COVID-19 ဓာတ်ခွဲအတည်ပြုလူနာ နံပါတ် ၈ ဧည့်လမ်းညွှန်အမျိုးသမီးဟာ ရောဂါလက္ခဏာ မပေါ်ပေါက်မီ မတ်လ ၂၂ ရက်က ရန်ကုန်မြို့တွင်း ဗိုလ်ချုပ်ဈေး၊ တရုတ်တန်း၊ပန်းဆိုးတန်းနဲ့ ရွှေတိဂုံဘုရားတို့ကို သွားရောက်ခဲ့တယ်လို့ ကျန်းမာရေးနှင့်အားကစားဝန်ကြီးဌာနက သတင်းထုတ်ပြန်ပါတယ်။

အဆိုပါ အမျိုးသမီးဟာ လွန်ခဲ့တဲ့ ၁၄ ရက်အတွင်းပြည်ပခရီးသွားရာဇဝင်မရှိခဲ့ပေမယ့် မတ်လ ၁၄ ရက်ကနေ မတ်လ ၂၂ ရက်နေ့အထိ ပြင်သစ်နိုင်ငံသား (၁၁) ဦးနဲ့ အတူ ခရီးသွားလာခဲ့ပြီး မတ်လ ၂၅ ရက်မှာ ဖျားနာချောင်းဆိုး၊ အန်ခြင်းလက္ခဏာတွေ ခံစားခဲ့ရလို့ ရန်ကုန်ဆေးရုံကြီးမှာ ပြသပြီးစစ်ဆေးခဲ့ရာ ရောဂါပိုးရှိကြောင်း တွေ့ရှိခဲ့တာပါ။

ဧည့်လမ်းညွန်ခရီးစဉ်အတွင်း ပြင်သစ်နိုင်ငံသားတွေနဲ့ အတူ မန္တလေး၊မုံရွာ၊စစ်ကိုင်း၊ပုဂံနဲ့ ကလောမြို့တို့ကိုလည်း သွားရောက်လည်ပတ်ခဲ့တယ်လို့သိရပါတယ်။

ကျန်းမာရေးနှင့်အားကစားဝန်ကြီးဌာနရဲ့ ထုတ်ပြန်ချက်အရ လက်ရှိ မြန်မာနိုင်ငံမှာ COVID-19 Positive လူနာ (၁၄) ဦးတွေ့ရှိခဲ့တဲ့အနက် (၄) ဦးမှာ ရောဂါပိုးရှိသူတွေနဲ့ ထိတွေ့ဆက်ဆံခဲ့တဲ့သူတွေ ဖြစ်ကြောင်းသိရပါတယ်။