ခေတ်လူငယ်တွေအကြားရေပန်းစားနေတဲ့ “ Noodle Me You ”

ဒီဆိုင်လေးနာမည်ကတော့ “ Noodle Me You “ လို့ခေါ်ပြီး ခေါက်ဆွဲချစ်သူတွေနဲ့ လူငယ်တွေအကြား နာမည်ကြီးရေပန်းစားနေတဲ့ဆိုင်လေးတစ်ခုဖြစ်ပါတယ်။ ဖွင့်ထားတာ တစ်လကျော်ရှိသေးပေမယ့်လည်း ခေါက်ဆွဲကို ကိုယ်ကြိုက်တဲ့ပုံစံမျိုးနဲ့ ပြုတ်စားလို့ရတဲ့ မြန်မာ့ပထမဆုံး Self Service Automatic Ramen Machine Shopဆိုင်လေးဖြစ်တာကြောင့် လူငယ်တွေအကြားစိတ်ဝင်စားမှုမြင့်တက်နေတဲ့ဆိုင်လေးပါ။

“ ကိုရီးယားတို့ ဘာတို့မှာဆို ဒီလိုဆိုင်တွေက အများကြီးဖြစ်နေပြီ။ ရန်ကုန်မှာလည်း ဒီလိုမျိုးဆိုင်လေးတွေ ဖြစ်စေချင်တယ်။ ခေါက်ဆွဲပြုတ်စားတာကို Heavy လို့မခံစားရစေချင်ဘူး။ ဆိုင်တွေမှာစားရင်  စောင့်ရမယ် ဘာညာမျိုးမဟုတ်ဘဲ ပေါ့ပေါ့ပါးပါးလေးနဲ့ ကိုယ့်ဘာသာကို ကိုယ်ကြိုက်တဲ့ပုံစံမျိုးလေးနဲ့ ပြုတ်စားလို့ရအောင် ဒီဆိုင်လေးကို ဖွင့်လှစ်ဖို့ စီစဉ်ခဲ့တာပါ။” လို့ ဆိုင်ရှင် ကိုမြတ်စိုးမိုးက ပြောပါတယ်။

ဒီဆိုင်လေးကိုသွားရင် ဘာတွေလုပ်ရမှာလဲ

“ ဆိုင်ထဲကိုစဝင်လာတာနဲ့ စင်ပေါ်မှာတင်ထားတဲ့  ခေါက်ဆွဲပြုတ်တွေ အများကြီးရှိတယ်။ခြင်းလေးယူပြီး ရွေးကြမယ်။ ရွေးပြီးရင် အသားတွေ လည်းထားပေးထားတယ်။ ကိုယ်ကြိုက်တဲ့အသားတွေ၊ အရွက်တွေကို ရွေးမယ်။ ပြီးရင်ကောင်တာမှာ အရင်ဆုံးပိုက်ဆံရှင်းမယ်။ ပြီးရင် ရေနွေး ထည့်ပေးထားတဲ့ စက် ၃ လုံးရှိတယ်။ အဲဒီမှာ ကိုယ်ကြိုက်တဲ့ပုံစံမျိုး ကိုယ်က ခေါက်ဆွဲကို အပျော့ကြိုက်တာလား၊ အမာကြိုက်တာလား စသဖြင့်ပေါ့နော်။ ကိုယ့်အကြိုက် ပြုတ်စားလို့ရအောင်ပေါ့။ တကယ်လို့ စက်တွေသုံးရတာ အခက်အခဲရှိတယ်ဆိုရင်လည်း ဘေးက ဝန်ထမ်းတွေက ကူညီပေးပါတယ်” လို့ ဆိုပါတယ်။

ခေါက်ဆွဲအမျိုးအစားပေါင်း (၁၀၀) နီးပါးကို ရွေးချယ်ခွင့်ရမယ့် “ Noodle Me You ”

ဒီဆိုင်လေးမှာ ကိုရီးယား၊ဂျပန်၊ ယိုးဒယားစတဲ့နိုင်ငံထုတ် ခေါက်ဆွဲအမျိုးအစားပေါင်း ၁၀၀ နီးပါးရှိပြီး ကိုယ်ကြိုက်နှစ်သက်ရာကို ရွေးချယ်စားသုံးလို့ရပါတယ်။ အသားတွေကတော့ ဝက်သားလုံး၊ အမဲသားလုံး၊ ကြက်မဲ၊ ကြက်ဆင် စတဲ့ အသားမျိုးစုံနဲ့ အရွက်မျိုးစုံကို ရွေးချယ်စားသုံးနိုင်ပါတယ်။ ဈေးနှုန်းအနေနဲ့ကတော့ ခေါက်ဆွဲတစ်ထုပ်ကို ၁၄၀၀ ကျပ်ကနေ ၅၀၀၀ ကျော်အထိရှိပြီး အသားလုံးတွေကတော့ တစ်ထုပ်ကို ၃၅၀ ကျပ်ကနေ ကျပ်တစ်ထောင် ကျော်ထိရှိတယ်လို့ဆိုပါတယ်။

“ ကျွန်တော်တို့ခေါက်ဆွဲက ပြည်ပကနေ တင်သွင်းတော့ ဈေးကတော့ နည်းနည်းမြင့်တယ်ပေါ့နော်။ တံဆိပ်လေးမျိုးကို အဓိကတင်သွင်းတယ်။ ခေါက်ဆွဲကတစ်နေ့တစ်နေ့ တော်တော်ကုန်တယ်။ ဒီလိုမျိုး ကိုယ်တိုင်ပြုတ်စားတဲ့အခါမှာ ကိုယ်စားချင်တဲ့အရသာကို ကိုယ့်ဘာသာဖန်တီးရတာလည်း အနုပညာတစ်ခုပါပဲ။ အဲဒီအရသာကို စားသုံးသူတွေကိုပေးချင်တာလည်းပါပါတယ်” လို့ စီစဉ်သူ ကိုမြတ်စိုးမိုးက ဆိုပါတယ်။

“ Noodle Me You ” သွားချင်တယ်ဆိုရင်

ဒီဆိုင်လေးကတော့ အမှတ် ၈၀၊ ဗဟိုလမ်း၊ စမ်းချောင်းမြို့နယ် မှာဖြစ်ပြီး ဆိုင်ဖွင့်ချိန်ကတော့ မနက် ၁၁ နာရီကနေ ည ၁၀ နာရီထိ ဖွင့်လှစ်ထားတာပါ။ ဒါကြောင့်မို့ နေ့လယ်ခင်း ထမင်းစားချိန်နဲ့ ညနေခင်းရုံးဆင်းချိန်တွေမှာဆို လူပိုစည်ကားတတ်တာတွေ့ရပါတယ်။ ကိုယ့်ကိုကိုယ် ကိုရီးယားဒရမ်မာတွေထဲကလို ရောက်သွားသလို ခံစားရချင်တယ်ဆိုရင်တော့ ဒီဆိုင်လေးကို တစ်ခါလောက်တော့ သွားကြည့်ကြဖို့ ညွှန်းပေးလိုက်တယ်နော်။