ပြင်သစ် Coupe de France ပွဲစဉ်မှာတော့ ပီအက်စ်ဂျီတို့ မာဆေးလ်ကို အရေးနိမ့်ပြီး ၁၆ သင်းအဆင့်ကနေ လှည့်ပြန်ခဲ့ရပါပြီ။ အဝေးကွင်းမှာ ၂-၁ နဲ့ အရေးနိမ့်ခဲ့တာဖြစ်ပြီး မာဆေးလ်အတွက် ပင်နယ်တီကနေ အလက်ဆစ်ဆန်းချက်ဇ်က ဦးဆောင်ဂိုးသွင်းပေးခဲ့တာကို ရာမို့စ်က ပြန်ချေပနိုင်ခဲ့ပေမယ့် ဒုတိယပိုင်းမှာတော့ အနိုင်ဂိုးထပ်မံပေးခဲ့ရပြီး အရေးနိမ့်သွားခဲ့တာဖြစ်ပါတယ်။
ဒီပွဲမှာတော့ မက်ဆီဟာ သူ့ရဲ့ နာမည်ကျော် ကျောနံပါတ် ၁၀ ကို ဝတ်ဆင်ကစားခွင့်ရခဲ့ပါတယ်။ ဒီဖလားပြိုင်ပွဲရဲ့ စည်းကမ်းအရ အသင်းတသင်းရဲ့ ကစားသမားတွေဟာ နံပါတ် ၁ ကနေ ၁၁ ကိုသာ အစဉ်လိုက်ဝတ်ဆင်ကစားရတာဖြစ်လို့ ပီအက်စ်ဂျီမှာ နံပါတ် ၃၀ ဝတ်ဆင်နေတဲ့ မက်ဆီက နံပါတ် ၁၀ ကို ဝတ်ဆင်ခဲ့ပြီး နေမာကတော့ ၁၁ ကို ပြောင်းလဲဝတ်ဆင်ခဲ့ပါတယ်။
ဒါပေမယ့်လည်း သူတို့နှစ်ယောက်စလုံး အားထုတ်ကြိုးပမ်းခဲ့ပေမယ့် အသင်းကို ကယ်တင်ပေးနိုင်ခြင်းမရှိဘဲ အရေးနိမ့်ခဲ့ကာ ဖလားတလုံးကို လက်လွှတ်လိုက်ရပြီဖြစ်ပါတယ်။ လီဂူးမှာလည်း ရလဒ်တွေကျဆင်းလာတဲ့ ပီအက်စ်ဂျီတို့ ဖိအားတွေရှိနေခဲ့ပြီဖြစ်ကာ ဒီလိုပုံစံအတိုင်းသာဖြစ်နေမယ်ဆိုရင် အမှတ်ပေးဖလားအတွက်လည်း စိုးရိမ်စရာကောင်းနေပါပြီ။
မက်ဆီကတော့ သူ့ရဲ့ ကစားသမားဘ၀မှာ ဝင်ရောက်ယှဉ်ပြိုင်ဖူးတဲ့ ပြိုင်ပွဲတိုင်းမှာ ချန်ပီယံဖြစ်ခဲ့ပါတယ်။ ဒါပေမယ့် Coupe de France ပြိုင်ပွဲမှာတော့ သူ အနိုင်ရဖူးခြင်းမရှိသေးပါဘူး။ ပြီးခဲ့တဲ့ရာသီကလည်း ဒီဖလားကို လက်လွှတ်ခဲ့ရပြီး အခုရာသီမှာလည်း စောစောစီးစီးပဲ ထွက်ခွာခဲ့ရလို့ သူ မရဖူးနိုင်တဲ့ တခုတည်းသောဆုဖလားအဖြစ် ဆက်လက်ရှိနေဆဲဖြစ်ပါတယ်။
ပြင်သစ်လီဂူးမှာလည်း ပီအက်စ်ဂျီကို ၈ မှတ်အကွာနဲ့ မာဆေးလ်က ဖိအားပေးနေပြီး ချန်ပီယံလိဂ်မှာ ဘိုင်ယန်မြူးနစ်နဲ့ ရင်ဆိုင်ရဦးမှာမို့ ဂဲလ်တီယာအတွက်တော့ ခက်ခဲတဲ့ နေ့ရက်တွေကို ကျော်ဖြတ်ပြရဦးမှာပါ။ လက်ရှိမှာ သူတို့အသင်းခြေစွမ်းက ကျဆင်းနေလို့ ပရိသတ်တွေ စိုးရိမ်နေရပြီး ဘိုင်ယန်နဲ့ပွဲကို ဘတ်ပီက ဒဏ်ရာကြောင့် လွဲချော်ဦးမှာဖြစ်ပါတယ်။