အိစိကွေး ကတော့ အများအကျိုးပြုဖို့ လိုအပ်တဲ့ နေရာတိုင်းမှာ ပါဝင်ကူညီပေးချင်တဲ့ ဆန္ဒရှိတယ်လို့ ဆိုပါတယ်။ လက်ရှိမှာလည်း သူဟာ ပညာရေးဘက်ကို ဦးစားပေး ဆောင်ရွက်နေသူ တစ်ယောက်ပါ။

အိစိကွေးဟာ အလှူအတန်းနဲ့ ပတ်သက်လာရင် လက်မနှေးတတ်တဲ့ လူငယ်သရုပ်ဆောင် တစ်ဦးဆိုရင်လည်း မမှားပါဘူး။ ပရဟိတ အလုပ်တွေမှာလည်း ငွေအားသာမက လူအားအနေနဲ့ပါ အမြဲတမ်းပါဝင်ဆောင်ရွက်တတ်သူ တစ်ဦးပါ။ ဒါကြောင့် အများအကျိုးကို လိုလားတဲ့သူတစ်ယောက်ဖြစ်ချင်တယ်လို့ ဆိုပါတယ်။

" မချမ်းသာဘူးဗျာ လိုအပ်လာမယ်ဆိုရင် အဆင်ပြေအောင် ဘယ်နေရာကဖြစ်ဖြစ် ဝင်ကူချင်တဲ့ သူဗျ။ လူထဲက လူဆိုပေမယ့် တန်ဖိုးရှိတဲ့လူဖြစ်ချင်တယ်။ အများကို အကျိုးပြုတဲ့ လူပဲဖြစ်ချင်တယ်။ အကူအညီ လိုအပ်လာ တိုင်း ချက်ချင်းထလုပ်ပေးနိင်တဲ့လူဖြစ်ချင်တယ်။ နိင်ငံနဲ့ ကိုယ့်မိဘ ကို အကျိုးပြုတဲ့ ယောက်ျား ကောင်းဖြစ်ချင်တယ်။ ကျွန်တော့် ကိုဘယ်လောက်ပဲဆိုးတယ်ပြောပြော အဲ့ဒီလိုပြောနေတဲ့လူတွေ လိုအပ်လာမယ်ဆိုရင် တတ်နိင်သလောက် ကူညီပေးချင်တဲ့သူ နောက်ထပ်လည်း လူတိုင်းကို အကျိုးပြုနိင်တဲ့သူဖြစ်အောင် ကြိုးစားနေဦးမယ်’’ ဆိုပြီးတော့ အောက်တိုဘာလ ၂၄ ရက်နေ့ နေ့လယ် ၁၂ နာရီကျော်က သူ့ရဲ့ ဖေ့စ်ဘွတ်စာမျက်နှာမှာ ရေးသားခဲ့ပါတယ်။

အနုပညာလှုပ်ရှားမှုတွေ သိပ်မတွေ့ရတော့တဲ့ အိစိကွေးကိုတော့ ပရိသတ်တွေက အရမ်းပဲသတိရနေ ကြမယ်လို့ထင်ပါတယ်။ သူကတော့ လက်ရှိမှာ ပညာရေးကို အဓိက ဦးစားပေးဆောင်ရွက်နေတယ်လို့ Duwun Media အင်တာဗျူးမှာ ဖြေဆိုခဲ့ပါတယ်။

‘’ ကျွန်တော်အခု ကျောင်းစာတွေပဲ အဓိက လုပ်ဖြစ်နေတယ်။ နောက်လတွေဆိုရင်တော့ အနုပညာအလုပ်တော့ နည်းနည်းပြန်လုပ်ဖို့ရှိပါတယ်။ အခုကတော့ ဥပဒေ က ဒုတိယနှစ်တက်နေတယ်၊ HNC ကတော့ ပထမနှစ်၊ နောက်တစ်ခုကတော့ ကျွန်တော် DMA (Diploma in Management & Administration) လည်းတက်နေပါတယ်။ ဒီရက်ပိုင်းထဲမှာ စာမေးပွဲတွေရှိတဲ့အတွက် အနုပညာအလုပ်ဘက်ကို သိပ်ပြီးတော့ မလှည့်ဖြစ်ဘူး။ စာမေးပွဲပြီးရင်တော့ အရင်လို အလုပ်တွေ ပြန်လုပ်ဖို့ရှိပါတယ်’’ လို့ သူကဆိုပါတယ်။

Photo: Photo:Ei Si Kwe

အိစိကွေးဟာ အနုပညာအလုပ်တွေ အားနည်းသွားပေမယ့်လည်း ပရိသတ်တွေက အားပေးနေဦးမယ်ဆိုတာကို မျှော်လင့်တယ်လို့ ပြောပါတယ်။

‘’ ပရိသတ်အားပေးမှုနည်းသွားမှာကိုတော့ စိုးရိမ်တာမျိုးမရှိဘူး။ အချိန်အတိုင်းအတာ တစ်ခုအထိတော့ ကျွန်တော် ပျောက်သွားရင် ပျောက်သွားလိမ့်မယ်။ ပညာရေးကို ဦးစားပေးမယ်၊ ကျွန်တော့်ရဲ့ လိုအပ်ချက်တွေကို ကျွန်တော် ပြန်ဖြည့်ရမယ်။ ကျွန်တော့်ရဲ့ ပုံစံအတိုင်း အချိန်အတိုင်းအတာ တစ်ခုအထိနေပြီးတော့မှ နောက်ထပ်ပုံစံတစ်မျိုးနဲ့ ပြန်ထွက်လာမယ်။ အဲဒီအတွက်လည်း အားပေးမှုနည်းသွားမှာမကြောက်ပါဘူး။ ဒီလိုပဲ မေ့နေမယ်ဆိုရင်တောင်မှ ပုံစံတစ်မျိုးနဲ့ ပြန်ထွက်လာခဲ့ရင် အရင်လိုပဲ ပြန်အားပေးကြမယ်လို့ ကျွန်တော် မျှော်လင့်ပါတယ်’’ လို့ သူကဆိုပါတယ်။

Photo:Ei Si Kwe

ကလေးသရုပ်ဆောင်ဘဝကတည်းက ပရိသတ်တွေရဲ့ အချစ်ကို ရရှိထားတဲ့ သရုပ်ဆောင် အိစိကွေးက အခုဆိုရင် ခေါင်းဆောင်မင်းသား နေရာကနေ ဇာတ်ကားတွေ ရိုက်ကူးနေရပါပြီ။ “တုနှိုင်းမရတဲ့ မေတ္တာ’’ ဆိုတဲ့ ရုပ်သံဇာတ်လမ်းတွဲကိုလည်း ရိုက်ကူးထားတာဖြစ်ပါတယ်။ လက်ရှိမှာလည်း သူဟာ သရုပ်ဆောင်အလုပ်နဲ့ ဂီတအလုပ်တွေကို မျှမျှတတ လုပ်ကိုင်ခဲ့တာတွေလည်းရှိပါတယ်။