ကမ္ဘာတစ်ဝန်း COVID-19 ကူးစက်ခံရသူ အရေအတွက် ၂၈ သန်း ကျော်နဲ့ သေဆုံးသူ ၉၀၀,၀၀၀ ကျော်ရှိလာခဲ့ကြောင်း ကမ္ဘာ့နိုင်ငံအသီးသီးရဲ့ COVID-19 ဖြစ်ပွားမှုအခြေအနေ ကိန်းဂဏန်းတွေကို အချိန်နဲ့တစ်ပြေးညီ ဖော်ပြနေတဲ့ Worldometers ဝက်ဘ်ဆိုက်မှာ ယနေ့ (စက်တင်ဘာ ၁၀ ရက်) ဖော်ပြထားမှုအရ သိရှိရပါတယ်။

(Image: Worldometers webpage screengrab)

ပြီးခဲ့တဲ့ စက်တင်ဘာ ၆ ရက် မနက်ပိုင်းမှာ ကူးစက်ခံရသူ ၂၇ သန်းကျော်လွန်ခဲ့တာဖြစ်ပြီး ၄ ရက်ကျော်အတွင်း နောက်ထပ် ကူးစက်ခံရသူ ၁ သန်းကျော် တိုးလာခဲ့ပါတယ်။ COVID-19 ကြောင့် သေဆုံးသူအရေအတွက်ကတော့ စက်တင်ဘာ ၆ ရက်နေ့မှာ ၈၈၃,၀၀၀ ကျော်မှ ၄ ရက်ကျော်အတွင်း ၁၇,၀၀၀ ကျော် တိုးလာခဲ့တာ တွေ့ရပါတယ်။

(Photo: Getty Images)

ကိန်းဂဏန်းတွေအရ တစ်ကမ္ဘာလုံးမှာ ကူးစက်ခံရသူ ၂၈ သန်းကျော်အနက် ၇ သန်းကျော်ဟာ COVID-19 လူနာအဖြစ် ကုသမှုခံယူနေရဆဲ အခြေအနေလည်း ဖြစ်ပါတယ်။ ကမ္ဘာတစ်ဝန်းမှာ အမေရိကန်က ကူးစက်မှုအများဆုံးနိုင်ငံဖြစ်ပြီး လက်ရှိအချိန်အထိ လူဦးရေ ၆.၅ သန်းကျော် ကူးစက်ခံထားရပါတယ်။ ကူးစက်မှု ဒုတိယအများဆုံးနိုင်ငံမှာ အိန္ဒိယဖြစ်ပြီး COVID-19 အတည်ပြုလူနာ ၄.၄ သန်းကျော် တွေ့ရှိထားပါတယ်။

(Photo: Reuters)

ဘရာဇီးနိုင်ငံက COVID-19 ကြောင့် သေဆုံးမှု ၁၂၈,၀၀၀ ဖြင့် ဒုတိယအများဆုံးနဲ့ အိန္ဒိယက သေဆုံးသူ ၇၅,၀၀၀ ကျော်နဲ့ တတိယအများဆုံး နိုင်ငံများဖြစ်ပါတယ်။ ထို့နောက် မက္ကစီကိုနဲ့ ဗြိတိနန်တို့က ကမ္ဘာတစ်ဝန်းမှာ ကပ်ရောဂါကြောင့် သေဆုံးမှု စတုတ္တနဲ့ ပဥ္စမမြောက် အများဆုံးနိုင်ငံများအဖြစ် သေဆုံးသူ ၆၉,၀၀၀ ကျော်နနဲ့ ၄၁,၀၀၀ ကျော် အသီးသီး ရှိခဲ့တယ်လို့ သိရပါတယ်။

လတ်တလော သီတင်းပတ်များအတွင်း အိန္ဒိယနိုင်ငံဟာ COVID-19 ကပ်ရောဂါ ကူးစက်ဖြစ်ပွားမှု ဗဟိုချက်နေရာ ဖြစ်လာနေပြီး ယနေ့ ထုတ်ပြန်ခဲ့တဲ့ စာရင်းတွေအရ တစ်ရက်အတွင်း ကူးစက်ခံရသူ နောက်ထပ် ၉၅,၇၃၅ ဦး တိုးလာခဲ့ကာ တစ်ကမ္ဘာလုံးမှာ နေ့စဥ် ကူးစက်မှုအသစ် အများဆုံးအဖြစ် စံချိန်ထပ်တင်ခဲ့ပါတယ်။

(Photo: Reuters)

(Photo: Reuters)

COVID-19 ကူးစက်မှုတွေဟာ အရှေ့တောင်အာရှမှာ နေ့စဥ် တရိပ်ရိပ်တိုးလာနေဆဲ ဖြစ်ပါတယ်။ အရှေ့တောင်အာရှမှာ ကူးစက်မှု ဒုတိယအများဆုံးဖြစ်တဲ့ အင်ဒိုနီးရှားနိုင်ငံမှာ ဂျကာတာမြို့တော်အတွင်း ကူးစက်မှုထိန်းချုပ်ရေး သွားလာလှုပ်ရှားမှု ကန့်သတ်ချက်တွေ ပြန်လည်သတ်မှတ်ဆောင်ရွက်မယ်လို့ ဆိုပါတယ်။

အင်ဒိုနီးရှားမှာ လက်ရှိအချိန်အထိ ကူးစက်ခံရသူ ၂၀၇,၂၀၃ ဦးနဲ့ သေဆုံးသူ ၈,၄၅၆ ဦးရှိခဲ့ပါတယ်။ အင်ဒိုနီးရှားဟာ အရှေ့တောင်အာရှမှာ COVID-19 ကြောင့် သေဆုံးမှုအများဆုံး နိုင်ငံဖြစ်ပါတယ်။ အရှေ့တောင်အာရှဒေသမှာ ကူးစက်မှုအများဆုံး နိုင်ငံကတော့ ဖိလစ်ပိုင်ဖြစ်ပြီး ကူးစက်မှု ၂၄၈,၉၄၇ ဦး တွေ့ရှိထားပါတယ်။ ဖိလစ်ပိုင်ဟာ ဒေသတွင်းမှာ COVID-19 ကြောင့် သေဆုံးမှု ဒုတိယအများဆုံး နိုင်ငံဖြစ်ပြီး သေဆုံးသူ ၄,၀၆၆ ဦးရှိခဲ့ကြောင်း သိရပါတယ်။

မြန်မာနိုင်ငံမှာလည်း လတ်တလော သီတင်းပတ်အတွင်း ပြည်တွင်းကူးစက်မှုတွေ အပါအဝင် နေ့စဥ် ကူးစက်မှုအသစ်များ စံချိန်တင် မြင့်တက်နေခဲ့ပါတယ်။ ကျန်းမာရေးနဲ့အားကစား ဝန်ကြီးဌာနက စက်တင်ဘာ ၁၀ ရက် မနက် ၈ နာရီအချိန် ထုတ်ပြန်မှုအရ COVID-19 အတည်ပြုလူနာ စုစုပေါင်း ၂,၀၀၉ ဦး တွေ့ရှိထားပါတယ်။

မြန်မာနိုင်ငံမှာ လူဦးရေ ၁၇၉,၄၇၁ ဦးကို COVID-19 စစ်ဆေးခဲ့ပြီး စောင့်ကြည့်လူနာ စုစုပေါင်း ၈,၃၉၅ ဦးရှိကြောင်း ကျန်းမာရေးနဲ့ အားကစားဝန်ကြီးဌာန ဝက်ဘ်ဆိုက်မှာ ယနေ မနက်ပိုင်းအထိ ထုတ်ပြန်ထားမှုအရ သိရှိရပါတယ်။ မြန်မာနိုင်ငံမှာ လတ်တလော သီတင်းပတ်များအတွင်း တွေ့ရှိရတဲ့ အတည်ပြုလူနာတွေအနက် ပြည်တွင်းကူစက်မှု အများအပြား ပါဝင်နေပါတယ်။

(Image: MoHS webpage screengrab)

မြန်မာမှာ တွေ့ရှိခဲ့ရတဲ့ COVID-19 အတည်ပြုလူနာများအနက် ၅၅၃ ဦး ပြန်လည်သက်သာခဲ့ကာ ၁၄ ဦး သေဆုံးခဲ့ပါတယ်။ သေဆုံးသူတွေအနက် စက်တင်ဘာ ၇ ရက်မှ ၁၀ ရက်အထိ လေးရက်အတွင်းမှာ လူနာ ၆ ဦး သေဆုံးခဲ့တာ ဖြစ်ပါတယ်။ မြန်မာနိုင်ငံမှာ COVID-19 ကြောင့် သေဆုံးခဲ့သူတွေအနက် အများစုဟာ ရောဂါအခံရှိသူများဖြစ်ပေမဲ့ တစ်ဦးကတော့ ရောဂါအခံမရှိဘဲ သေဆုံးခဲ့တယ်လို့ သိရပါတယ်။