အယ်လ်ဟီလယ်နဲ့ပွဲမှာ ရော်နယ်ဒိုတယောက် ဂိုးပေါက်ပျောက်ခဲ့ပြီး ပွဲချိန်တွင်းပြစ်ဒဏ်ကျူးလွန်ခဲ့လို့ အဝါကတ်လည်း အပြခံခဲ့ရပါတယ်။ အယ်လ်နာဆာတို့ အရေးနိမ့်ခဲ့ပြီး အမှတ်ပေးဖလားမျှော်လင့်ချက်လည်း နည်းပါးသွားပြီဖြစ်ကာ ရော်နယ်ဒိုတယောက် ကွင်းပြင်ကို စိတ်ပျက်လက်ပျက်နဲ့ ထွက်ခဲ့ချိန်မှာတော့ ပိုပြီးစိတ်ပျက်စရာကောင်းတာနဲ့ ကြုံတွေ့လိုက်ရပါတယ်။
အဲဒါကတော့ အယ်လ်ဟီလယ်ပရိသတ်တွေဟာ ရော်နယ်ဒို ကွင်းပြင်ကို ထွက်လာချိန်မှာ မက်ဆီရဲ့ နာမည်ကို အော်ဟစ်ခဲ့ကြတာပါ။ ရှုံးပွဲကြောင့် ဒေါသထွက်နေတဲ့ ရော်နယ်ဒိုကို သူ့ရဲ့ မဟာပြိုင်ဘက်ကစားသမား မက်ဆီနာမည်အော်ခေါ်ကာ လှောင်ပြောင်ခဲ့ကြတာဖြစ်ပြီး ပေါ်တူဂီသား မခံမရပ်နိုင်အောင် လုပ်ခဲ့ကြတာပါ။
ဒီအချိန်မှာပဲ ရော်နယ်ဒိုဟာ သူ့ရဲ့ ဖွားဖက်တော်ရှေ့ပိုင်းကို လက်နဲ့ကိုင်သလို အမူအယာမျိုးလုပ်ခဲ့ပြီး ဒါဟာ ပရိသတ်တွေကို လုပ်ပြသွားတာလို့ စွပ်စွဲနေကြပါတယ်။ မတော်တဆလား၊ ရည်ရွယ်ချက်ရှိရှိလားဆိုတာကတော့ ကာယကံရှင်သာ သိမှာဖြစ်ပြီး အယ်လ်ဟီလယ်ပရိသတ်တွေကတော့ သူတို့ကို ရော်နယ်ဒိုက အမူအယာနဲ့ ဆဲဆိုသွားတယ်လို့ ယူဆနေကြပါတယ်။
ရော်နယ်ဒိုရဲ့ ပရိသတ်တချို့ကတော့ သူတို့ကစားသမားက ဒီလိုမျိုးတုံ့ပြန်တတ်သူမဟုတ်ဘဲ ဘောင်းဘီတိုဝတ်ဆင်ကစားသူဖြစ်လို့ ဘောင်းဘီနေရာကျအောင် ဆွဲချနေတာသာဖြစ်တယ်လို့ ဖြေရှင်းခဲ့ကြပါတယ်။ ဘယ်အရာက အမှန်လဲဆိုတာကတော့ ရော်နယ်ဒိုသာ သိမှာဖြစ်ပြီး လက်ရှိမှာတော့ ဒီလိုမျိုးအပြုအမူက တိုက်ဆိုင်မှုဖြစ်နေခဲ့ကာ စွပ်စွဲခံနေရပါတယ်။