စပိန်ကွင်းလယ်ကစားသမားဟာ အဝါရောင်ရေငုပ်သမားတွေနဲ့ ရင်ဆိုင်ကစားခဲ့တဲ့ တနင်္ဂနွေနေ့ညပွဲစဉ်မှာ တစ်လုံးတည်းသော အနိုင်ဂိုးကို သွင်းယူပေးခဲ့တာဖြစ်ပြီး ပယ်ဒရီဟာ ရောဘတ် လယ်ဗန်ဒေါ့ဗ်စကီးနဲ့ ဝမ်းတူးရိုက်ပြီးနောက် ဂိုးပေါက်ထဲကို ကန်သွင်းယူသွားခဲ့တာဖြစ်ပါတယ်။ ဘာစီလိုနာ ကျောနံပါတ် ၈ ဟာ လက်ရှိမှာတော့ နောက်ဆုံးကစားခဲ့တဲ့ ၅ ပွဲမှာ သွင်းဂိုး ၃ ဂိုးအထိ သွင်းယူနိုင်ခဲ့ပြီဖြစ်ပြီး ၂၀၂၁ ခုနှစ် ကိုပါဆုရှင်ဟာ တစ်နေ့ထက်တစ်နေ့ ပိုမိုကောင်းမွန်လာနေပုံပေါ်နေတာဖြစ်ပါတယ်။

ပယ်ဒရီဟာ ယခုရာသီ ဘာစီလိုနာအသင်းရဲ့ လွှမ်းမိုးမှုအရှိဆုံးကစားသမားတွေထဲက တစ်ဦးဖြစ်ခဲ့ပြီး ၂၉ ပွဲ ပါဝင်ကစားပေးထားခဲ့ရာမှာ သွင်းဂိုး ၇ ဂိုး သွင်းယူထားနိုင်ခဲ့တာ ဖြစ်ပါတယ်။ ပရိသတ်တွေဟာ ပယ်ဒရီရဲ့ ခြေစွမ်းကြောင့် လီယွန်နယ် မက်ဆီ လက်သစ်လို့ သတ်မှတ်ခဲ့ကြပြီး စပိန်ကွင်းလယ်ကြယ်ပွင့်ရဲ့ခြေထောက်ထဲမှာ ဘောလုံးရှိနေတဲ့အချိန်မှာ အာဂျင်တီးနားမှော်ဆရာနဲ့တုန်းကလို လုံခြုံစိတ်ချရတဲ့ ခံစားချက်မျိုး ခံစားခဲ့ရတာ ဖြစ်ပါတယ်။

ဒါပေမယ့်လည်း ပရိသတ်တွေဟာ ဗီလာရီးရဲလ်ကို အနိုင်ရရှိခဲ့တဲ့ပွဲစဉ်အတွင်းက ပယ်ဒရီရဲ့ စွမ်းဆောင်ရည်ကို မချီးကျူးဘဲ မနေနိုင်ခဲ့ကြတာဖြစ်ပြီး ပွဲအပြီးမှာ တွစ်တာလူမှုကွန်ရက်ပေါ်မှာ ချီးကျူးပြောဆိုမှုတွေ ပြုလုပ်ခဲ့ကြတာဖြစ်ပါတယ်။ "ပယ်ဒရီက မက်ဆီလက်သစ်ပဲ။ သူ ဘောလုံးရတဲ့အချိန်မှာ လုံခြုံတယ်လို့ ခံစားခဲ့ရတယ်။ မက်ဆီတုန်းက ခံစားခဲ့ရတဲ့အတိုင်း ထပ်တူပဲ"လို့ ပရိသတ်တစ်ဦးက ပြောကြားခဲ့ပြီး "ပယ်ဒရီ မကောင်းဘူးလို့ ပြောနေတဲ့သူတွေ မှန်ပါတယ်။ သူက အရမ်းကို ကောင်းတာပါ။ ထိပ်တန်းအဆင့်မှာ သမိုင်းဝင်ကစားသမားဘဝကို တည်ဆောက်နိုင်မယ့် ပါရမီနဲ့ ကိုယ်ရည်ကိုယ်သွေးရှိတယ်။ သူက ခေတ်တစ်ခေတ်ကို ထူထောင်ဖို့ ရည်သန်ထားတယ်။ မင်းက ကြီးမြတ်မှုအတွက် ရည်သန်ထားတဲ့သူပဲ"လို့ နောက်ထပ်ပရိသတ်တစ်ဦးကလည်း မှတ်ချက်ပေးခဲ့ပါတယ်။