အကောင့်လုံခြုံရေးအတွက် လူမှုကွန်ရက်သုံးစွဲသူတွေဆီက ယူထားတဲ့ ဖုန်းနံပါတ်နဲ့ အီးမေးလ်တွေကို ကြော်ငြာပစ်မှတ်ထားရာမှာ သုံးခဲ့တယ်ဆိုပြီး ဖက်ဒရယ်ကုန်သွယ်ရေးကော်မရှင် FTC က Twitter ကို ဒေါ်လာသန်း ၁၅၀ ဒဏ်ရိုက်ခဲ့ပါတယ်။ 

အသုံးပြုသူတွေရဲ့ ဖုန်းနံပါတ်နဲ့ အီးမေးလ်တွေကို နှစ်ဆင့်ခံလုံခြုံရေးစနစ် Two-Factor Authentication နဲ့ အကောင့်လုံခြုံရေး ကာကွယ်ပေးရာမှာ သုံးမယ် ဆိုပြီး ပြောခဲ့တဲ့ Twitter ဟာ ဒီအချက်အလက်တွေကို ကြော်ငြာပစ်မှတ်ထားရာမှာ အသုံးချခဲ့တယ်လို့ FTC က ဆိုပါတယ်။ ဗုဒ္ဓဟူးနေ့က FTC ရဲ့ ပြောကြားချက်ထဲမှာ ၂၀၁၄ ကနေ ၂၀၁၉ ခုနှစ်အတွင်း Twitter ဟာ အသုံးပြုသူတွေရဲ့ ဖုန်းနံပါတ်နဲ့ အီးမေးလ်ကို ကြော်ငြာရှာဖို့ ရည်ရွယ်ချက်နဲ့ အသုံးချခဲ့တယ်လို့ ပါရှိပါတယ်။ 

Twitter ရဲ့ လုပ်ရပ်ဟာ FTC အက်ဥပဒေ နဲ့ ၂၀၁၁ ကော်မရှင်အက်ဥပဒေကို ချိုးဖောက်ရာ ရောက်ခဲ့တယ်လို့ FTC က ဆိုပါတယ်။ ဒါ့အပြင် အီးယူ-အမေရိကန် ကိုယ်ရေးအချက်အလက်ကာကွယ်ရေးနဲ့ ဆွစ်-အမေရိကန် ကိုယ်ရေးအချက်အလက်များ ကာကွယ်ရေးသဘောတူညီချက်တွေကိုလည်း ချိုးဖောက်ရာ ရောက်ခဲ့တယ်လို့ ဆိုပါတယ်။ Twitter ကတော့ တချို့ အချက်အလက်တွေဟာ ကြော်ငြာဖို့ ရည်ရွယ်ချက်နဲ့ မတော်တဆ အသုံးပြုမိခဲ့တယ်လို့ ပြောပါတယ်။ 

သုံးစွဲသူအချက်အလက် လုံခြုံရေးထိန်းသိမ်းဖို့ နဲ့ ကိုယ်ရေးအချက်အလက်ဆိုင်ရာ လေးစားမှုထားရှိရေးဟာ ကုမ္ပဏီရဲ့ အလေးအနက်ထားတဲ့ ကိစ္စဖြစ်ပြီး အခုကိစ္စအတွက် FTC နဲ့ အဆင့်ဆင့် ပူးပေါင်းလုပ်ဆောင်ခဲ့တယ်လို့လည်း ဆိုပါတယ်။ FTC က အမိန့်ချမှတ်တဲ့အတိုင်း ဒေါ်လာ သန်း ၁၅၀ ကို ဒဏ်ကြေးအဖြစ် ပေးဆောင်ပြီး ဖြစ်သလို ကုမ္ပဏီအနေနဲ့ သုံးစွဲသူဆီက ယူထားတဲ့ အချက်အလက်ကို အမြတ်ထုတ်တာမျိုး ရှောင်ကြဉ်သွားမယ်လို့လည်း ပြောပါတယ်။ 

Twitter ဟာ ကိုယ်ရေးအချက်အလက် အလွဲသုံးခံရတဲ့ Users တွေကိုလည်း အသိပေးသွားရမှာ ဖြစ်ပါတယ်။