နောက်ရက်တွေမှာလည်း ဆက်လက်ဝင်ရောက်လာဖို့ရှိနေပြီး ပြန်ဝင်လာသူအားလုံးကို Quarantine စုစုပေါင်း ၂၈ရက်ဝင်ဖို့ အစိုးရက ညွှန်ကြားထားပါတယ်။

မေလ ၁ရက်တည်းမှာပဲ မြန်မာနိုင်ငံကို နယ်စပ်ဒေသများကတဆင့် ပြန်ဝင်လာတဲ့ ပြည်တော်ပြန် အရေအတွက် ၉၀၀ ဝန်းကျင်ခန့်ရှိနေကြောင်းကို နယ်စပ် ၃ နေရာက ဝင်လာတဲ့ အရေအတွက်များအရ သိရပါတယ်။

နယ်စပ်ဂိတ်တွေ ဖြစ်တဲ့ တရုတ်-မြန်မာနယ်စပ် မူဆယ်က နန်းတော်ဂိတ်၊တရုတ်-မြန်မာနယ်စပ်နောက်ထပ် တစ်ခုဖြစ်တဲ့ မိုင်းလားဂိတ်နဲ့ ထိုင်း-မြန်မာ နယ်စပ်ဖြစ်တဲ့ မြဝတီတို့မှ အသီးသီးဝင်ရောက်လာကြတာပါ။

မူဆယ်ဂိတ်ကနေ ပြန်ဝင်လာသူတွေကို ကျန်းမာရေးဌာနဲ့လဝကတို့ပူးပေါင်းပြီး စစ်ဆေးမှုတွေ ပြုလုပ်ကာ Quarantine ဝင်ဖို့ လိုအပ်သူတွေကိုလည်း မူဆယ်မှာQuarantine ထားရှိဆောင်ရွက်လျက်ရှိပြီး နေထိုင်၊စား သောက်စရိတ်ငြိမ်းနဲ့ သက်ဆိုင်ရာဒေသကိုပြန်ဖို့အတွက်လည်း မူဆယ်မြို့က သက်ဆိုင် ရာတာဝန်ရှိသူတွေက ကားစီစဥ်ပေးထားတယ်လို့ ဦးသောင်းထွန်းရဲ့ ပြောပြချက်အရသိရပါသေးတယ်။

နောက်ထပ် တရုတ်-မြန်မာနယ်စပ်တစ်ခုဖြစ်တဲ့ မိုင်းလားဖက်ကနေလည်း ဒီကနေ မေလ ၁ရက်နေ့မှာ ပြန်ဝင်လာသူ ၅၆၆ဦးရှိပြီး ဒီတစ်ကြိမ်ပြန်လာသူတွေက ဒုတိယအသုတ်အဖြစ် ပေးဝင်တဲ့အသုတ်လို့လည်းသိရပါတယ်။

ပထမအသုတ်တုန်းက စုစုပေါင်း ၂၇၇ဦးပြန်လာခဲ့တယ်လို့သိရပြီး နောက်ထပ် ဝင်လာဖို့အတွက် မိုင်းလားဒေသမှာ Quarantine ဝင်နေသူပေါင်း ၃၀၀၀ကျော်ရှိနေသလို ၂၀၀၀ကျော်လည်း နေရပ်ပြန်ဖို့ ရှိနေသေးကြောင်း ရှမ်းပြည် နယ် အစိုးရအဖွဲ့ကတဆင့် သိရပါတယ်။

ထိုင်း-မြန်မာနယ်စပ်ဖြစ်တဲ့ မြဝတီဖက်ကနေလည်း ဒီကနေ့မှာ အယောက် ၆၀လောက်ပြန်လာတယ်လို့သိရပြီး ပဲခူးတိုင်းကိုပြန်မယ့်သူ ၃၄ဦး၊မွန်ပြည်နယ်ကိုပြန်မယ့်သူ ၁၀တို့ကိုတော့ သက်ဆိုင်ရာ Quarantine နေရာတွေကို ပိုဆောင်ခဲ့ပြီး ကျန်တဲ့တိုင်းနဲ့ပြည်နယ်က လူအချို့ကိုတော့ မြဝတီက Quarantine နေရာမှာ ထားရှိထားတယ်လို့ လည်း မြဝတီခရိုင် အုပ်ချုပ်ရေးမှူး ဦးတေဇာအောင်က Duwunကိုပြောပါတယ်။