ချန်ပီယံလိဂ်ဝင်ခွင့်အတွက် အရေးပါတဲ့ လန်ဒန်ဒါဘီပွဲမှာတော့ စပါးဟာ အာဆင်နယ်ကို အိမ်ကွင်းမှာ ဂိုးပြတ်အနိုင်ယူသွားခဲ့ပါတယ်။ အာဆင်နယ်ဘက်က ကစားသမားတဦး ထုတ်ပယ်ခံခဲ့ရပြီး စပါးက အေးအေးဆေးဆေးကစားနိုင်ခဲ့ကာ ဟယ်ရီကိန်းနဲ့ ဆွန်ဟောင်မင်တို့ရဲ့ သွင်းဂိုးတွေနဲ့ ချန်ပီယံလိဂ်မျှော်လင့်ချက်ကို အသက်ဆက်သွားနိုင်ခဲ့ပါတယ်။
လက်ရှိမှာတော့ သူတို့နှစ်သင်းကြားမှာ ရမှတ် ၁ မှတ်သာ ကွာဟတော့တာဖြစ်ပါတယ်။ ဒါကြောင့် လက်ကျန် ၂ ပွဲက သေရေးရှင်ရေးလို နှစ်သင်းစလုံးအတွက် အရေးပါနေပြီး အာဆင်နယ်က နယူးကာဆယ်၊ အဲဗာတန်တို့နဲ့ ကစားရမှာဖြစ်ကာ စပါးကတော့ ဘန်လေ၊ နော်ဝှစ်ချ်တို့နဲ့ ရင်ဆိုင်ရမှာဖြစ်လို့ အာဆင်နယ်ထက်စာရင် ပွဲအနည်းငယ်ချောင်နေတာကို မြင်တွေ့နေရပါတယ်။
ဒိုင်လူကြီးဆုံးဖြတ်ချက်ကြောင့် စပါးတို့အသာရခဲ့တယ်လို့ ဆိုနိုင်ပေမယ့်လည်း တကယ်တမ်းအားဖြင့်တော့ စိတ်ပိုင်းဆိုင်ရာအရမှာပါ အာဆင်နယ်မယှဉ်နိုင်ခဲ့ပါဘူး။ စပါးက ပိုပြီးတော့အနိုင်ရချင်တဲ့ပုံစံကို ပြသနိုင်ခဲ့ပြီး ဟယ်ရီကိန်းက ပင်နယ်တီကတဆင့် အဖွင့်ဂိုးသွင်းယူခဲ့ပြီး သိပ်မကြာခင်မှာဘဲ ဟိုးလ်ဒင်းတယောက် နှစ်ဝါတနီနဲ့ ထုတ်ပယ်ခံခဲ့ရတာဖြစ်ပါတယ်။
ဟယ်ရီကိန်းက ဟိုးလ်ဒင်းထုတ်ပယ်ခံရပြီး ၄ မိနစ်အကြာမှာ နောက်ထပ်တဂိုးထပ်သွင်းခဲ့ပြီး ဆွန်ဟောင်မင်က ၄၇ မိနစ်မှာ ပွဲသိမ်းဂိုးသွင်းကာ အာဆင်နယ်တို့ ချေပဂိုးတောင်မရဘဲ လှည့်ပြန်ခဲ့ရတာဖြစ်ပါတယ်။ ကွန်တီကတော့ အသင်းကြီးနှစ်သင်းနဲ့ ဆက်တိုက်တွေ့ခဲ့ရာမှာ အဖိုးတန်ရမှတ်တွေကို စုဆောင်းနိုင်ခဲ့ပြီး ချန်ပီယံလိဂ်ဝင်ခွင့်မျှော်လင့်ချက်ကို နောက်ဆုံးအချိန်ထိ ဆုပ်ကိုင်ထားနိုင်ဆဲဖြစ်ပါတယ်။