တခြား ဘာသာပြန်မော်ဒယ်တွေ ၇၀% အထိ ပိုသာလွန်တယ်လို့ ဆိုပါတယ်

Facebook မိခင်ကုမ္ပဏီ Meta ဟာ ရာနဲ့ချီတဲ့ ဘာသာစကားတွေကို စကားပြန်လုပ်နိုင်မယ့် ပရောဂျက်တစ်ခု လုပ်ဆောင်နေပါတယ်။ 

Meta ရဲ့ AI model တစ်ခုဟာ ဘာသာစကားပေါင်း ၂၀၀ ကျော်ကို ဘာသာပြန်နိုင်စွမ်း ရှိမယ်လို့ ဆိုပါတယ်။ နိုင်ငံတကာစကားပြန်စနစ်တစ်ခု တည်ဆောက်နေတဲ့အကြောင်းကို အခုနှစ် နှစ်ဆန်းပိုင်းကတည်းက Meta က ကြေညာခဲ့တာပါ။ ကမ္ဘာ့အဆန်းသစ်ဆုံးနည်းပညာတချို့ သုံးပြီး တစ်ကမ္ဘာလုံး အပြန်အလှန်ဆက်သွယ်နိုင်ရေးမစ်ရှင် စီမံကိန်းတစ်ခုကို Meta လုပ်ငန်းစုက အကောင်အထည်ဖော်နေတာ ဖြစ်ပါတယ်။



Photo : mixed-news


Meta ဟာ ဘာသာစကားအမျိုးမျိုးအကြား ချောချောမောမော ဘာသာပြန်နိုင်ဖို့ AI ကို လေ့ကျင့်သင်ကြားပေးနေတဲ့ No Language Left Behind (NLLB) ပရောဂျက်ကို ပြီးခဲ့တဲ့ ၆ လကတည်းက စတင်ထားတာပါ။ ဗုဒ္ဓဟူးနေ့က ကုမ္ပဏီရဲ့ ထုတ်ပြန်ချက်ထဲမှာ NLLB-200 ပရောဂျက်ဟာ ဘာသာစကား ၂၀၀ ကို တိုက်ရိုက်ပြန်ဆိုမှု လုပ်နိုင်ပြီလို့ ဖော်ပြထားပါတယ်။ ဒီဘာသာစကား ၂၀၀ ထဲမှာ လူပြောနည်းတဲ့ ဘာသာစကားတွေလည်း အတော်များများ ပါဝင်ပါတယ်။ 

NLLB Model ဟာ လူသုံးနည်းတဲ့ အာရှနဲ့ အာဖရိကတလွှားက လာအိုနဲ့ ကမ်ဘာလို ဘာသာစကားတွေအပါအဝင် ဘာသာစကား ၂၀၀ ကို အပြန်အလှန် ပြန်ဆိုပေးနိုင်တယ်လို့ ဆိုပါတယ်။ စမ်းသပ်ချက်အရ NLLB-200 မော်ဒယ်ဟာ အာဖရိကဘာသာစကား ၅၅ မျိုးကို စိတ်ချရတဲ့ အရည်အသွေးမြင့် ရလဒ်တွေကို ဘာသာပြန်နိုင်စွမ်း ရှိတယ်လို့လည်း ကုမ္ပဏီရဲ့ ဘလော့ဂ်ပို့စ်မှာ ပြောထားပါတယ်။ Meta ရဲ့ AI မော်ဒယ်ဟာ လက်ရှိနောက်ဆုံးပေါ် အဆင့်မြင့်မော်ဒယ်တွေထက် FLORES-101 Benchmark စွမ်းဆောင်ရည်အကဲဖြတ်ချက်မှာ ပျမ်းမျှ ၄၄% ပိုသာလွန်ပြီး တချို့အာဖရိကန်နဲ့ အိန္ဒိယဒေသိယစကားတွေမှာ ၇၀% အထိ ပိုတိကျသာလွန်မှု ရှိတယ်လို့ ဆိုပါတယ်။

Photo : Engadget


ဒီဘာသာပြန်စနစ်ကို တစ်ကမ္ဘာလုံးက လူတွေ အတူတူ ပူးပေါင်းနိုင်မယ့် Metaverse ထဲမှာ သုံးဖို့ ရည်ရွယ်ထားတာ ဖြစ်ပြီး Metaverse မှာ အသုံးမချခင် Facebook နဲ့ Instagram ပေါ် ဘာသာပြန်ဆိုမှုတွေ ပိုကောင်းအောင် ဒီနည်းပညာကို သုံးသွားမယ်လို့လည်း ကုမ္ပဏီက ပြောပါတယ်။ ဒီ Model ကို Open-source AI ပရောဂျက်အနေနဲ့ တည်ဆောက်ထားတာ ဖြစ်ပြီး လူတိုင်း အသုံးပြုနိုင်အောင် Github ပေါ်မှာလည်း တင်ပေးထားတယ်လို့ ဆိုပါတယ်။ 

ဘာသာပြန်နည်းပညာသစ်ကို လက်တွေ့ Real-World အသုံးချနိုင်ဖို့အတွက် အမြတ်အစွန်းမယူတဲ့ အဖွဲ့အစည်းတွေမှာ ဒေါ်လာ ၂ သိန်းအထိ ထောက်ပံ့သွားမယ်လို့လည်း ကုမ္ပဏီက ကြေညာထားပါတယ်။ လောလောဆယ် Meta ရဲ့ AI ဘာသာပြန်စနစ်ကို Wikipedia ပေါ်က ဘာသာစကားတစ်ခုနဲ့ ရေးထားတဲ့ ဆောင်းပါးတွေကို တခြားဘာသာစကားနဲ့ ဘာသာပြန်ရာမှာလည်း စမ်းသပ်အသုံးချနေတယ်လို့ ဆိုပါတယ်။

Share

Loading Next Article...
က္က