယ်.
Photo: အိုင်းရစ်လေပြေဦး
အိုင်းရစ်လေပြေဦးကို ဗီဒီယိုဇာတ်ကားတွေကနေတဆင့် ပရိသတ်တွေ စတင်သိရှိလာကြတာဖြစ်ပါတယ်. သူမဟာ အခုလက်ရှိမှာလည်း အနုပညာအလုပ်တွေ ဆောင်ရွက်နေဆဲ ဖြစ်ပါတယ်. ဒါပေမယ့် အရင်ကလောက်တော့ ဇာတ်ကားရိုက်ကူးမှုတွေ နည်းသွားတာကို တွေ့ရပါတယ်.