အထူးသဖြင့် ကူကူရယ်လာ၊ ကူလီဘလီ၊ ဂယ်လာဂါတို့က လိဒ်စ်ကစားသမားတွေရဲ့ Pressing အောက်မှာ တော်တော်လေး ရုန်းကန်ခဲ့ရပြီး အမှားအယွင်းတွေများခဲ့ပါတယ်။ ချဲလ်ဆီးတို့ ကစားကွက်တည်နိုင်ဖို့၊ ပွဲကို လွှမ်းမိုးနိုင်ဖို့ အချိန်ယူခဲ့ရပါတယ်။ တဖြည်းဖြည်းကစားကွက်စီးလာတဲ့အချိန်မှာတော့ မန်ဒီရဲ့မမျှော်လင့်ထားတဲ့ အမှားကြောင့် ချဲလ်ဆီးတို့ ဦးကျိုးခဲ့ရတာပါ။

မန်ဒီက မလိုအပ်ဘဲ အချိန်ဆွဲ ဘောလုံးကိုင်ထားရင်းက ပြိုင်ဘက် အာရွန်ဆင်ဆီ ဘောလုံးပါသွားပြီး လွတ်လွတ်ကျွတ်ကျွတ် ဂိုးပေးလိုက်ရတာဖြစ်ပါတယ်။ အဲ့ဒီနောက် (၄) မိနစ်အကြာမှာပဲ ချဲလ်ဆီးတို့ နောက်တဂိုးထပ်ပေးခဲ့ရပါတယ်။ ပြစ်ဒဏ်ဘောကတဆင့် ဟာရီဆင်ကန်တင်ပေးတာကို ရိုဒရီဂိုက ခေါင်းတိုက်သွင်းယူခဲ့တာပါ။

ဖြတ်တင်ဘောကတဆင့် ရိုဒရီဂိုဆီက လျှံထွက်လာတဲ့ဘောလုံးကို ဟာရီဆင်က ပိတ်သွင်းခဲ့ပြီး သုံးဂိုးမြောက်၊ ပွဲသိမ်းဂိုးသွင်းယူပေးခဲ့တာဖြစ်ပါတယ်။ ချဲလ်ဆီးရဲ့ ဒီကနေ့ခြေစွမ်းကတော့ လိုအပ်ချက်တွေ များပြားခဲ့ပြီး ပွဲပြီးခါနီးမှာလည်း ကူလီဘလီ နှစ်ဝါတနီနဲ့ အထုတ်ခံခဲ့ရပါတယ်။ ချဲလ်ဆီးအတွက်တော့ နှစ်ပွဲဆက်နိုင်ပွဲပျောက်ခဲ့တဲ့အပြင် ဒီရာသီ ပထမဆုံးရှုံးပွဲနဲ့ပါ ရင်ဆိုင်ခဲ့ရပါတယ်။

တချိန်တည်းကစားခဲ့တဲ့ ဝက်စ်ဟမ်းနဲ့ဘရိုက်တန်တို့ရဲ့ပွဲမှာလည်း ဧည့်သည်ဘရိုက်တန်ကို ဝက်စ်ဟမ်းကို နှစ်ဂိုးပြတ်နဲ့ အနိုင်ရရှိခဲ့ပါတယ်။ ဘရိုက်တန်အတွက် ဂိုးတွေကို မက်အယ်လစ်စတာ၊ ထရော့ဆက်တို့က သွင်းယူပေးခဲ့ပြီး ယူနိုက်တက်၊ ဝက်စ်ဟမ်းတို့ကို အဝေးကွင်းမှာ အနိုင်ယူခဲ့တာပါ။ မိုယက်စ်ရဲ့ဝက်စ်ဟမ်းကတော့ သုံးပွဲကစားပြီးချိန်မှာ သုံးပွဲလုံးရှုံးနိမ့်ထားပြီး တော်တော်လေး အခြေအနေဆိုးနေပါတယ်။