မနေ့ညနေပိုင်းမှာ ကလော့ပ်တစ်ယောက် လီဗာပူးကနေ ထွက်ခွာတော့မယ်လို့ အတည်ပြုခဲ့ပြီး ဒါက ဘောလုံးလောကတစ်ခုလုံးအတွက် အံ့အားသင့်စရာအဖြစ်ရှိနေခဲ့ပါတယ်။ ကလော့ပ်ဟာ ရာသီကုန်မှာ လီဗာပူးနဲ့ လမ်းခွဲတော့မှာပါ။
အဆိုပါ နည်းပြကြီးဟာ လီဗာပူးနဲ့အတူ ပါဝင်ယှဉ်ပြိုင်ခဲ့ဖူးတဲ့ ပြိုင်ပွဲတိုင်းမှာ ချန်ပီယံဖြစ်ခဲ့ဖူးပြီး ယူရိုပါလိဂ်မှာသာ ချန်ပီယံဆုနဲ့ လွဲချော်ခဲ့တာပါ။ ဒီလိုမျိုး ကလော့ပ် ထွက်သွားတဲ့အပေါ် ပြိုင်ဘက်နည်းပြတွေ၊ ပရိသတ်တွေက မှတ်ချက်အမျိုးမျိုး ပေးခဲ့ပါတယ်။
ဒီလိုအချိန်မျိုးမှာ ယူနိုက်တက်ရဲ့ X အကောင့်ကနေ တင်ခဲ့တဲ့ ပို့စ်တစ်ခုကတော့ ပရိသတ်တွေအတွက် ဒွိဟဖြစ်စရာရှိခဲ့ပါတယ်။ ယူနိုက်တက်ရဲ့ တရားဝင်ဆိုရှယ်မီဒီယာကတစ်ဆင့် “ကာရင်တန်ကနေ ကောင်းသော မနက်ခင်းပါလို့ နှုတ်ဆက်လိုက်ပါတယ်။ နေ့တစ်နေ့ကို ရှေ့ဆက်ဖို့ အဆင်သင့်ပါပဲ” လို့ ရေးသားခဲ့ပါတယ်။
ဒါ့အပြင် ဒီပို့စ်မှာလည်း ကာရင်တန်လေ့ကျင့်ရေးကွင်းရဲ့ ဓာတ်ပုံကို ထည့်သွင်းဖော်ပြထားတာပါ။ ဒါဟာ ကလော့ပ် ထွက်ခွာကြောင်း ကြေညာတာနဲ့ တိုက်တိုက်ဆိုင်ဆိုင်ဖြစ်ခဲ့ပြီး ပရိသတ်တွေကတော့ ယူနိုက်တက်ရဲ့ ဆိုရှယ်မီဒီယာသမားတွေ ကလော့ပ် ထွက်ခွာတော့မှာကို ဝမ်းသာနေကြတယ်လို့ ယူဆနေကြပါတယ်။
ပရိသတ်တွေက “တကယ့်ကို အချိန်ကိုက်ပဲ” “ကလော့ပ်လက်ထက် လီဗာပူးရဲ့ လွှမ်းမိုးမှုတွေကြောင့် သူ လီဗာပူးက ထွက်ခွာတော့မှာကို ပြိုင်ဘက်တွေ ကြိုဆိုကြမှာ မဆန်းပါဘူး” လို့ မှတ်ချက်ပေးခဲ့ပါတယ်။ ကလော့ပ်လက်ထက် လီဗာပူးဟာ ယူနိုက်တက်ကို (၇) ဂိုးပြတ်၊ (၅) ဂိုးပြတ်ရလဒ်တွေနဲ့ အနိုင်ရရှိခဲ့ဖူးပါတယ်။