ပွဲအပြီးမှာ အနီကတ်ပြခဲ့ရမှာလို့ အားလုံးက ဝိုင်းပြောခဲ့ကြပါတယ်။

လီဗာပူးလ်နဲ့ ၂ ဂိုးစီသရေကျခဲ့တဲ့ ပွဲအပြီးမှာတော့ ချယ်လ်ဆီးအသင်းနည်းပြတူချယ်လ်အပါအဝင် ကစားသမားတချို့က ဆာဒီယိုမာနေးကို အနီကတ်မပြသခဲ့တဲ့အပေါ် ဝေဖန်ပြစ်တင်ခဲ့ကြပါတယ်။ မာနေးဟာ ပွဲချိန်အစောပိုင်းမှာပဲ အက်ဇ်ပီလီကွီတာရဲ့ မျက်နှာကို ဖြတ်ရိုက်ခဲ့တာဖြစ်ပြိး VAR နဲ့ ပြန်လည်သုံးသပ်ခြင်းမရှိခဲ့ဘဲ အဝါကတ်သာ ပြသခံခဲ့ရတာဖြစ်ပါတယ်။ 

အဆိုပါပွဲမှာတော့ မာနေး၊ ဆာလာတို့ရဲ့ သွင်းဂိုးတွေနဲ့ လီဗာပူးလ်တို့ ၂ ဂိုးပြတ်ဥိးဆောင်နိုင်ခဲ့ပေမယ့် ချယ်လ်ဆီးက ပထမပိုင်းမှာပဲ ကိုဗာဆစ်၊ ပူလီဆစ်တို့ရဲ့ သွင်းဂိုးတွေနဲ့ ပြန်လည်ချေပနိုင်ခဲ့ပါတယ်။ ပွဲက တော်တော်လေးကြည့်ကောင်းခဲ့ပြီး ဖျော်ဖြေမှုပေးနိုင်ခဲ့ကာ တယောက်တမှတ်နဲ့ကျေနပ်ခဲ့ရလို့ အမှတ်ပေးဇယားထိပ်ဆုံးက မန်စီးတီးနဲ့ အမှတ်တော့ ပိုပြတ်သွားခဲ့ပြီဖြစ်ပါတယ်။ 


မာနေးရဲ့ ပြစ်ဒဏ်ကျူးလွန်မှုကို ခံခဲ့ရတဲ့ အက်ဇ်ပီလီကွီတာက "ဒါက အနီကတ်ပြရမယ့်ပြစ်ဒဏ်ဆိုတာ ထင်ရှားပါတယ်၊ တခါတလေကျရင် ရယ်စရာကောင်းတဲ့ ပင်နယ်တီပြစ်ဒဏ်တွေကို မြင်နေရပြီး တခါတလေကျပြန်တော့ ပြင်းထန်တဲ့အပြုအမူတွေတွက် သင့်တော်တဲ့အရေးယူမှုမျိုးမလုပ်တာကို တွေ့ရနေပါတယ်၊ ပွဲတပွဲထဲမှာတောင် တသမတ်တည်းကျတဲ့ ဆုံးဖြတ်ချက်တွေ မတွေ့ရပါဘူး" လို့ ဆိုခဲ့ပါတယ်။ 


နည်းပြတူချယ်လ်ကလည်း "ဒါက အနီကတ်ဆိုတာ ထင်ရှားနေတာပဲ၊ သူတို့က VAR လည်း ပြန်မကြည့်ခဲ့ဘူး၊ ပုံမှန်အားဖြင့် ပွဲချိန်အစောပိုင်းမှာ အနီကတ်ပြတာမျိုးကို ကျနော်မုန်းတီးပါတယ်၊ ဒါက ပွဲကိုသတ်လိုက်တာပါပဲ၊ ပရိသတ်တွေက ၁၁ ယောက်ချင်းကစားတာကို ကြည့်ဖို့လာကြတာပါ၊ မာနေးက ကွင်းထဲမှာ အမြဲတမ်းရှိသင့်တဲ့ကစားသမားမျိုးပါ၊ သူက အရမ်းကောင်းတဲ့ကစားသမားလေ၊ ဒါပေမယ့် ဒါကတော့ အနီကတ်ပါပဲ" လို့ ပြောဆိုခဲ့ပါတယ်။ 

မာနေးရဲ့ ဆီနီဂေါလက်ရွေးစင်အသင်းဖော်ဖြစ်တဲ့ ချယ်လ်ဆီးဂိုးသမားမန်ဒီကလည်း "ကျနော့် အစ်ကိုက အနီကတ်ပြခံခဲ့ရမှာပါ၊ သူ ကွင်းထဲမှာ ပွဲချိန်တမိနစ်ကတည်းက မရှိသင့်တော့ပါဘူး" လို့ ပြောဆိုခဲ့ပါတယ်။ သူတို့နှစ်ဦးကတော့ အာဖရိကပွဲအတွက် ဆီနီဂေါအသင်းနဲ့ သွားရောက်ပူးပေါင်းရမယ့်သူတွေလည်းဖြစ်ပါတယ်။ 

Share

က္က