သင်္ကြန်မှာ အိမ်အပြင်ထွက် ရေပက်ကစားပြီး သောက်စားမူးယစ်မှုတွေပြုလုပ်မယ်ဆိုရင် တည်ဆဲဥပဒေအရ တရားစွဲဆိုအရေးယူခံရနိုင်တယ်လို့ သိရပါတယ်။

ဓာတ်ပုံ- မဟာသင်္ကြန်အကျနေ့ မြို့တော်ခန်းမရှေ့မြင်ကွင်း

သင်္ကြန်ကာလအတွင်းမှာ အရက်သေစာသောက်စားခြင်း၊မူးယစ်ရမ်းကားခြင်းနဲ့ ရေကစားခြင်းတို့ကို ပိတ်ပင် တားမြစ်ထားပြီး သက်ဆိုင်ရာ မြို့နယ်အလိုက် ရပ်ကွက်တွေမှာ မေတ္တာရပ်ခံချက် ထုတ်ပြန်အသိပေး နှိုးဆော် လျက်ရှိပါတယ်။

ဧပြီ ၁၃ရက် သင်္ကြန်အကျနေ့အထိ ရေကစားကြခြင်းမရှိသလို သင်္ကြန်ကာလအတွင်း အရက်သေစာ သောက်စားပျော်ပါးသူများ လည်း မရှိဘဲ မေတ္တာရပ်ခံချက်ကို လိုက်နာနေကြတယ်လို့ ကမာရွတ်မြို့နယ်အုပ်ချုပ်ရေးမှူးက Duwun ကို ပြော ပါတယ်။

ဓာတ်ပုံ- မဟာသင်္ကြန်အကျနေ့ ဆူးလေဘုရားကို မြို့ထဲဖက်မှ မြင်ကွင်း

COVID-19 ဗိုင်းရပ်စ်ကူးစက်မှုနှုန်းထိန်းချုပ်နိုင်ဖို့အတွက် ဧပြီ ၁၀ရက်ကနေ ၁၉ရက်အထိ နေအိမ်တွင်သာနေထိုင်ရန် အစိုးရက မေတ္တာရပ်ခံထားပြီး ရေကစားခြင်း၊အများပြည်သူ သွားလာရာနေရာတွေမှာ အရက်သောက်စားခြင်းတို့ကို တားမြစ်ထားပါတယ်။ “အပြစ်ပေးအရေးယူဖို့တော့ လမ်းညွှန်ထားတာမရှိပါဘူး၊ဒီကိစ္စတွေက လုံခြုံရေးယာဉ်တန်းကလည်း ကင်းလှည့် နေတာရှိပါတယ်။ လက်ရှိ တည်ဆဲဥပဒေကို ချိုးဖောက်ရင်တော့ အရေးယူခံရမှာပါ။ကျွန်တော့်ရပ်ကွက်မှာတော့ ရေကစားတာ မရှိသလို အားလုံး ကိုယ့်အိမ်ထဲကိုယ်နေကြပြီး အေးအေးဆေးဆေး ရှိနေပါတယ်။”လို့ သရက်တော( တောင်)ရပ်ကွက် အုပ်ချုပ်ရေးမှူး ဦးကျော်မြင့်က Duwunကိုပြောပါတယ်။

COVID-19 ဗိုင်းရပ်စ်ကူးစက်မှုနှုန်းထိန်းချုပ်မှုအတွက် နိုင်ငံတော်ကထုတ်ပြန်ထားတဲ့ မေတ္တာရပ်ခံချက်တွေကို မလိုက်နာဘူးဆိုရင် သဘာဝဘေးအန္တရာယ်ဆိုင်ရာစီမံခန့်ခွဲမှုဥပဒေပုဒ်မ ၂၅/၃၀(ဃ)နဲ့ အရေးယူနိုင်ပြီး အမြင့်ဆုံးပြစ်ဒဏ် ထောင်ဒဏ်(၁)နှစ်နဲ့ ငွေဒဏ်ကျခံရနိုင်ပါတယ်။