မန်ချက်စတာယူနိုက်တက်အသင်းရဲ့ ဂိုးသမားသစ် အိုနာနာဟာ ပြီးခဲ့တဲ့ရာသီ ချန်ပီယံလိဂ်ဗိုလ်လုပွဲမှာ အင်တာမီလန်နဲ့အတူ မန်စီးတီးကို အရေးနိမ့််ခဲ့တာကို တေးမှတ်ထားတယ်လို့ ဆိုပါတယ်။ သူက မန်စီးတီးကို လက်စားချေနိုင်ဖို့အတွက် ပစ်မှတ်ထားနေတယ်လို့ သူနဲ့ နီးစပ်သူတွေက ပြောဆိုခဲ့ကြောင်းလည်း The Athletic က ဖော်ပြခဲ့ပါတယ်။
အိုနာနာဟာ ယူနိုက်တက်ကို ယူရို ၄၅ သန်းနဲ့ ပြောင်းရွှေ့လာခဲ့တာဖြစ်ပြီး လာမယ့်ရာသီ နံပါတ်တစ်ဂိုးသမားနေရာကို ရယူသွားမှာ ဖြစ်ပါတယ်။ ဒေးဗစ်ဒီဂီယာနဲ့ စာချုပ်သက်တမ်းမတိုးဘဲ လမ်းခွဲလိုက်တဲ့ ယူနိုက်တက်ဟာ အိုနာနာကို ခေါ်ယူနိုင်ဖို့အတွက် ကြိုးစားခဲ့ကာ နည်းပြတန်ဟက်ဂျ်ရဲ့ စိတ်ကြိုက်ဂိုးသမားလည်း ဖြစ်ပါတယ်။
ပြီးခဲ့တဲ့ရာသီချန်ပီယံလိဂ်ပြိုင်ပွဲမှာ အိုနာနာက အကောင်းဆုံးဂိုးသမားတဦးအဖြစ်နဲ့ လက်စွမ်းပြခဲ့ကာ အင်တာမီလန်ဂိုးပေါက်ကို အကောင်းဆုံးကာကွယ်နိုင်ခဲ့ပါတယ်။ အသင်းကစားကွက်မှာ ခံစစ်လူတဦး၊ ကွင်းလယ်လူတဦးလိုမျိုး ပါဝင်ကစားပေးနိုင်စွမ်းရှိလို့ တန်ဟက်ဂျ်လိုချင်တဲ့ အရည်အသွေးမျိုး ပြည့်၀သူလည်းဖြစ်ပါတယ်။
လက်ရှိမှာ သူက အသင်းနဲ့အတူ အမေရိကရာသီကြိုခရီးစဉ်ကို လိုက်ပါနေခဲ့ပြီဖြစ်ကာ ပူးပေါင်းလေ့ကျင့်မှုတွေကို စတင်နေပြီဖြစ်ပါတယ်။ ရက်စ်ဟမ်း၊ ရီးရဲလ်မက်ဒရစ်၊ ဒေါ့မွန်တို့နဲ့ ကစားသွားမယ့် ခြေစမ်းပွဲတွေမှာ သူ စတင် ပါဝင်လာဖွယ်ရှိမယ်လို့လည်း ယူဆရပါတယ်။