အဆိုပါ အင်္ဂလန်လူမျိုးနောက်ခံလူဟောင်းဟာ ကားအာမခံကုမ္ပဏီတစ်ခုမှာ ပေါင်သိန်းဂဏန်းအထိ အကြွေးတင်သွားခဲ့ပြီးနောက် အခုလိုမျိုးပဲ လူမွဲစာရင်းသွင်းခံလိုက်ရတာပါ။ ဘရောင်းဟာ ကားအတွက် ငွေပေးချေမှုတစ်ခုမှာ အမှားအယွင်းတွေဖြစ်ပွားခဲ့ပြီး ဆက်လက်မပေးချေနိုင်ခဲ့တဲ့နောက် အခုလိုမျိုး အဖြစ်ဆိုးမျိုးနဲ့ ရင်ဆိုင်ခဲ့ရတာပါ။

ဘ‌ရောင်းကို ကူညီပေးဖို့အတွက် ယူနိုက်တက်အသင်းဖော်ဟောင်းတွေဖြစ်တဲ့ ရွန်းနီ၊ ကာရစ်တို့က ကမ်းလှမ်းခဲ့ကြောင်းလည်း သိရှိရပြီး လက်ရှိအချိန်မှာတော့ ရပ်ရှ်ဖို့ဒ်ကပါ သူ ပိုင်ဆိုင်တဲ့ အိမ်ခန်းတစ်ခန်းကို အလွန်သက်သာတဲ့ စျေးနှုန်းတစ်ခုနဲ့ ငှားရမ်းပေးဖို့ ဘရောင်းကို အသိပေးထားကြောင်း သတင်းတွေက ဖော်ပြခဲ့ပါတယ်။

သတင်းရင်းမြစ်တစ်ဦးက ဘရောင်းအနေနဲ့ ကစားသမားဘဝမှာ ငွေကြေးအများအပြား ရှာဖွေနိုင်ခဲ့ပေမယ့် သူ့ထက် လစာ (၅) ဆ ဒါမှမဟုတ် (၆) ဆလောက်ရရှိနေတဲ့ အသင်းဖော်တွေနဲ့ အပြိုင် နေထိုင်သုံးစွဲဖို့ ကြိုးစားခဲ့တာက သူ့ကို ပြဿနာဖြစ်စေခဲ့ကြောင်း ပြောကြားခဲ့ပါတယ်။ ဒါ့အပြင် ဘရောင်းက အိမ်ခြံမြေ ရင်းနှီးမြှုပ်နှံမှုတွေမှာ အမှားအယွင်းတွေ ပြုလုပ်မိခဲ့ကြောင်း သိရှိရပြီး သူပိုင်ဆိုင်ထားတဲ့ အရာအချို့ကို ဝယ်ရင်းစျေးထက် ထက်ဝက်တန်ဖိုးနဲ့ ပြန်လည်ရောင်းချခဲ့ရကြောင်း သတင်းရင်းမြစ်တွေကဆိုပါတယ်။

ဘရောင်းဟာ ယူနိုက်တက်ကစားသမားဘဝမှာ ပရီးမီးယားလိဂ်ဖလား (၅) ကြိမ်၊ ချန်ပီယံလိဂ်ဖလား၊ အက်ဖ်အေဖလား၊ လိဂ်ဖလားနဲ့ ကွန်မြူနတီဒိုင်းတို့ကို (၂) ကြိမ်စီ ဆွတ်ခူးနိုင်ခဲ့ပါတယ်။ အင်္ဂလန်လက်ရွေးစင် အသင်းအတွက်လည်း (၂၃) ပွဲ ပါဝင်ကစားပေးခဲ့ပြီး တစ်ဂိုးသွင်းယူနိုင်ခဲ့ပါသေးတယ်။