ရီးရဲလ်မက်ဒရစ်တိုက်စစ်မှူး ဘန်ဇီမာဟာ ဆော်ဒီကနေ ကမ်းလှမ်းမှုတွေ ရရှိထားတယ်လို့ သိရပြီး အသင်းကထွက်ခွာဖို့အတွက် စဉ်းစားနေပြီလို့ မက်ဒရစ်သတင်းတွေက ဖော်ပြခဲ့ပါတယ်။ လာမယ့်ရာသီမှာ ပုံမှန်ကစားခွင့်ရဖို့ အာမခံချက်နည်းပါးလာတာ၊ အသက်အရွယ်ကြောင့် ခြေစွမ်းကျဆင်းပြီး ဒဏ်ရာထိခိုက်မှုများပြားလာတာတွေကြောင့် ဘန်ဇီမာက အသင်းပြောင်းရွှေ့ဖို့ကို အာရုံကျလာခဲ့ပြီဖြစ်ပါတယ်။ 

ဘန်ဇီမာအနေနဲ့ ဆော်ဒီကို ပြောင်းရွှေ့မယ်ဆိုရင် ရီးရဲလ်အသင်းဖော်ဟောာင်း ရော်နယ်ဒိုနဲ့ ပြန်လည် ဆုံတွေ့နိုင်မှာပါ။ ပြိုင်ဘက်တွေအဖြစ်နဲ့လား၊ အသင်းဖော်တွေအဖြစ်နဲ့လားဆိုတာကတော့ ကမ်းလှမ်းမယ့်အသင်းပေါ် မူတည်နေပါတယ်။ ဆော်ဒီကလပ်တ​ွေဟာ ဘန်ဇီမာအပြင် မက်ဆီ၊ မိုဒရစ်၊ တိုနီခရူးစ်တို့လို ဝါရင့်ကစားသမားတွေကိုလည်း စိတ်ဝင်စားနေပြီး မက်ဆီအတွက် ကမ်းလှမ်းမှုကို အနည်းဆုံး အသင်း ၃ သင်းလောက်က ပြုလုပ်ထားပါတယ်။