🇬🇧 United Kingdom 

လန်ဒန်မြို့တော်ဟာ ဒီဇင်ဘာလမှာ ခရစ္စမတ်ပွဲတော် အငွေ့အသက်နဲ့ အပြည့်အဝ တောက်ပလွန်းလို့ ခရီးသွားချစ်သူတွေ သဘောအကျဆုံးနေရာတစ်ခု ဖြစ်နေပါတယ်။ မြို့တော်တစ်ခုလုံး အလှဆင်မီးလုံးတွေနဲ့ ထိန်လင်းနေပြီး ကမ္ဘာ့အဆင့်မီ ပွဲတော်များကို ခံစားနိုင်ပါတယ်။

ခရစ္စမတ် မီးလုံးများ: - Oxford Street, Regent Street, Carnaby Street တို့မှာ အလှဆုံး ခရစ္စမတ်မီးလုံး အလှဆင်မှုတွေ ရှိပြီး ညဘက်လမ်းလျှောက်ပြီး ကြည့်ရှုဖို့ အကောင်းဆုံးပါပဲ။ 

Hyde Park Winter Wonderland - ဒီဇင်ဘာလမှာ ဖွင့်လှစ်တဲ့ ဒီနေရာဟာ ဥရောပရဲ့ အကြီးမားဆုံး ဆောင်းတွင်း ပွဲတော်တစ်ခုဖြစ်ပြီး ရေခဲပြင်ပေါ် လျှောစီးတာ၊ ဈေးဆိုင်တွေ၊ စားသောက်ဆိုင်တွေနဲ့ ကစားကွင်းတွေ အပြည့်အစုံ ပါဝင်ပါတယ်။

ခရစ္စမတ်ဈေးများ - South Bank Christmas Market နဲ့ Leicester Square Christmas Market တို့လို နေရာတွေမှာ ရိုးရာပစ္စည်းတွေနဲ့ အစားအသောက်တွေကို ဝယ်ယူနိုင်ပါတယ်။ နာမည်ကြီး Covent Garden ကို သွားလည်ပြီး လှပတဲ့ အလှဆင်မှုတွေ၊ ဖျော်ဖြေရေးတွေနဲ့ ဈေးဝယ်ထွက်တာမျိုး လုပ်နိုင်ပါတယ်။

🇩🇪 ဂျာမနီ (Germany)

ဂျာမနီဟာ ကမ္ဘာ့အကောင်းဆုံးနဲ့ ရိုးရာအငွေ့အသက်ပါတဲ့ ခရစ္စမတ်ဈေးကို စတင်ခဲ့တဲ့ နိုင်ငံတစ်နိုင်ငံ ဖြစ်ပါတယ်။ ဒီဇင်ဘာလမှာ မြို့ကြီးရော၊ မြို့ငယ်လေးတွေမှာပါ ပွဲလမ်းသဘင် အငွေ့အသက် အပြည့်အဝရှိပါတယ်။

အထူးဆွဲဆောင်မှုအနေနဲ့ 

Nuremberg Christmas Market - ကမ္ဘာကျော်တဲ့ အကြီးဆုံးဈေးထဲက တစ်ခုဖြစ်ပြီး သမိုင်းဝင် ပုံစံမျိုးနဲ့ ရိုးရာ ခံစားမှုကို အဓိကပေးပါတယ်။ 

Cologne Christmas Markets - Cologne မြို့ရဲ့ ဘုရားရှိခိုးကျောင်းကြီး (Cathedral) နောက်ခံနဲ့ ဈေးဝယ်ထွက်ရတာကလည်း မမေ့နိုင်စရာပါပဲ။

Glühwein (ဝိုင်ပူ) - အအေးဒဏ်ကို ပြေပျောက်စေပြီး ခရစ္စမတ်ခံစားချက်ကို မြင့်မားစေမယ့် ရိုးရာဝိုင်ပူကို မဖြစ်မနေ မြည်းစမ်းကြည့်သင့်ပါတယ်။

🇫🇮 ဖင်လန်နိုင်ငံ (Finland) - Lapland

စစ်မှန်တဲ့ ဆောင်းရာသီ စွန့်စားခန်းနဲ့ ခရစ္စမတ်ရဲ့ ဇာတ်မြစ်ကို ရှာဖွေချင်တယ်ဆိုရင် ဖင်လန်နိုင်ငံမြောက်ပိုင်းက Lapland ကို သွားရောက်သင့်ပါတယ်။ ဒီနေရာဟာ စန်တာကလော့စ် (Santa Claus) ရဲ့ မွေးရပ်မြေအဖြစ် နာမည်ကြီးပါတယ်။

Santa Claus Village (Rovaniemi) - စန်တာနဲ့ တွေ့ဆုံပြီး ဓာတ်ပုံရိုက်နိုင်တဲ့အပြင် Arctic Circle ကို ဖြတ်ကျော်တဲ့ အမှတ်အသားနေရာလည်း ဖြစ်ပါတယ်။

Northern Lights (Aurora Borealis) - ဒီဇင်ဘာလဟာ ကောင်းကင်ယံမှာ ရောင်စုံအလင်းတန်းများ လှုပ်ရှားကခုန်နေတဲ့ မြောက်ပိုင်းအလင်းတန်းများ (Northern Lights) ကို မြင်တွေ့ဖို့ အခွင့်အရေး အများဆုံး အချိန်တစ်ခု ဖြစ်ပါတယ်။

ဆောင်းတွင်းမှာတော့ ခွေးတွေနဲ့ လှည်းဆွဲစီးခြင်း၊ Reindeer တွေနဲ့ လှည်းမောင်းခြင်းနဲ့ နှင်းလျှောစီးခြင်း (Snowmobiling) တွေကိုလည်း လုပ်ဆောင်နိုင်ပါတယ်။

🇨🇭 ဆွစ်ဇာလန် (Switzerland)

ဆွစ်ဇာလန်ဟာ ဥရောပရဲ့ အမြင့်ဆုံးနဲ့ အလှဆုံးတောင်တန်းတွေဖြစ်တဲ့ Swiss Alps ကို ပိုင်ဆိုင်ထားပြီး ဒီဇင်ဘာလမှာ နှင်းတွေနဲ့ ဖုံးလွှမ်းနေတဲ့ မြင်ကွင်းက တကယ့်ကို အံ့မခန်းပါပဲ။

နှင်းလျှောစီး အပန်းဖြေစခန်းများ - Zermatt, St. Moritz နဲ့ Verbier လို နေရာတွေဟာ ကမ္ဘာ့အဆင့်မီ နှင်းလျှောစီး (Skiing) နဲ့ နှင်းဘုတ်စီး (Snowboarding)ဖို့ အကောင်းဆုံးနေရာတွေပါ။ 

ရထားခရီးစဉ်အနေနဲ့တော့ Glacier Express လိုမျိုး ရထားခရီးစဉ်တွေဟာ နှင်းဖုံးနေတဲ့ တောင်တန်းတွေရဲ့ အလှကို ပြတင်းပေါက်ကနေ အေးအေးဆေးဆေး ခံစားဖို့ အကောင်းဆုံးနည်းလမ်းပါ။

ခရစ္စမတ်ပွဲတော် - မြို့ကြီးတွေဖြစ်တဲ့ Zurich, Basel နဲ့ Montreux တို့မှာ ရိုးရာ ခရစ္စမတ်ဈေးတွေ ဖွင့်လှစ်ထားပါတယ်။ Montreux က သမိုင်းဝင် Chillon Castle နောက်ခံနဲ့ ဈေးကွက်ကတော့ အထူးနာမည်ကြီးပါတယ်။

ဆောင်းရာသီကို တောင်ပေါ်မြို့လေးတွေမှာ ကော်ဖီပူပူလေး သောက်ရင်း အေးချမ်းတဲ့ ပတ်ဝန်းကျင်ကို ခံစားဖို့က တကယ့်ကို အပန်းပြေစေမှာပါ။

ဆောင်းတွင်းရဲ့ အလှကို လန်ဒန်ရဲ့ တောက်ပတဲ့မီးရောင်တွေကြားက Winter Wonderland မှာ ပျော်မြူးတာပဲဖြစ်ဖြစ်၊ ဂျာမနီရဲ့ သမိုင်းဝင် ခရစ္စမတ်ဈေးတွေမှာ ရိုးရာလက်မှုပညာတွေကို လေ့လာတာပဲဖြစ်ဖြစ်၊ ဒါမှမဟုတ် ဖင်လန်နိုင်ငံ Lapland မှာ Aurora Borealis လို့ခေါ်တဲ့ မြောက်ပိုင်းအလင်းတန်းကို မော့ကြည့်ရင်း မယုံကြည်နိုင်လောက်အောင် အံ့သြရတာပဲဖြစ်ဖြစ်၊ ဒီအခိုက်အတန့်တွေဟာ နှစ်ပေါင်းများစွာ စွဲမြဲနေမယ့် ထူးခြားတဲ့ အမှတ်တရလက်ဆောင်တွေ ဖြစ်လာပါလိမ့်မယ်။

ဒီဇင်ဘာလရဲ့ ဥရောပခရီးစဉ်ဟာ ရိုးရှင်းတဲ့ အားလပ်ရက် မဟုတ်ဘဲ၊ တစ်နှစ်တာရဲ့ အကောင်းဆုံး မှော်ဆန်တဲ့ အခိုက်အတန့်ကို ကိုယ်တိုင်စီးမျောခံစားနိုင်ဖို့ပဲ ဖြစ်ပါတယ် 

ယခု ခရီးသွားဆောင်းပါးကို Duwun နှင့် Flymya မှ ပူးပေါင်းတင်ဆက်ပါသည်။