အယူသီးတဲ့ တရုတ်အမျိုးသမီးကြီးတစ်ဦးက လေယာဉ်စီးနင်းရာမှာ ဘေးအန္တရာယ်ကင်းစေရန် ဆုတောင်းစဉ် လေယာဉ်အင်ဂျင်ထဲကို အကြွေစေ့များ ပစ်ထည့်ခဲ့တာကြောင့် ခရီးစဉ်နှောင့်နှေးမှု ဖြစ်ပေါ်ခဲ့တယ်လို့ ဆိုပါတယ်။
(Photo: Lucky Air)
အသက် ၆၆ နှစ်အရွယ် အဆိုပါ တရုတ်အမျိုးသမီးကြီးက တရုတ်နိုင်ငံမြောက်ပိုင်း အတွင်းမွန်ဂိုလီးယား ကိုယ်ပိုင်အုပ်ချုပ်ခွင့်ဒေသရှိ Hohhot Baita အပြည်ပြည်ဆိုင်ရာလေဆိပ်မှာ ယနေ့ (ဧပြီ ၁၆ ရက်) ထိုသို့ လုပ်ဆောင်ခဲ့ခြင်းဖြစ်ပြီး လုံခြုံရေးစိုးရိမ်ရမှုကြောင့် သူမကို ဖမ်းဆီးခဲ့တယ်လို့ Tianjin လေကြောင်းလိုင်းရဲ့ Weibo အကောင့်မှာ ထုတ်ပြန်ခဲ့ပါတယ်။
(Photo: CCTV)
လေဆိပ်လုံခြုံရေးက ထိုအမျိုသမီးကြီးကို Tianjin လေကြောင်းလိုင်းရဲ့ GS6681 ခရီးစဉ် လေယာဉ်ပေါ်မှ ဖယ်ရှားခဲ့ပါတယ်။ ရဲတပ်ဖွဲ့က အမျိုးသမီးကြီးကို ၁၀ ရက်ကြာ ထိန်းသိမ်းထားပြီး လေကြောင်းလိုင်းအာဏာပိုင်တွေက သူမကို နောက်ထပ် အရေးယူမှုတွေ လုပ်ဆောင်နိုင်ကြောင်း တရုတ်အစိုးရသတင်းဌာန CCTV က ပြောပါတယ်။ တရုတ်အမျိုးသမီးကြီးဟာ လေယာဉ်ပေါ်မှာရှိနေစဉ် လေယာဉ်အင်ဂျင်ထဲကို အကြွေစေ့များ ပစ်ထည့်ခဲ့ကြောင်း အခြား ခရီးသည်တွေက သက်ဆိုင်ရာကို အကြောင်းကြားခဲ့ကြတာ ဖြစ်ပါတယ်။
(Photo: LightRocket via Getty Images)
(Photo: SCMP)
၂၀၁၇ ခုနှစ်အတွင်းကလည်း China Southern လေကြောင်းလိုင်းရဲ့ လေကြောင်းခရီးစဉ်တစ်ခုမှာ အယူသီးတဲ့ ခရီးသည်တစ်ဦးက ကံကောင်းစေရန်အတွက် လေယာဉ်အင်ဂျင်ထဲကို အကြွေစေ့များ ပစ်ထည့်ခဲ့မှုကြောင့် ၆ နာရီနီးပါးကြာ ခရီးစဉ်နှောင့်နှေးမှု ဖြစ်ခဲ့ကြောင်းသိရပါတယ်။ ထိုဖြစ်ရပ်မှာတော့ အသက် ၈၀ နှစ်အရွယ် အမျိုးသမီးကြီးတစ်ဦးကို ဖမ်းဆီးထိန်းသိမ်းခဲ့ပေမဲ့ အသက်အရွယ်ကြောင့် တရားစွဲဆိုခြင်းမပြုခဲ့ကြောင်း တရုတ်အစိုးရသတင်းဌာနက ဖော်ပြခဲ့ပါတယ်။