လေးနှစ်သက်တမ်းရှိတဲ့ ရာထူးနဲ့ တာဝန်ထမ်းဆောင်တော့မှာပါ။

ကင်မရွန်းနာမည်ကျော်တိုက်စစ်မှူးဟောင်းဆင်မြူရယ်အီတူးဟာ ကင်မရွန်းဘောလုံးအဖွဲ့ချုပ်ဥက္ကဌအဖြစ် ရွေးချယ်ခံလိုက်ရတယ်လို့ သိရပါတယ်။ လေးနှစ်သက်တမ်းရှိတဲ့ ဘောလုံးအဖွဲ့ချုပ်ဥက္ကဌရာထူးအတွက် အီတူးဟာ အာဖရိကဘောလုံးအဖွဲ့ချုပ်ရဲ့ ဒုဥက္ကဌဖြစ်သူ Seidou Mbombo Njoya နဲ့ ယှဉ်ပြိုင်ခဲ့ရပြီး အနိုင်ရရှိခဲ့တာလည်းဖြစ်ပါတယ်။

မူလက ဝင်ရောက်ယှဉ်ပြိုင်သူ ၇ ဦးအထိရှိခဲ့ပေမယ့် မဲပေးမယ့်မနက်ပိုင်းမှာ ၅ ဦးအထိနုတ်ထွက်သွားခဲ့လို့ ၂ဦးတည်းသာ ယှဉ်ပြိုင်ခဲ့ရပါတယ်။ အသက် ၄၀ အရွယ် အီတူးက ရွေးကောက်ခံရအပြီးမှာ အားကစားလောကကို ပြုပြင်ပြောင်းလဲမှုတွေပြုလုပ်သွားမယ်လို့ ကတိပြုခဲ့ကာ ဘောလုံးသမားတွေ ပျိုးထောင်မွေးမြူပေးသွားမယ်လို့ ပြောဆိုခဲ့ကြောင်း BBC ရဲ့ ဖော်ပြချက်အရ သိရပါတယ်။ 

ဘာစီလိုနာ၊ အင်တာမီလန်နဲ့ ချယ်လ်ဆိးတိုက်စစ်မှူးဟောင်းက နိုင်ငံတဝှမ်းမှာ အနည်းဆုံးဘောလုံးကွင်း ၁၀ ကွင်းအထိ တည်ဆောက်သွားမယ်လို့လည်း ကတိပေးခဲ့ပြီး ဒီအတွက် စီးပွားရေးလုပ်ငန်းရှင်တွေ၊ ရင်းနှီးမြုပ်နှံမယ့်သူတွေနဲ့ စကားပြောဆိုပြီးဖြစ်တယ်လို့လည်း ဆိုပါတယ်။ အခုအခါမှာတော့ ကင်မရွန်းမှာ လာမယ့် ဇန်နဝါရီကနေ ဖေဖော်ဝါရီထိ ကျင်းပမယ့် အာဖရိကဖလားပွဲအတွင်း သူက အဖွဲ့ချုပ်ကို ဦးဆောင်နေရမှာလည်းဖြစ်ပါတယ်။ 


အသက် ၁၆ နှစ်အရွယ်မှာ ရီးရဲလ်မက်ဒရစ်ကို ရောက်ရှိခဲ့ပြီး လီဂါနက်စ်၊ အက်စ်ပန်ညို၊ မာယော့ကာတို့မှာ အငှားထွက်ကစားခဲ့ရတဲ့ အီတူးက မာယော့ကာကို အပြီးသတ်ပြောင်းရွှေ့ခဲ့ပြီး ၁၃၃ ပွဲမှာ ၅၄ ဂိုးအထိရရှိခဲ့ပါတယ်။ ဒီနောက်မှာ သူ့ကို ဘာစီလိုနာက ခေါ်ယူခဲ့ပြီး ၁၄၄ ပွဲမှာ ၁၀၈ ဂိုးအထိ ရရှိခဲ့ပြီး အောင်မြင်မှုအများအပြားရရှိခဲ့ကာ အင်တာမီလန်ကို ထပ်မံပြောင်းရွှေ့ပြီး တရာသီအတွင်း ဖလားသုံးလုံးဆွတ်ခူးနိုင်ခဲ့ပြန်ပါတယ်။


ကင်မရွန်းအတွက် အာဖရိကဖလား ၂ကြိမ်၊ အိုလံပစ်ရွှေတံဆိပ် ၁ ကြိမ်ရယူပေးနိုင်ခဲ့သလို အာဖရိကအကောင်းဆုံးကစားသမားဆုကို ဆက်တိုက်ဆွတ်ခူးနိုင်တဲ့အထိ အီတူးက ကစားသမားဘ၀မှာ အောင်မြင်ခဲ့ပါတယ်။ အခုအခါမှာ နိုင်ငံရဲ့ အရေးပါတဲ့ ရာထူးတခုကို ရယူပြီး အောင်မြင်မှုတွေထပ်မံရရှိအောင် စွမ်းဆောင်ပေးရတော့မှာလည်းဖြစ်ပါတယ်။ 

Share

က္က