မလေးရှားမြို့တစ်မြို့ရှိ ဖျော်ဖြေရေးစင်တာတစ်ခုမှာ မီးလောင်မှုဖြစ်ပွားခဲ့ပြီး လူခြောက်ဦးထက်မနည်း သေဆုံးခဲ့ကြောင်း သိရပါတယ်။ ယနေ့ (ဖေဖေါ်ဝါရီ ၂၀ ရက်) မနက်ပိင်းက Ipoh မြို့ရှိ ဖျော်ဖြေရေးစင်တာမှာ မီးလောင်မှုဖြစ်ပွားခဲ့ပါတယ်။
(Photo: The Star Online)
မီးလောင်မှုအတွင်း သေဆုံးခဲ့သူတွေဟာ အမျိုးသားလေးဦးနဲ့ အမျိုးသမီးနှစ်ဦး ဖြစ်တယ်လို့ မီးသတ်ဌာနက ပြောပါတယ်။ သေဆုံးသူတွေအနက် အမျိုးသားတစ်ဦးဟာ ဘင်္ဂလားဒေ့ရှ်နိုင်ငံသားဖြစ်ပြီ အမျိုးသမီးနှစ်ဦးက ဗီယက်နမ်တွေဖြစ်တယ်လို့ ဆိုပါတယ်။ သေဆုံးခဲ့သူတွေဟာ အသက် ၃၆ နှစ်နဲ့ ၃၇ နှစ်အရွယ်တွေ ဖြစ်ကြကြောင်းနဲ့ မီးခိုးများကြောင့် အသက်ရှူကျပ်ကာ သေဆုံးခဲ့တယ်လို့ ယုံကြရပါတယ်။
(Photo: Bernama)
မီးလောင်မှုကြောင့် နောက်ထပ် အသက် ၃၉ နှစ်အရွယ် အမျိုးသားတစ်ဦးဟာလည်း စိုးရိမ်ရတဲ့ အခြေအနေဖြစ်ပါတယ်။ Ipho မြို့ Jalan Raja Dr Nazrin Shah မှာရှိတဲ့ ဖျော်ဖြေရေးစင်တာ စတုတ္ထထပ်မှာ မီးလောင်မှုဖြစ်ပွားကြောင်း ယနေ့မနက် ၅ နာရီ ၅၀ မိနစ်ခန့်မှာ အကြောင်းကြားမှု လက်ခံရရှိခဲ့တယ်လို့ မီးသတ်ဌာနက ပြောပါတယ်။
မီးလောင်မှုအတွင်း သေဆုံးသူ သုံးဦးရဲ့အလောင်းတွေကို သန့်စင်ခန်းတစ်ခုအတွင်း တွေ့ခဲ့ရပြီး နောက်ထပ်သေဆုံးသူတစ်ဦးရဲ့ အလောင်းကိုတော့ ကာရာအိုကေခန်းမမှာ တွေ့ခဲ့ရတယ်လို့ မီးသတ်ဌာန ပြောခွင့်ရပုဂ္ဂိုလ်က ပြောခဲ့ပါတယ်။ မီးသတ်သမား ၃၉ ဦးက မီးလောင်မှုကို ငြှိမ်းသတ်ခဲ့ကြပြီး အဆောက်အအုံအတွင်း မီးခိုးများထူထပ်စွာရှိနေတာ ကြုံခဲ့ရပါတယ်။
(Photo: The Star Online)
မီးသတ်သမားတွေက အဆောက်အအုံထဲမှာ ပိတ်မိနေသူတွေကို အပြင်ထွက်နိုင်ရန် ကူညီပေးခဲ့ကြောင်းနဲ့ ပိတ်မိနေသူတွေအနက် ၁၀ ဦးဟာ မလေးရှားနိုင်ငံသားတွေ ဖြစ်တယ်လို့ဆိုပါတယ်။ လက်ရှိမှာ အဆောက်အအုံအတွင်း ပိတ်မိနေသူတွေရှိ မရှိ လိုက်လံစစ်ဆေးနေဆဲဖြစ်ပြီး ရှာဖွေကယ်ဆယ်ရေးလုပ်ငန်းပြီးပါက သတင်းစာရှင်းလင်းပွဲ ပြုလုပ်သွားမယ်လို့ The Star အွန်လိုင်းသတင်းဌာနက ဖော်ပြထားပါတယ်။