LV ကြော်ငြာအတွက် မက်ဆီနဲ့ ရော်နယ်ဒိုတို့ စစ်တုရင်ကစားနေဟန်ဓာတ်ပုံကို အားလုံးမှတ်မိကြမှာပါ။ အဲဒီပုံကို ရော်နယ်ဒိုက သူ့ရဲ့ အင်စတာဂရမ်မှာ တင်ခဲ့ပြီး ပရိသတ် ၄၂ သန်းက Like ပေးခဲ့ပါတယ်။ အဲဒီဓာတ်ပုံက အင်စတာဂရမ်သမိုင်းမှာ အားကစားသမားတယောက် အများဆုံးရတဲ့ ပုံအဖြစ် မှတ်တမ်းဝင်ခဲ့တာပါ။ ဒါပေမယ့် အခု မက်ဆီက အဲဒါကို ကျော်ဖြတ်သွားခဲ့ပါပြီ။
မက်ဆီက သူ့ရဲ့ ကမ္ဘာ့ဖလားကိုင်မြှောက်နေတဲ့ ပုံကို တင်ခဲ့တာ အခုဆိုရင် ပရိသတ် သန်း ၅၀ ကျော်အထိ Like ပေးထားပြီး ကွန်မန့်ပေါင်းက ၁.၅ သန်းကျော်သွားခဲ့ပါပြီ။ ကွင်းတွင်းအောင်မြင်မှုမှာလည်း ရော်နယ်ဒိုကို ကမ္ဘာ့ဖလားနဲ့အသာစီးရသွားတဲ့ မက်ဆီက လူမှုကွန်ယက်မှာပါ ထပ်အနိုင်ယူပြီး နှစ်ထပ်ကွမ်းချန်ပီယံအဖြစ်နဲ့ ရှိနေခဲ့ပါပြီ။ ကမ္ဘာ့ဖလားကို ဆွတ်ခူးနိုင်ခဲ့မှုက မက်ဆီအတွက်တော့ အရာရာတိုင်းမှာ ခမ်းနားလှပဖို့ ဖြစ်လာခဲ့တာပါပဲ။
မက်ဆီရဲ့ အင်စတာဂရမ်အကောင့်ကလည်း Followers သန်းပေါင်း ၄၀၀ ပြည့်သွားခဲ့ပါတယ်။ အာဂျင်တီးနားမှော်ဆရာအတွက်တော့ ကျေနပ်စရာတွေက ဆက်တိုက်ဆိုသလိုကို ဖြစ်နေခဲ့တာပါ။ ကမ္ဘာ့ဖလားရွှေဘောလုံးဆုရှင်နဲ့ ချန်ပီယံဟာ လေယာဉ်ပေါ်မှာ ကမ္ဘာ့ဖလားကို ကိုင်ဆောင်ထားတဲ့ ဓာတ်ပုံကိုလည်း ထပ်တင်ခဲ့ပြီး သန်း ၃၀ အထိ Like လုပ်ထားကြပါတယ်။
အစောပိုင်းမှာ မက်ဆီက ကမ္ဘာ့ဖလားပြိုင်ပွဲပြီးရင် လက်ရွေးစင်ကစားသမားဘ၀ကနေ အနားယူမယ်လို့ ပြောဆိုထားပေမယ့် အခုအခါမှာ ချန်ပီယံတဦးအဖြစ်နဲ့ ရှေ့ဆက်ချင်သေးတယ်လို့ ဖွင့်ဟခဲ့ပါတယ်။ ကမ္ဘာ့ဖလားကို ရယူနိုင်ခဲ့ပြီးနောက် မက်ဆီတယောက် အတွေးပြောင်းသွားပုံရပြီး သူ့အသင်းဖော်တွေကလည်း မက်ဆီကို ဆက်ကစားဖို့ တောင်းဆိုမှုတွေ လုပ်ခဲ့ကြတယ်လို့ သိရပါတယ်။