တော့တင်ဟမ်ဟော့စပါး ကွင်းလယ်ကြယ်ပွင့်ဟောင်း ရာဖေးလ် ဗန်ဒါ ဗတ်က လီယွန်နယ် မက်ဆီအနေနဲ့ မန်ချက်စတာစီးတီးအသင်းနဲ့ ယှဉ်ပြိုင်ကစားခဲ့တဲ့ပွဲစဉ်က ၎င်းရဲ့ စွမ်းဆောင်ရည်ကြောင့် အရှက်ရသင့်တယ်လို့ ပြောကြားခဲ့ပါတယ်။
မက်ဆီဟာ ပီအက်စ်ဂျီအသင်းမှာ ခက်ခက်ခဲခဲ ကစားသမားဘဝကို စတင်ခဲ့ရသူဖြစ်ပြီး ပြီးခဲ့တဲ့နွေရာသီမှာ ဘာစီလိုနာကနေ အံ့အားသင့်ဖွယ် ပြောင်းရွှေ့လာခဲ့ပြီးနောက်ပိုင်း ၁၀ ပွဲမှာ ၄ ဂိုးသာ သွင်းယူထားနိုင်သေးတာဖြစ်ပါတယ်။ အာဂျင်တီးနားကြယ်ပွင့်တိုက်စစ်မှူးကို ခေါ်ယူရရှိခဲ့တာက တိုက်စစ်မှာ နေမာ၊ အမ်ဘာပေတို့ကို ပိုင်ဆိုင်ထားတဲ့ ပီအက်စ်ဂျီအသင်းအတွက် အတိုင်းထက်အလွန် ဖြစ်ခဲ့တာ ဖြစ်ပါတယ်။
ဒါပေမယ့်လည်း လီဂူးဝမ်းထိပ်သီးအသင်းကြီးဟာ ကြယ်ပွင့်တိုက်စစ်မှူး ၃ ဦးဆီကနေ အကောင်းဆုံးသွင်းဂိုးတွေကို များများစားစား မြင်တွေ့ရခြင်းမရှိသေးတာဖြစ်ပြီး အထူးသဖြင့် မန်ချက်စတာစီးတီးနဲ့ ယှဉ်ပြိုင်ကစားခဲ့တဲ့ ဗုဒ္ဓဟူးနေ့ညပွဲစဉ်မှာ ဘာမှ ထူးထူးခြားခြား မလုပ်ပြနိုင်ခဲ့တာဖြစ်ပါတယ်။ ပီအက်စ်ဂျီကြယ်ပွင့်တိုက်စစ်မှူးတွေဟာ အီတီဟတ်မှာ ၂-၁ နဲ့ ရှုံးနိမ့်ခဲ့မှုကြောင့် အကြီးအကျယ် ပြစ်တင်ဝေဖန်မှုတွေ ခံခဲ့ရပြီး ဒတ်ချ်ကွင်းလယ်ကစားသမားဟောင်း ရာဖေးလ် ဗန်ဒါဗတ်က မက်ဆီအနေနဲ့ မကြာသေးမီက ၎င်းရဲ့စွမ်းဆောင်ရည်ကြောင့် အရှက်ရသင့်တယ်လို့ ပြောကြားခဲ့ပါတယ်။
"သူ ဒီတိုင်း လမ်းလေးလျှောက်နေပြီး ကျွန်တော်တွေးမိတာက 'အရှက်မရဘူးလား'ပေါ့။ ကျွန်တော် မက်ဆီနဲ့ပတ်သက်ပြီး စပြီး ဒေါသတွေ ထွက်လာပြီ။ ဒါက အရှက်ရစရာပဲ။ ဘာလို့လဲဆိုတော့ သူ့လိုမျိုး ကစားသမားမျိုးက နောက်ထပ်မွေးဖွားလာတော့မှာမဟုတ်လို့ပါ"
"အဲဒါက ရော်နယ် ကိုးမန်းနဲ့ စတင်ခဲ့တာပါ။ အဲဒါက အမှန်တော့ အလုပ်လုပ်ဖို့ ငြင်းပယ်မှုဖြစ်ခဲ့ပြီး မက်ဆီလို ကစားသမားမျိုးအတွက် အဲဒါက မမှန်ကန်ပါဘူး။ အဲဒါက စိတ်ထဲမှာ မေးခွန်းထုတ်ရမှာပါ။ ခင်ဗျား ကစားချင်လား ဒါမှမဟုတ် မကစားချင်ဘူးလား။ သူ ဂိုးမသွင်းဘူး ဒါမှမဟုတ် ဂိုးဖန်တီးမှု မလုပ်ဘူးဆိုရင် သူ ဆိုးရွားတဲ့ပွဲတစ်ပွဲကို ကစားခဲ့တာပဲ"
"နေမာကျတော့ မတူညီပါဘူး။ သူ့ကို အဲဒီလိုမမြင်ကြဘူး။ အမ်ဘာပေကိုရောပဲ။ ဘယ်လိုနည်းနဲ့မဆို မက်ဆီနဲ့ ပီအက်စ်ဂျီက လုံးဝကို အဆင်မပြေပါဘူး"လို့ Ziggo Sports ကို ပြောကြားခဲ့ပါတယ်။ မက်ဆီနဲ့ ရော်နယ်လ်ဒိုတို့ဟာ ၎င်းတို့ရဲ့ ကစားသမားဘဝအများစုမှာ ဖြစ်ပျက်ခဲ့တဲ့အတိုင်း ပြီးခဲ့တဲ့နွေရာသီအပြောင်းအရွှေ့နောက်ပိုင်း တစ်ယောက်နဲ့တစ်ယောက် ဆက်လက် နှိုင်းယှဉ်ခြင်းခံနေရတာဖြစ်ပါတယ်။
ရော်နယ်လ်ဒိုဟာ မန်ချက်စတာယူနိုက်တက်ကို ပြန်လည်ပြောင်းရွှေ့ပြီးကတည်းက ၁၀ ဂိုး သွင်းယူထားပေးမယ့် လုပ်အားနှုန်း မရှိခြင်းနဲ့ ဘောလုံး ရယူနိုင်ဖို့အတွက် ဖိအားမပေးနိုင်ခြင်းတို့အတွက် ပြစ်တင်ဝေဖန်ခံခဲ့ရတာဖြစ်ပါတယ်။ ဒါပေမယ့်လည်း ဗန်ဒါဗတ်က ပေါ်တူဂီကြယ်ပွင့်တိုက်စစ်မှူးဟာ အသင်းကို အဆင့်အသစ်တစ်ခုကို ရောက်ရှိနိုင်အောင် မက်ဆီထက်စာရင် အများကြီး ကူညီပေးနေတယ်လို့ ယုံကြည်နေတာဖြစ်ပါတယ်။
"သူတို့တွေက လုံးဝကို ကွဲပြားခြားနားတဲ့ ကစားသမားတွေပါ။ ဒါပေမယ့် ရော်နယ်လ်ဒိုက တိုက်ပွဲဝင်နေပါတယ်။ သူက အသင်းကို အဆင့်အတန်းအသစ်တစ်ခုကို ရောက်အောင် သယ်ဆောင်သွားချင်ပါတယ်"လို့ ထပ်လောင်းပြောကြားခဲ့ပါတယ်။