မက်ဆီကတော့ ကလပ်ကစားသမားဘ၀မှာ ဖန်တီးမှုအကြိမ် ၃၀၀ ပြည့်သွားခဲ့ပါပြီ။ ညက ဘရက်စ်နဲ့ပွဲမှာ ဘတ်ပီရဲ့ နောက်ကျအနိုင်ဂိုးအတွက် သူက ဖန်တီးပေးခဲ့ပြီး ပီအက်စ်ဂျီကို နိုင်ပွဲရအောင် ကူညီနိုင်ခဲ့သလို သူ့အတွက်လည်း ထူးခြားတဲ့ မှတ်တိုင်သစ်ကို စိုက်ထူနိုင်ခဲ့ပါတယ်။ မက်ဆီရဲ့ ဖန်တီးပေးခဲ့ပုံကတော့ ချီးကျူးစရာကောင်းလောက်အောင်ကို လှပခဲ့တာလည်း အမှန်ပါပဲ။
မက်ဆီလိုမျိုး အကြိမ်ပေါင်း ၃၀၀ ကို ဖန်တီးပေးနိုင်တဲ့ ကစားသမားက မရှိသေးပါဘူး။ သူတဦးတည်းစွမ်းဆောင်နိုင်ခဲ့တာဖြစ်ပြီး ကစားသမားဘ၀မှာ ဂိုးပေါင်းအများအပြားသွင်းယူနိုင်ခဲ့သလို ဖန်တီးမှုအပိုင်းမှာလည်း အားလုံးထက် မက်ဆီက သာလွန်နေခဲ့တဲ့နောက် သူ့ပရိသတ်တွေက မက်ဆီရဲ့ ဘယ်ခြေထောက်ကို ဒေါ်လာ ၁၀၀ ဘီလျံတန်တယ်လို့တောင်မှ အမွှမ်းတင်ခဲ့ကြပါတယ်။
အခြားပရိသတ်တွေကလည်း ဘောလုံးသမိုင်းမှာ အကောင်းဆုံး playmaker လို့ မက်ဆီကို တင်စားခဲ့ကြပြီး အာဂျင်တီးနားသားကို ဂုဏ်ပြုခဲ့ပါတယ်။ မက်ဆီရဲ့ ညက ဖန်တီးပေးမှုကိုကြည့်မယ်ဆိုရင်လည်း သူ့ရဲ့ အမြင်စူးရှမှု၊ အကွက်မြင်မှု၊ ပေးပို့ပုံတိကျမှုတွေကိုပါ မြင်တွေ့ရမှာဖြစ်ပြီး ဘတ်ပီကလည်း အခွင့်အရေးကို အကောင်းဆုံးအသုံးချသွားနိုင်ခဲ့တာပါ။
ဖန်တီးမှုအကြိမ် ၃၀၀ မှာ မက်ဆီက ပီအက်စ်ဂျီအတွက် ၃၂ ကြိမ်ဖန်တီးထားတာဖြစ်ပြီး ဘာစီလိုနာအတွက် အများဆုံး သူက ဖန်တီးပေးခဲ့တာပါ။ ကလပ်နဲ့ နိုင်ငံအသင်းအတွက်ဆိုရင် မက်ဆီက ၃၅၃ ကြိမ်အထိ ဖန်တီးပေးထားကာ သွင်းဂိုးပေါင်း ၈၀၀ ပြည့်ဖို့အတွက်လည်း ၁ ဂိုးတည်းသာ လိုအပ်တော့တာဖြစ်ပါတယ်။