ချစ်စရာ အမူအယာလေးနဲ့ ချိုသာယာတဲ့ အသံလေးကို ပိုင်ဆိုင်ထားတဲ့ သရုပ်ဆောင်ပွင့်ဟာ အခုချိန်ထိ ပရိသတ်တွေရဲ့ အားပေးမှုကို ရရှိထားသူ တစ်ယောက်ပါ။
Photo : ပွင့် FB
လက်ရှိမှာလည်း အနုပညာအလုပ်တွေကို ပြန်လည် လုပ်ကိုင်နေသလို တစ်ဖက်မှာလည်း သူမရဲ့ ကိုယ်ပိုင် စီးပွားရေးအတွက် အားစိုက် ကြိုးစားနေသူ တစ်ဦးပါ။
လွန်ခဲ့တဲ့ လပိုင်းလောက်က လူမှုကွန်ယက် စာမျက်နှာပေါ်မှာ ပွင့် အိမ်ထောင် ကျသွားပြီဆိုတဲ့သတင်းအမှားတွေ တက်လာခဲ့ပေမယ့်လည်း လက်ရှိမှာ တစ်ဦးတည်း အပျိုကြီးဘဝနဲ့ မိခင်ကို အလုပ်အကျွေးပြုနေသူ တစ်ယောက်ဖြစ်ပါတယ်။
“ကိုယ်က အိမ်ရှင်မ တာဝန်ကို နိုင်တယ်ဆိုပေမယ့်လည်း အိမ်ထောင့်တာဝန်တွေ မယား ဝတ္တရားတွေ မကျေပွန် နိုင်တဲ့အတွက် မေမေ့ရဲ့ ဘေဘီလေးပဲ လုပ်ဦးမှာပါ။ သူငယ်ချင်းတွေက ပြောတယ် အရမ်းတာဝန်ကြီးတာတဲ့ အိမ်ရှင်မ လုပ်ဖို့တော့ မစဥ်းစားပါဘူး။ အရမ်းကြီး တည်ငြိမ်နေလားဆိုတော့လည်း မဟုတ်ပါဘူး၊ တစ်စုံတစ်ယောက်ကို ရွေးချယ်လိုက်ရင် စျေး ဗန်းခင်းလို့မရဘူးလေ ကိုယ်က စျေးဗန်းခင်းရတာ ကြိုက်တော့လေ။ မေမေကလည်း အိမ်ထောင်ပြုဖို့ မတိုက်တွန်းသလို သူငယ်ချင်းတွေကလည်း အိမ်ထောင် ပြုဖို့ မတိုက်တွန်းကြဘူး” ဆိုပြီး သူမရဲ့ အချစ်ရေးနဲ့ ပတ်သတ်ပြီး ပြောပြခဲ့ပါတယ်။
Photo : ပွင့် FB
ငယ်စဥ်ကတည်းက အချက်အပြုတ်ကို စိတ်ဝင်စားခဲ့တဲ့ သူမဟာ အခုလက်ရှိမှာတော့ “ဘေဘီပွင့်လက်ရာ” ဆိုတဲ့ နာမည်လေးနဲ့ စားဖွယ်စုံလေးတွေကို ချက်ပြုတ်ပြီး ကိုယ်ပိုင်စီးပွားရေး လုပ်ကိုင်နေတာ တွေ့ရပါတယ်။
“ပွင့်က ငယ်ငယ်ကတည်းက အချက်အပြုတ်ကို ဝါသနာပါတယ်၊ ကိုယ်ကိုတိုင်စားရတာလည်း ကြိုက်သလို သူများကို ချက်ကျွေးရတာလည်း ကြိုက်တော့ အိမ်မှာဆို အမြဲတမ်းကိုယ်ပဲ ချက်တယ်။ မေမေ့ကိုလည်း စားစရာလေးတွေ လုပ်ကျွေးဖြစ်တယ်။ တစ်ခါတစ်ခါ အိမ်မှာစားဖို့ ချက်တာလေးတွေကို ဖေ့စ်ဘွတ်ပေါ် တင်ဖြစ်ရင်ပရိသတ်တွေက သူတို့လည်း စားချင်လို့ အော်ဒါမှာတွေလည်း ရှိတော့ နောက်ပိုင်း အိမ်မှာ ချက်စားတဲ့ဟာလေးတွေကိုရင် ရောင်းရန်မဟုတ်ဆိုတဲ့ စာလေးနဲ့ပါ တွဲတွဲတင်ရတယ်။ ပွင့်ရဲ့ စားဖွယ်စုံလေးကနေ ငါးခြောက်ငါးခြမ်းတွေဆိုလည်း နိုင်ငံခြားထိ ပို့ရတာတွေရှိတယ်၊ အားပေးကြတဲ့ ပရိသတ်တွေကိုလည်း ကျေးဇူးတင်ပါတယ်” လို့ သူက ဆိုပါတယ်။
ပွင့်ရဲ့ ကိုယ်ပိုင်စီးပွားရေးလေး ဖြစ်တဲ့ “ဘေဘီပွင့်” စားဖွယ်စုံမှာဆိုရင် ဟင်းအမျိုးပေါင်း (၃၀) ကျော် ချက်ပြုတ်ရောင်းချပေးနေပြီး ထိုင်းနဲ့ မလေးရှားအထိပါ ပို့ဆောင်ပေးလျက်ရှိပြီး ပရိသတ်တွေ အားပေးမှု ရရှိထားတဲ့ လုပ်ငန်းလေး တစ်ခုလည်း ဖြစ်ပါတယ်။
သရုပ်ဆောင်ပွင့်ကတော့ ကျရာဇာတ်ရုပ်ကို အပီအပြင်သရုပ်ဆောင်နိုင်တဲ့ သရုပ်ဆောင် တစ်ယောက်ဆိုလည်း မမှားပါဘူး။ သူမဟာ “ဝင်းဝင်းဖယောင်းတိုင်”၊”ဂေါ်ဇီလာ”ကြော်ငြာလေးကစပြီး ပရိသတ်တွေရဲ့ ချစ်ခင်အားပေးမှုကို ရရှိထားသူ တစ်ယောက်ပါ။ပွင့်ဟာ သရုပ်ဆောင် ဘက်မှာသာမက ဂီတဘက်မှာပါ ဝါသနာ ပါသူ တစ်ဦးပါ။ ”၂၀၁၈” ခုနှစ်ကတည်း”ဘေဘီပွင့်” ဆိုတဲ့ တစ်ကိုယ်တော်အခွေလေးကို ထွက်ရှိခဲ့ပြီး ပရိသတ်ရဲ့ အားပေးမှု ရရှိခဲ့တာ တွေ့ရပါတယ်။ လက်ရှိမှာလည်း ကြော်ငြာလေးတွေ ရိုက်ကူးလျက်ပြီး ပရိသတ်တွေအတွက် အနုပညာအလုပ်တွေ ဆက်လက်ကြိုးစားသွားမှာ ဖြစ်လို့ အားပေးဖို့ကိုလည်း တောင်းဆိုထားပါသေးတယ်။
Share