စီးရီးအေကလပ် ရိုးမားအသင်းဟာ လူကာကူကို အငှားနဲ့ ခေါ်ယူဖို့အတွက် သဘောတူညီမှုရရှိခဲ့ပြီဖြစ်ပါတယ်။ ကစားသမားအတွက် ငှားရမ်းမှုအဖြစ် ယူရို ၅ သန်းပေးချေရမှာဖြစ်ကာ လုပ်ခလစာက ယူရို ၇.၅ သန်းအထိ ပေးရမှာဖြစ်ပြီး လာမယ့်ရက်အတွင်းမှာ အသင်းကစားသမားသစ်အဖြစ် ကြေညာနိုင်တော့မှာဖြစ်ပါတယ်။
လူကာကူရဲ့ အပြောင်းအရွှေ့ကိုတော့ ရိုးမားအသင်းရဲ့ ဥက္ကဌလည်းဖြစ်၊ ပိုင်ရှင်လည်းဖြစ်တဲ့ ဒန်ဖရန့်ကင်က တိုက်ရိုက်ကိုင်တွယ်ခဲ့တယ်လို့ နာမည်ကျော်သတင်းထောက် ဖာဘရီဇီယိုရိုမာနိုက ဖော်ပြခဲ့ပါတယ်။ ဒါ့အပြင် လူကာကူကို ရောမအရောက် သူကိုယ်တိုင် လေယာဉ်မောင်းနှင်ကာခေါ်ဆောင်လာမယ်လို့လည်း သိရပါတယ်။
အမေရိကန်ဘီလျံနာသူဌေးကြီးဖြစ်တဲ့ သူက အသက် ၅၈ နှစ်အရွယ်ရှိပြီဖြစ်ပါတယ်။ ပိုင်ဆိုင်မှု ၅.၆ ဘီလျံအထိ ရှိပြီး The Friedkin Group ရဲ့ CEO ဖြစ်ကာ Air Force Heritage Flight Foundation ကို တည်ထောင်ခဲ့သူပါ။
အရပ်ဘက် Heritage Flight လေယာဉ်မှူး ၉ ဦးထဲက တဦးဖြစ်ပြီး လေယာဉ်မောင်းနှင်နိုင်ဖို့ လိုအပ်တဲ့ အရည်အချင်းတွေ ပြည့်မီပြီး အမေရိကန်လေတပ်၊ Horsemen P-51 ပျံသန်းရေးအဖွဲ့တွေနဲ့အတူ မြောက်အမေရိကနဲ့ ဥရောပတဝှမ်းမှာ ပြုလုပ်ခဲ့တဲ့ လေကြောင်းပြပွဲတွေမှာ စွမ်းဆောင်ရည်မြင့် ခေတ်ဟောင်းစစ်လေယာဉ်မျိုးစုံကို မောင်းနှင်ပျံသန်းခဲ့ဖူးသူလည်း ဖြစ်ပါတယ်။
လူကာကူဟာ အင်တာမီလန်၊ ဂျူဗင်တပ်စ်တို့နဲ့ သတင်းတွေထွက်ခဲ့ပေမယ့်လည်း အကြောင်းအမျိုးမျိုးကြောင့် အပြောင်းအရွှေ့ပျက်ပြယ်ခဲ့ပြီး နောက်ဆုံးမှာ ရိုးမားကို ပြောင်းရွှေ့နိုင်ခဲ့တာဖြစ်ပါတယ်။