၂၀၂၂ ခုနှစ်အတွက် ဘလွန်းဒီအောဆုကို ပြင်သစ်တိုက်စစ်မှူးဘန်ဇီမာက အားလုံးက ယုံကြည်ထားခဲ့သလိုပဲ ဆွတ်ခူးနိုင်ခဲ့ပါတယ်။ ၁၉၅၆ နောက်ပိုင်း ဒီဆုကို ဆွတ်ခူးနိုင်တဲ့ အသက်အကြီးဆုံးကစားသမားအဖြစ် ဘန်ဇီမာက မှတ်တမ်းဝင်ခဲ့ပြီး သူ့အသက် ၃၄ နှစ်ကျော်အရွယ်မှာမှ ရယူနိုင်ခဲ့ကာ ကစားသမားတိုင်းလိုချင်မက်မောတဲ့ ဆုကို ပိုင်ပိုင်နိုင်နိုင်ဆွတ်ခူးနိုင်ခဲ့ပါတယ်။ 

ဘန်ဇီမာကတော့ ရော်နယ်ဒို-မက်ဆီတို့ခေတ်မှာ ဘလွန်းဒီအောဆုကို ရယူနိုင်တဲ့ ကစားသမားအဖြစ် အသင်းဖော်လူကာမိုဒရစ်နဲ့အတူ မှတ်တမ်းဝင်ခဲ့ပါတယ်။ ပြီးခဲ့တဲ့ရာသီမှာ ရီးရဲလ်မက်ဒရစ်အတွက် ပြိုင်ပွဲစုံသွင်းဂိုး ၄၀ ကျော်အထိ သွင်းယူပေးခဲ့ပြီး လာလီဂါနဲ့ ချန်ပီယံလိဂ်ဖလားရအောင် ကူညီပေးနိုင်ခဲ့ကာ အသင်းကို ဦးဆောင်သူတဦးအဖြစ်နဲ့ပါ ဘန်ဇီမာက ရှိနေခဲ့လို့ ဒီဆုကို ထိုက်ထိုက်တန်တန်ဆွတ်ခူးခဲ့တာဖြစ်ပါတယ်။